Read wanga ABAYAASI 19 Bible Online

ABAYAASI 19 - wanga bible

ABAYAASI 19

¹Mutsinyanga etsio Abaisiraeli shibalinji nende omuruchi tawe. Yaliho Omulawi undi owamenyanga ehale mushialo shiebikulu shia Efuraimu. Yabukula omukhaana okhurula Betselehemu elili mu Yuda okhuba omutiawe.

²Nebutswa omutia oyo yatiililwa omusaatsa oyo oburuma mana nakalukha munzu ya samwana Betselehemu, ne namenyayo khulwemiesi chine.

³Mana omusaatsawe oyo namuloondakhwo kho mbu amuhombelesie akalushe. Omusaatsa oyo yabukula omukholiwe nende tsisishili tsibili. Mana niyoola khunzu yasamwana omukhaana oyo ne olwa samwana omukhaana oyo yamulola yamwinjisia nobusaangaafu.

⁴Samwana omukhaana oyo nakhaya mbu omusaatsa oyo okhuula amenyekhwo. Kho omusaatsa oyo niyeyalisiaho tsinyanga tsitaru, nibaliitsanga, nokhunywa khandi nibeyalisinjiaho.

⁵Khunyanga yakhane babuukha mumabwibwi ne niberechekha okhutsia, nebutswa samwana omukhaana oyo yaboolela Omulawi oyo ari, “Liakhwo eshiokhulia, shikhumeete amaani, mana olatsia olunyuma.”

⁶Kho omusaatsa oyo nende samwana omukhaana oyo nibekhala okhulia nende okhunywa halala. Olunyumakhwo samwana omukhaana oyo naboolela omusaatsa oyo ari, “Iyalisie hano eshilo shino witsaatsahasie.”

⁷Omulawi oyo nasumukha mbu atsie, nebutswa samwana omukhaana oyo yamukhayisia mbu yeyalisie eshilo eshio. Kho omusaatsa oyo niyeyalisiaho khandi eshilo eshio.

⁸Khunyanga yakharano nabuukha mumabwibwi niberechekha okhutsia, khandi samwana omukhaana namuboolela ari, “Liakhwo eshiokhulia, olasumukha mushiteere.” Kho Bombi bario nibalia eshiokhulia.

⁹Ne lwomusaatsa oyo nomutiawe, nende omukholiwe oyo berechekha mbu basumushe, samwana omukhaana namuboolela ari, “Lola, eshialo bwakhela; shiolatsia ehale nishishili okhwilima tawe. Kho iyalisie hano eshilo shino, olie niwitsatsahasia mana mukamba olasumukha mumabwibwi notsia ingo.”

¹⁰Nebutswa Omulawi oyo naloba mbu shiyeyalisiaho eshilo eshio khandi tawe. Kho nara eshiokhwikhalakhwo khutsisishilitsie tsibili etsio, ne nasumukha nomutiawe, nomukholiwe nende tsisishilitsie nibatsia okhuula Yebusi, nilio Yerusalemu.

¹¹Eshialo nishiakhachaka okhwilima omukholi womusaatsa oyo namuboolela ari, “Chenda khusinjile khwiyalisie hano mwitookho lia Abayebusi lino.”

¹²Omulawi oyo namukalusia ari, “Shikhunyala okhwiyalisia hano ta, shichila litookho lino shilili elia Abaisiraeli tawe. Chenda khutsie khwiyalisie Gibea.

¹³Kata khunyala okhuula Rama eshialo nishishili okhwilima.”

¹⁴Kho nibatsiililila noluchendo lwabwe nibabira Yebusi. Eshialo nishibelimila nibakhola Gibea elili muluyia lwa Benjamini.

¹⁵Mana nibakobela okhutsia okhwiyalisiamwo, nebutswa olwa boolamwo omundu yesi shiyayetsakhwo okhubenjisia tawe, kho nibekhala butswa mulwanyi lwelitookho elo.

