Read wanga ABAYAASI 2 Bible Online

ABAYAASI 2 - wanga bible

ABAYAASI 2

¹Bulano omumalaika owa OMWAMI Nyasaye yarula Giligali natsia Bokhimu. Ne naboola ari, “Ndamurusia Misiri nemureera mushialo shia ndetsubila abakuuka benywe mbu, ndakhabahelesie. Ndaboola endi, ‘Shindakhafunache indakano yanje ninenywe ta,

²nenywe shimulakholekhwo indakano nabandu beshialo shino ta, okhuula mulikulule ebimalilo biemisango biabwe.’ Nebutswa shimuloondile lilako lianje tawe. Nishiina eshia mukholile shino?

³Kho bulano emuboolela mbu, shindalamurusilia abandu bano imbeli wenywe ta, habula balaba abasuku benywe, khandi abanyasaye babwe balaba omubero khwinywe.”

⁴Olwa omumalaika owa OMWAMI Nyasaye yali nabooleele Abaisiraeli amakhuwa ako, boosi bachaaka okhwikhuula.

⁵Bamala balanje habundu yaho mbu Bokhimu. Mana nibakholelaho OMWAMI Nyasaye emisango.

⁶Olwa Yoshwa yaruma abandu ba Isiraeli okhutsia, buli mundu yatsia okhubukula omukabo okwomukunda kwa bali nibamukabile.

⁷Olwa Yoshwa yali nashiliho mwoyo, Abaisiraeli bakhalabanila OMWAMI Nyasaye, kata olunyuma lwokhufwakhwe, batsiililila okhukhola bario, olwa abemilisi babwe, abalola amakhuwa amakhongo aka OMWAMI Nasaye yakholela Abaisiraeli bali nibashiliho mwoyo.

⁸Yoshwa omusiani wa Nuni, omukhalabani owa OMWAMI Nyasaye yafwa nali nemiyika eshikhumi shilala nende ekhumi.

⁹Mana nibamuyabila mumukundakwe Timinatsi-Sera, okwali mushialo shiebikulu shia Efuraimu, eshili emasaba weshikulu shia Gashi.

¹⁰Mana abandu bolwibulo olwo boosi nibafwa, ne abandu bolwibulo lwalondakhwo nibebilila OMWAMI Nyasaye nende koosi aka yali niyakholela Isiraeli.

¹¹Mana abandu ba Isiraeli niboonoonela OMWAMI Nyasaye, nibachaaka okhukhalabanila abanyasaye abalangwa mbu, Baali.

¹²Nibalekha okhwinamila OMWAMI Nyasaye, Nyasaye wabakuuka babwe, khandi Nyasaye wabarusia Misiri. Bachaaka okhwinamila abanyasaye bandi, abanyasaye ba abamenyani babwe. Bachaaka okhubenamila ne nibasinyisia OMWAMI Nyasaye.

¹³Balekha okhwinamila OMWAMI Nyasaye, nibakhalabanila abanyasaye ba Baali abo nende Arisitarite.

¹⁴Kho OMWAMI Nyasaye nasinyishila abandu ba Isiraeli, ne nabalekha nibaseerwa khandi nibabayaaya ebindu. Yakhola abasuku babwe boosi okhubahula, kho Abaisiraeli nibalanyalilwa okhwilinda okhurula khubasuku babwe tawe.

¹⁵Buli olwa batsitsanga mwihe, OMWAMI Nyasaye shiyalinji ninabo ta, shinga olwa yali niyabetsubila butswa. Kho bali mushibeela eshikhongo.

¹⁶Mana OMWAMI Nyasaye nahelesia abandu ba Isiraeli abayaasi, abamala nibabahonokosia okhurula khubandu babayaayanga ebindu abo.

¹⁷Nebutswa shibahulila kabayaasi abo ta, okhuba batsiililila okhubula obwisiikwa khu OMWAMI Nyasaye wabwe, ne nibenamila abanyasaye bandi. Abakuuka babwe bahulilanga amalako aka OMWAMI Nyasaye, nebutswa abolwibulo lwaliho ebise ebio, balekha bwangu okhukahulila.

¹⁸Buli olwa OMWAMI Nyasaye yahelesinjia Abaisiraeli omuyaasi, OMWAMI Nyasaye yalinji nende omuyaasi oyo, khandi yabahoninjia okhurula khubasuku babwe, tsinyanga tsiosi tsiomuyaasi oyo yalinjiho mwoyo. OMWAMI Nyasaye yatiililungwa abandu ba Isiraeli eshisa, shichila yahulilanga okhushenya khwabwe khulwa okhusandibwa nende okhunyakhana khwabwe.

¹⁹Nebutswa lwomuyaasi oyo yafwitsanga, abandu abo bashiukhananga, kho obulamu bwabwe nibuba obubi kata okhushilakhwo bwabakuuka babwe. Bakhalabanilanga nende okhwinamila abanyasaye bandi, shibaalekha emiima chiabwe ebimayanu tawe.

²⁰Kho OMWAMI Nyasaye nasinyikha ne naboola ari, “Khulwa okhuba abandu bano bafunache indakano yanje, eya ndalachilisia abakuuka babwe okhulinda, ne khandi shibambuliile isie ta,

²¹shindalarusia imbeli wabwe amahanga akali nikashili mushialo olwa Yoshwa yafwa tawe.

²²Habula ndalakekhoonyela okhuteema Isiraeli okhumanya nibaba nibalaloonda munjila tsianje shinga olwa abakuuka babwe bakhola, noho tawe.”

²³Kho OMWAMI Nyasaye nalekha amahanga ako mushialo, shiyahelesia Yoshwa obuhuli khuko noho kata okhukarusia mushialo eshio olunyuma lwokhufwa khwa Yoshwa tawe.