Read wanga ABAYAASI 20 Bible Online

ABAYAASI 20 - wanga bible

ABAYAASI 20

¹Mana abandu ba Isiraeli boosi okhurula Dani emasaba okhuula Berisheba emulambo, nende okhurula mushialo shia Giliadi ebukwe nibakhung'ana imbeli ewa OMWAMI Nyasaye Mizipa.

²Abakhulundu boosi betsimbia tsia Abaisiraeli tsiosi bali mumukhung'ano kwa abandu ba Nyasaye bano; kho baliho abalihe abandu ebikhumila ebikhumi bine.

³Mana abandu boluyia lwa Benjamini nibahulila mbu abandu ba Isiraeli boosi bakhung'anile Mizipa. Kho Abaisiraeli nibareeba bari, “Khuboolelekhwo, obumayanu buno bwakholilwe burie?”

⁴Kho Omulawi tsana owa omutiawe yali niyerirwe nababoolela ari, “Isie nende omutia wanje khwatsia Gebea elili mulukongo lwa Benjamini okhwiyalisiayo.

⁵Mana abasaatsa ba Gibea nibetsa okhuseera mushilo, nibabotokhana inzu yakhwalimwo. Benyanga okhunzira, kho nibakona omutia wanje namaani ne nafwa.

⁶Ndamala embukule omubilikwe nikukhalakamwo ebitonye, mana nekukabila khutsimbia ekhumi natsibi tsia Isiraeli, buli oluyia eshitonye shilala shilala. Abandu abo bakholile amakhuwa amabi khandi akeshifwabi mwifwe.

⁷Kho inywe Abaisiraeli boosi, boolekhwo, nishiina eshia khulakhola khulwa amakhuwa kano?”

⁸Mana abandu boosi nibabuukha nibaboola bari, “Abulaho khwifwe oulakalukha ingowe noho kata okhukalukha munzuye tawe.

⁹Nebutswa aka khutsia okhukholela abandu Gibea ngakano; Khulakhupa ikha mana khutikulushe okhubaseera shinga olwa ikha eyo yikwa.

¹⁰Khulabukula abandu likhumi khu buli abandu eshikhumi okhurula mubuli oluyia lwa Isiraeli; khandi abandu eshikhumi khu buli abandu eshikhumi okhurula khu buli shikhumila khulwa okhuhelesia abelihe eshiokhulia. Nabo abandi balatsia okhuhelesia abandu ba Gibea eshinyasio khulwa amakhuwa keshifwabi kabakholile mu Isiraeli kano”

¹¹Kho abandu ba Isiraeli boosi nibakhung'ana nibali nelichomo elala eliokhuseera litaala elo.

¹²Mana abetsimbia tsia Isiraeli nibaruma abarumwa mulukongo lwabandu ba Benjamini lwosi nibaboola bari, “Nimakhuwa shiina akeshifwabi aka mukholile kano?

¹³Khulweshio muhane abasaatsa ababi ba Gibea abo, kho mbu khubeere khulwa okhurusiaho obwonooni obwo mu Isiraeli.” Nebutswa abandu ba Benjamini shibarecheresia amakhuwa ka Abaisiraeli bashiabwe tawe.

¹⁴Kho aba Benjamini nibarula mumatookho kabwe koosi nibetsa Gibea okhulwana nende Abaisiraeli.

¹⁵Khunyanga eyo aba Benjamini bakhung'asia abandu ebikhumila amakhumi kabili nabasasaba okhurula mumatookho kabwe, nibali netsinganga okhumeeta khubandi ebikhumi musaafu abali nibaahulwe abamenyanga Gibea.

¹⁶Mubandu baahulwa abo balimwo abandu ebikhumi musaafu abasaatsa abeshikaata; buli mulala khubo yali ounyala okhukhuyunga lichina lieimburusi khulwoya lweliswi ne nalapaya tawe.

