Read wanga ABAYAASI 3 Bible Online

ABAYAASI 3 - wanga bible

ABAYAASI 3

¹Kho OMWAMI Nyasaye yalekha amahanga kandi mushialo eshio khulwa okhuteema Abaisiraeli, abalaabirirakhwo mwihe Kanani tawe.

²Yakhola ako khulwa okhwechesia buli olwibulo lwa Isiraeli, khukelihe, okhushila abo abali nibashili okhutsiakhwo mwihe.

³Abo abatong'a mushialo eshio bali: Amatookho karano aka Abafilisiti, Abakanani boosi, Abasidoni nende Abahiwi, abamenyelanga mubikulu bia Lebanoni, okhurula khushikulu shia Baali Herimoni okhuula khunjila ya Hamatsi.

⁴Abene abo baliho khulwa okhuteema Isiraeli, khulwa okhumanya nikaba mbu, Abaisiraeli banyala okhuloonda amalachilisio aka OMWAMI Nyasaye, aka yalachilisia abakuuka bwbwe okhubirira khu Musa noho tawe.

⁵Kho abandu ba Isiraeli nibamenya mubandu ba Kanani, mu ba Amori, mu Abahiwi nende mu Abayebusi.

⁶Abaisiraeli bateshianinjia ninabo khandi nibenamila abanyasaye babwe.

⁷Mana abandu ba Isiraeli nibakhola obwonooni imbeli ewa OMWAMI Nyasaye, Nyasaye wabwe. Bebilila Nyasaye wabwe ne nibachaaka okhwinamila ebifwanani bia abanyasaye ba Baali nende omunyasaye Ashera.

⁸Khulweshio OMWAMI Nyasaye yasinyishila abandu ba Isiraeli, kho nakhola omuruchi Kushani Rishatsaimu, wa Mesopotamia okhubahula khandi okhubaruka khulwemiyika munane.

⁹Nebutswa olwa abandu ba Isiraeli bahabila OMWAMI Nyasaye, OMWAMI Nyasaye yabahelesia omuhonia. Naye yali Otsinieli omusiani wa Kenazi, omusiani wabwe Kalebu omushe.

¹⁰Roho owa OMWAMI Nyasaye yamwitsamwo, naye naba omuyaasi khubandu ba Isiraeli. Otsinieli yatsia mwihe ne OMWAMI Nyasaye namukhola okhuhula omuruchi wa Mesopotamia.

¹¹Omulembe kwaliho mushialo khulwemiyika amakhumi kane, mana Otsinieli nafwa.

¹²Abandu ba Isiraeli khandi nibakhola obwonooni imbeli owa OMWAMI Nyasaye, kho OMWAMI Nyasaye nakhola Egiloni omuruchi wa Moabu okhuba owamaani okhushila Abaisiraeli, shichila bali nibakholile obwonooni imbeliwe.

¹³Omuruchi Egiloni niyeyunga halala nende Abamoni nende Abameleki, mana nibahula Abaisiraeli, nibatiila Yeriko, eliali litookho liemishindu.

¹⁴Abaisiraeli bali hasi woburuchi bwa Egiloni khulwemiyika ekhumi namunane.

¹⁵Mana Abaisiraeli nibahabila OMWAMI Nyasaye, naye nabarumila omundu wokhubalekhuula, owali Ehudi, omusiani wa Gera, owomuluyia lwa Benjamini, naye yali oweshikaata. Abandu ba Isiraeli baruma Ehudi khumuruchi Egiloni namuyilila ebihaanwa.

¹⁶Ehudi naye yali niyekaasilia olukanga olumemu tsimbeka tsiosi, lwoburambi buhela tsisendimita amakhumi karano. Yaluboha mutsingubotsie mukari khukhukunyuye yomukhono musaatsa.

¹⁷Mana nahelesia Egiloni omuruchi wa Moabu ebihaanwa ebio. Ne Egiloni yali omundu omukhomefu muno.

¹⁸Ne olwa Ehudi yali namalile okhumuhelesia ebihaanwa ebio, yaboolela abandu bali nibabichinjile mbu, bakalushe ingo.

¹⁹Nebutswa Ehudi yashiukhanila hamachina kabaatswa, ahambi nende Giligali, nakalukha khu Egiloni ne namuboolela ari, “Omwami, endi noburume khwiwe.” Kho omuruchi oyo nalaka abakhalabanibe ari, “Muholeele tsi.” Nabo abakhalabanibe nibarula elwanyi boosi.

²⁰Mana lwomuruchi yali niyekhaale yenyene mushisikashie eshinyifu shiehekulu, Ehudi yetsa namuboolela ari, “Endi noburume khwiwe okhurula khu Nyasaye.” Mana omuruchi nasinjila.

²¹Kho Ehudi, nomukhonokwe omukaata, nabukula olukanga olwo okhurula khukhukunyuye yomukhono musaatsa, ne namufumira munda.

²²Olukanga olwo nilwinjila lwosi neshilungu shiene, amasinya nikalufuunikha lwosi. Ehudi shiyatsomola olukanga olwo munda yomuruchi ta, ne efibifie nifirulamwo.

²³Mana Ehudi narula elwanyi, niyekalaho emiliango chieshisika tsana inyumawe, nachiboha.

²⁴Olwa yali natsiile, abakhalabani bomuruchi betsa, ne olwa balola emiliango nichikaale, bapara mbu, haundi ali mukari yekhoonyanga.

²⁵Nibalinda okhuula olwa bachonya, nebutswa shiyayekulakhwo emiliango chieshisika tawe. Mana nibabukula tsifungwo nibekula, habwenaho balola omwami wabwe nakwile hasi nafwile.

²⁶Naye Ehudi yelukha olwa bali nibashilindanga. Yabirira khumachina amabaatse tsana, ne niyelushila Seira.

²⁷Olwa yoolayo, yakhupa olwika nali mushialo shiebikulu shia Efuraimu, okhulanga abandu ba Isiraeli okhwitsa mwihe. Mana nabemilila nibakholomokha ninaye okhurula mushialo shiebikulu eshio.

²⁸Mana Ehudi nababoolela ari, “Nondekhwo, okhuba OMWAMI Nyasaye amuhelesiye obuhuli khubasuku benywe ba Moabu.” Kho balonda khu Ehudi nibakholomokha ninaye nibekala tsinyambukho tsiosi etsia Abamoabu bakhambushiilekhwo omwalo kwa Yorodani. Shibafuchililakhwo omundu kata mulala okhwambukha tawe.

²⁹Inyanga eyo Abaisiraeli beera abandu ahambi ebikhumila ekhumi, abali abelihe bamaani khandi abatinyu muno ba Abamoabu. Abulaho owehonokokha tawe.

³⁰Kho inyanga eyo Abaisiraeli bahula Abamoabu, mana omulembe nikubaho mushialo khulwa emiyika munane.

³¹Olunyuma lwa Ehudi, omuyaasi waloondakhwo yali Shamugari omusiani wa Anatsi. Naye yesi khandi yahonia Abaisiraeli khulwa okhwira Abafilisiti ebikhumi bisasaba, niyekhoonyelanga omuloho.