¹⁶Olwa bali nibashikhaleho omusakhulu undi owokhurula mushialo shiebikulu shia Efuraimu yetsaho narula okhukhola emilimo chiomumukunda (abandu bamenyangaho bali aboluyia lwa Benjamini).

¹⁷Olwa omusakhulu oyo yalola omusaatsa oyo nali mulwanyi lwelitookho yamureeba ari, “Orulanga heena? Ne otsitsanga heena?”

¹⁸Omusaatsa Omulawi oyo namukalusia ari, “Khurula Betselehemu elili mu Yuda, ne khutsitsanga ehale mushialo shiebikulu shia Efuraimu. Abulaho omundu oukhwinjisiye munzu tawe.

¹⁹Khuli nende obunyasi obuumu nende obubisi khulwa tsisishili tsiefwe khandi khuli nende emikaate nende idivai khulwa omutia wanje nende omukholi wanje. Shikhutambakhwo eshindu shiosi tawe.”

²⁰Mana omusakhulu oyo namuboolela ari, “Mwinjisibwe munzu mwanje! Ndalamulinda, shimuleyalisia mulwanyi lwelitookho tawe.”

²¹Kho nabenjisia munzuye, nalisia tsisishili tsiabwe. Mana abachenibe abo nibasaba ebilenje biabwe, nibalia eshiokhulia khandi nibanywa.

²²Olwa bali nibashitsaatsahalanga bario, abandu bandi abamayanu abomwitookho nibabotokhana inzu eyo. Nibachaaka okhukhupaka khumuliango nibalanjilisia nomwoyo omukhongo khumusakhulu mwene inzu oyo bari, “Rusia elwanyi omusaatsa winjile munzu muno! Khwenyanga okhukona ninaye.”

²³Nebutswa omusakhulu oyo narula elwanyi nababoolela ari, “Abasiani befwe, shimulakhole eshindu eshimayanu shirio tawe. Khulwa okhubela omusaatsa uno nomucheni wanje shimulakhole eshindu shieshifwabi shirio tawe.

²⁴Lekha emurusilie omwana wanje omukhaana oushili omushisila nende omukhasi omutia womusaatsa oyo mubakone namaani nende okhubakholela koosi aka mwenya. Habula shimulakholela omusaatsa uno eshindu shieshifwabi shino tawe.”

²⁵Nebutswa abasaatsa abo shibamurechelesia tawe. Kho omusaatsa Omulawi oyo natiila omutiawe nabayilila elwanyi, nabo nibamukona namaani khandi nibamukholela akeshifimbwa murwe eshilo shiosi. Olwa eshialo bwali nibutsia okhushia nibamulekhula.

²⁶Mana mumabwibwi omukhasi oyo niyetsa nakwa hamuliango weinzu yomusakhulu oyo, yomusaatsawe yali, nabaho okhuula olwa eliuba liarula.

²⁷Olwa omusaatsawe yabuukha mumabwibwi, niyekula omuliango mbu atsililile noluchendolwe, yanyoola omutiawe nakwile mubwinjililo bweinzu eyo, ne amakhonoke nikali khumushingachi kwomuliango.

²⁸Omusaatsa oyo naboolela omukhasi oyo arii, “Buukha khutsie.” Nebutswa omukhasi oyo shiyamukalusia eshindu ta. Mana omusaatsa oyo namubukula namura khusishili, ne nachaaka oluchendolwe lwokhutsia ingowe.

²⁹Olwa yoola ingo, yabukula omubano ne nakhalaka omutiawe oyo mubitonye ekhumi nabibili. Mana nabikabila khutsimbia ekhumi natsibili tsia Isiraeli buli oluyia eshipande shilala shilala.

³⁰Buli omundu walolangakhwo eshitonye shiomubili okwo yaboolanga ari, “Khushili okhulolakhwo amakhuwa shinga kano. Kata eshindu shinga shino shishili okhwikholekhakhwo okhurula olwa khwarula Misiri. Okhuula khukholekhwo eshindu! Nakhukhole shiina?”