¹⁷Nabo abandu ba Isiraeli bandi abo nibakhung'asia abandu ebikhumila ebikhumi bine abokhulwana.

¹⁸Abandu ba Isiraeli barula nibatikulukha Betseli, nibareeba Nyasaye bari, “Niluyia shiina khwifwe olularanjilila okhuseera aba Benjamini?” OMWAMI Nyasaye nabakalusia ari, “Oluyia lwa Yuda nilwo olularanjilila okhutsia.”

¹⁹Olwa bwashia, Abaisiraeli babuukha nibakhupa ikambi ahambi Gibea.

²⁰Mana nibatsia nibaseera abelihe ba Benjamini, kho Abaisiraeli nibaranda shilunji nibahenjile khwitookho.

²¹Nabo abelihe ba Benjamini nibarula mwitookho okhulwana, ne khunyanga eyo nibeera abalihe ba Isiraeli ebikhumila amakhumi kabili nabibili.

²²Nebutswa abelihe ba Isiraeli nibatsubana abeene khu beene, khandi nibaranda shilunji aha bali nibarandile khunyanga yambeli.

²³Abandu ba Isiraeli nibatikulukha nibeekhuula imbeli owa OMWAMI Nyasaye okhuula khungoloobe. Ne nibareeba OMWAMI Nyasaye bari, “Khukalushe khandi khulwane nabashiefwe aba Benjamini noho?” OMWAMI Nyasaye nabakalusia ari, “Tsie mubalwane.”

²⁴Mana Abaisiraeli nibasita ahambi okhuseera aba Benjamini khunyanga yakhabili.

²⁵Ne khunyanga yakhabili eyo olwa aba Benjamini barula okhuseera Abaisiraeli Gibea, beera abandu ebikhumila ekhumi namunane ba Isiraeli.

²⁶Mana abandu ba Isiraeli boosi nibatikulukha nibatsia Betseli okhwikhuula. Nibekhala ebweneyo imbeli owa OMWAMI Nyasaye nibahonga inzala okhuula khungoloobe. Nibakholela OMWAMI Nyasaye emisango chiokhureera omulembe nende emisango emisambe.

²⁷Mana Abaisiraeli nibareeba OMWAMI Nyasaye mbu, abachetsiyie. Mutsinyanga etsio lisanduku lieindakano ya Nyasaye liali nilishiliho.

²⁸Finehasi omusiani wa Eliazari, omwitsukhulu wa Haroni niye owali nalikhalabanilanga. Kho Abaisiraeli nibareeba OMWAMI Nyasaye bari, “Khutikulushe khandi khutsie khulwane nende Benjamini omusiani wefwe noho tawe.” Naye OMWAMI Nyasaye nabakalusia ari, “Tsie mulwane ninaye, shichila mukamba ndalabahana mumakhono kenywe.”

²⁹Kho Abaisiraeli nibakoneshela ahambi nende Gibea.

³⁰Mana nibatikulukha okhuseera aba Benjamini khunyanga yakhataru. Nibatsia nibaranda shilunji niberecheshe okhulwana naba Benjamini Gibea, shinga olwa bali nibakholile olwa mbeli.

³¹Mana aboluyia lwa Benjamini nibarula okhulwana nende abandu ba Isiraeli, ne nibakhweswa okhurula mwitookho. Ne shinga bakholanga khase nibachaaka okhwira abandu ba Isiraeli, kho ahambi abandu amakhumi kataru nibafwila ebulafu mushikuri nende khumuhanda okutsia Betseli nende okutsia Gibea.

³²Mana aboluyia lwa Benjamini nibaboola bari, “Khubahulile butswa shinga olwa khubahulanga buli lwosi.” Nebutswa abandu ba Isiraeli baboola bari, “Leshe khwilushe mana bakhuloondekhwo kho mbu khubarusie hambi nelitookho nikhubasitia wemihanda emikhongo chili.”

