Read wanga ABAYAASI 4 Bible Online

ABAYAASI 4 - wanga bible

ABAYAASI 4

¹Mana khandi abandu ba Isiraeli nibakhola obwonooni imbeli ewa OMWAMI Nyasaye, olunyuma lwokhufwa khwa Ehudi.

²Kho OMWAMI Nyasaye nabalekha nibahulwa nende Yabini, owali omuruchi wa Abakanani, owarukanga mwitookho lia Hazori. Omusesia wabelihelie yali Sisera, owamenyanga mu Haroshetsi, litookho liabamahanga.

³Yabini yali nende amakaari kebibia ebikhumi shienda, naye yasandia abandu ba Isiraeli khulwemiyika amakhumi kabili. Mana abandu ba Isiraeli nibahabila OMWAMI Nyasaye mbu, abakhoonye.

⁴Tsinyanga etsio Debora, omulakusi weshikhasi, omukhasi wa Lapidotsi, yali nali omuyaasi wa Isiraeli, nayasinjia Abaisiraeli.

⁵Yekhalanga hasi mumusaala kwamashindu okwalinji hakari wa Rama nende Betseli, mushialo shiebikulu shiaba Efuraimu. Abandu ba Isiraeli bamwitsilangaho khulwa okhuyaasibwa.

⁶Inyanga yindi yaruma likhuwa mbu, Baraki omusiani wa Abinoamu, okhurula mwitookho lia Kedeshi, elialinji mushialo shia Nafutali yetse. Kho Debora naboolela Baraki ari, “OMWAMI Nyasaye wa Isiraeli akhulachilisia ari, ‘Bukula abandu ebikhumila ekhumi okhurula mutsimbia tsia Nafutali nende Zebuluni, obemilile mutsie khushikulu shia Tabori.

⁷Ndalareera omukhoongo wabelihe lia Sisera okhukhuseera khumwalo kwa Kishoni. Alaba namakaarike nende abelihebe, nebutswa ndalakhuhelesia obuhuli khuye.’ ”

⁸Mana Baraki nakalusia ari, “Noba notsia ninasi, ndalatsia, ne noba nolatsia ninasi ta, shindalatsia tawe.”

⁹Mana Debora namuboolela ari, “Toto mwene ndalatsia ninawe, nebutswa injila yene eyotsilakhwo eyo shiyilakhuhelesia oluyali ta, shichila OMWAMI Nyasaye alahaana Sisera mumakhono komundu omukhasi.” Kho Debora narula nibatsia nende Baraki Kedeshi.

¹⁰Baraki nalanga aboluyia lwa Zebuluni nende olwa Nafutali Kedeshi, ne abandu ebikhumila ekhumi nibatsia ninaye. Debora natsia ninaye.

¹¹Ebise ebio Heberi, Omukeni yali niyombakha liheemalie hambi nende Kedeshi, hambi nende omuruba kwa Zananimu. Yali niyasita ehale okhurula khu Abakeni bashie nende abolwibulo lwa Hobabu, owali mukhwasi nyene Musa.

¹²Olwa Sisera yaboolelwa mbu, Baraki omusiani wa Abinohamu atikuluushe khushikulu shia Tabori,

¹³yalanga amakaarike kebibia shienda nende abandu bali ninaye boosi, nabaruma okhurula Haroshetsi, eshialo shiabamahanga, okhutsia khumwalo kwa Kishoni.

¹⁴Mana Debora naboolela Baraki ari, “Tsia! OMWAMI Nyasaye alakhwimilila injila, inyanga yino akhuhelesiye obuhuli khu Sisera.” Kho Baraki nakholomokha okhurula khushikulu shia Tibori nali nabandube ebikhumila ekhumi.

¹⁵Ne olwa Baraki nabelihebe baseera Sisera, OMWAMI Nyasaye yakoyasia Sisera, nabandube nende amakaarike koosi. Sisera niyekha okhurula khwikaarilie, ne niyelukha khubilenje.

¹⁶Naye Baraki naloondachila amakaari ako nende abelihe abo okhuula Haroshetsi, litookho liabamahanga kandi. Mana abelihe ba Sisera boosi nibeerwa, shiyatong'akhwo kata omundu mulala tawe.

¹⁷Mana Sisera niyelukha natsia mwiheema lia Yaeli, omukhasi wokhurula mushialo shia Keni, shichila omulembe kwaliho hakari womuruchi Yabini wa Hazori nende abeinzu ya Heberi.

¹⁸Kho Yaeli natsia niyakaanila Sisera ne namuboolela ari, “Injila muno Omwami, injila mwiheema lianje, shiolaria tawe.” Kho Sisera niyenjilamwo, naye Yaeli namufuunikhakhwo lirungeti khulwokhumubisa.

¹⁹Mana Sisera namuboolela ari, “Mbelesiakhwo amaatsi kokhunywa, embulilanga obuloho.” Naye Yaeli nabukula eshisiiko shieliseelo shialimwo amabeele, namuhelesia mbu, anywe. Mana khandi namufuunikha.

²⁰Ne Sisera naboolela Yaeli ari, “Sinjila hamuliango weliheema, ne omundu yesi yesi niyetsa nakhureeba mbu, endi muno, omukaye mbu, shiendimwo tawe.”

²¹Nebutswa Sisera yali nachoonyile muno, kho nakona tsindoolo. Ne olwa yali nakonanga, Yaeli yabukula inyundo nende eshibambo, ne natsia wa yali kaala, ne namwira khulwa okhukhoma eshibambo eshio muluseyalwe, nishifutula okhuula hasi.

²²Olwa Baraki yetsa nakhabanga Sisera, Yaeli yatsia okhumwakaanila ne namuboolela ari, “Itsa, ndalakhumanyia omusaatsa wokhabanga.” Kho Baraki niyenjilamwo ninaye, ne lola, Sisera yali yaho nakonile, nafwile, nashio eshibambo nishili muluseyalwe.

²³Kho khunyanga eyo Nyasaye yakhola Abaisiraeli okhuhula Yabini omuruchi wa Abakanani.

²⁴Abaisiraeli batsiililila butswa okhuhula Yabini, okhuula olwa bamusasilia elala.