Read wanga ABAYAASI 21 Bible Online

ABAYAASI 21 - wanga bible

ABAYAASI 21

¹Abasaatsa ba Isiraeli bali nibalia omuma nibali Mizipa nibaboola bari, “Abulaho khwifwe oulafuchilila omukhaanawe okhuteeshela omusaatsa wokhuluyia lwa Benjamini tawe.”

²Kho abandu ba Isiraeli nibatsia e Betseli nibekhalayo imbeli owa OMWAMI Nyasaye okhuula khungoloobe. Nibalilila OMWAMI Nyasaye obutinyu nibaboola bari,

³“Iwe OMWAMI Nyasaye wa Isiraeli shiina eshichilile kano nikekholekha mu Isiraeli? Shina eshichila oluyia lwa Benjamini nilwenya okhusikha okhurula mu Isiraeli?”

⁴Olwa bwashia inyanga yalondakhwo abandu abo nibombakhaho eshimalilo shiemisango, nibakholelaho emisango emisambe nende echiokhureera omulembe.

⁵Mana Abaisiraeli nibareebana bari, “Niluyia shiina khutsimbia tsia Isiraeli olulatsia okhukhung'ana imbeli owa OMWAMI Nyasaye Mizipa ta?” Okhuba bali nibetsuba mbu omundu yesi oulatsia Mizipa okhukhung'ana imbeli wa OMWAMI Nyasaye ta, okhuula yerwe.

⁶Abandu ba Isiraeli nibabeelelela abashiabwe aboluyia lwa Benjamini nibaboola bari, “Inyanga yino oluyia lulala khutsimbia tsia Isiraeli lumalile okhukora.

⁷Nakhukhole shiina kho khwanyoolela abasaatsa ba Benjamini basikaale abakhasi bokhuteshia? Khwanala okhwitsubila OMWAMI Nyasaye mbu, shikhulafuchilila abakhaana befwe okhubateshela tawe?”

⁸Olwa bareeba okhumanya omukanda kwaboluyia lwa Isiraeli okulaatsia okhukhung'ana Mizipa ta, banyoola mbu, abulaho khubeinzu ya Yabeshi mu Giliadi owetsa mumukhung'ano okwo.

⁹Olwa balanga ameera kabelihe shiyaliho khubeinzu ya Yabeshi owafuchilila mbu aliho tawe.

¹⁰Kho abomukanda nibaruma abalwani babwe abatinyu, abandu ebikhumila ekhumi nababili nibabalachilisia mbu, “Tsie mwire abandu ba Yabeshi boosi, halala nabakhasi nende abaana.

¹¹Mwire abasaatsa boosi nende abakhasi boosi abalali abashisila tawe.”

¹²Mubandu ba Yabeshi banyoolamwo abakhaana abashisila ebikhumi bine, kho nibabareera mukambi eshilo, eyili mushialo shia Kanani.

¹³Mana abomukanda kwosi nibarumana oburume khu Ababenjamini abali nibali khulwanda lwa Rimoni nibababoolela mbu bakasie omulembe.

¹⁴Mana aboluyia lwa Benjamini abo nibakalukha, ne Abaisiraeli nibabahelesia abakhaana bali nibabukulwe okhurula khu Abayabeshi nibalabeerire tawe. Nebutswa abakhaana abo shibabahela boosi tawe.

¹⁵Mana abandu nibabeelelela aba Benjamini shichila OMWAMI Nyasaye yali namalile okhura omwahukho muboluyia lwa Isiraeli.

¹⁶Kho abakhulundu bomukanda nibaboola bari, “Abakhasi shibashiliho muluyia lwa Benjamini tawe, kho nakhukhole shiina, kho khunyoolele abasaatsa basikaale abakhasi?

¹⁷Shinobulayi Isiraeli okhusishia lulala khutsimbia tsiayo ekhumi natsibili tawe. Okhuula khunyoole injila shinga oluyia lwa Benjamini lunyala okhutsiililila okhubaho,

¹⁸Nebutswa shikhunyala okhubafuchilila okhuteshia abakhaana befwe ta, shichila khwamala okhura eshilaamo khumundu yesi khwifwe oufuchilila omukhaanawe okhuteshela omundu woluyia lwa Benjamini.”

¹⁹Mana nibaboola bari, “Lisabo elia OMWAMI Nyasaye lia buli khumuyika elikholelungwa Shilo lili ahambi okhukholwa.” (Shilo lili emasaba welitookho lia Betseli, emulambo welitookho lia Lebona nende ebukwe womuhanda okuli hakari welitookho lia Betseli nende Shekemu.)

²⁰Kho abakhulundu abo nibaboolela aba Benjamini bari, “Tsie mwifise mumikunda chiemitsabibu.”

²¹Mana mulindilile. Olwa abakhaana ba Shilo barula nibetsa okhushina mwisabo, nenywe murula ewa muba nimwifisile mumikunda chiemitsabibu. Buli mulala khwinywe yebukulile omukhasi namaani okhurula mubakhaana abo, mana mukalushe ninabo mulukongo lwa Benjamini.

²²Ne abasamwana nende abasiani babwe nibaba nibamwitsila nibamwiyiniakanila, mubaboolele muri, “Nimuchama, leshe khubateshie, shichila shikhubabukule okhurula khwinywe mubulwani tawe. Ne shichila mbu inywe abeene shimukhuhelesiye tawe, kho shimuli neshikha shiokhufunaka eshitsubo shienywe tawe.”

²³Mana aba Benjamini nibakhola bario, buli shiamulala khubo niyebukulila omukhasi okhurula mubakhaana abali nibashinanga Shilo; ne natsia ninaye ingo. Mana nibakalukha mutsingongo tsiabwe, nibombakha khandi amatookho kabwe ne nibamenyamwo.

²⁴Mubise ebio abandu ba Isiraeli bamala nibarulaho buli mundu nakalukha khuluyialwe, khubeinzuye nende khumianduchie.

²⁵Mutsinyanga etsio omuruchi shiyalinjiho mu Isiraeli tawe, kho buli mundu yakholanga akamuchamisia omwene.