³³Kho aba Isiraeli boosi nibarula ewa bali nibakalukha nibebunjelesia mwitookho lia Baalitamari. Nabo abashiabwe abali nibakonesheele litookho nibarula bwangu ewa bali nibebisile olubeka lwa Mumbo lwelitookho lia Gibea.

³⁴Abandu ebikhumila ekhumi abali nibaahulwe okhurula mubandu ba Isiraeli nibaseera litookho lia Gibea; ne nibakhupana obutinyu. Nebutswa aboluyia lwa Benjamini shibali nibamanyilekhwo mbu bali nibali ahambi okhuhulwa tawe.

³⁵Mana OMWAMI Nyasaye nanyalila Abaisiraeli okhuhula aba Benjamini. Khunyanga eyo Abaisiraeli beera aba Benjamini abandu ebikhumila amakhumi kabili nabarano nende eshikhumi shilala, abo boosi bali abelihe abali netsinganga.

³⁶Kho aba Benjamini nibalola mbu bahulilwe. Mana Abaisiraeli nibakalukha inyuma, nibafwana shinga abelukhanga aba Benjamini, shichila bali nibesichile abakonesheli babwe abali nibabotokhane litookho lia Gibea.

³⁷Kho abasaatsa bali nibakoneshele litookho elo nibetsa bwangu, nibenjila mwitookho lia Gibea elo nende okhwira abandu boosi abalimwo.

³⁸Abelihe ba Isiraeli abo bali nibafuchilisaniye nende abashiabwe abakonesheli mbu balala nende eshifwanani; mbu olwa balola lileesi liomwosi nilitikulukhanga okhurula mwitookho,

³⁹ne abelihe Abaisiraeli abo bashiukhana bachache okhuseera aba Benjamini. Khubise ebio aba Benjamini bali nibamalile okhwira Abaisiraeli abandu amakhumi kataru, kho nibeboolela abeene bari, “Toto, khumalile okhubakhupa shinga olwa khwabakhupa olwambeli.”

⁴⁰Mana lileesi liomwosi omukhongo nilichaaka okhutsia ikulu okhurula mwitookho. Olwa aba Benjamini beshebukha nibalilola bachenya muno okhulola litookho liosi niliyitsanga.

⁴¹Kho abelihe ba Isiraeli nibashiukhana, aba Benjamini nabo nibang'ang'aala shichila bamanya mbu amabi kabanyoolile.

⁴²Mana nibelukha okhurula khu Abaisiraeli nibahenjile mushitsiimi, nebutswa shibahonokokha ta. Banyoolwa hakari wabelihe lia Isiraeli nende abali nibakoneshela litookho abali nibetsanga okhurula mwitookho, mana nibeerwa.

⁴³Abaisiraeli babotokhana aboluyia lwa Benjamini, mana nibabalondachila okhurula Noha okhuula ebukwe welitookho lia Gibea nibabeeranga.

⁴⁴Abandu ebikhumila ekhumi namunane boluyia lwa Benjamini abali abalwani abatinyu beerwa.

⁴⁵Abandi bashiukhana nibelukha nibahenjile mushitsiimi nibatsia mulwanda lwa Rimoni. Abandu ebikhumila birano khubo beerirwa khumihanda. Mana Abaisiraeli nibatsiililila okhulondachila khubandu abo okhuula Gidomu nibeera abandu ebikhumila bibili.

⁴⁶Khunyanga eyo, abandu boosi abokhuluyia lwa Benjamini abeerwa bali ebikhumila amakhumi kabili nabirano; boosi bali abalwani abatinyu.

⁴⁷Nebutswa abandu ebikhumi musaafu behonokokha, mana nibelushila mushitsiimi nibatsia Mulwanda lwa Rimoni, nibamenyayo khulwemiesi chine.

⁴⁸Mana Abaisiraeli nibashiukhanila abandu bandi boluyia lwa Benjamini nibabeera boosi, abasaatsa, abakhasi, abaana nende emiruko chiosi. Nibasamba amataala kali mulukongo olwo koosi.