Read wanga ABAYAASI 5 Bible Online

ABAYAASI 5 - wanga bible

ABAYAASI 5

¹Khunyanga eyo, Debora nende Baraki omusiani wa Abinoamu bemba olwimbo luno bari,

²“Abemilisi babukuule obwimilisi mu Isiraeli, nabo abandu behaanile abeene mukhuchama, OMWAMI Nyasaye Yetsoomibwe!

³“Rechelesie inywe abaruchi! Inywe abarukanga, reche amarwi kenywe, ndalembela OMWAMI Nyasaye. Ndalakhupila OMWAMI Nyasaye, Nyasaye wa Isiraeli obukhana.

⁴“Iwe OMWAMI Nyasaye, olwa warula khubikulu bia Seiri, olwa wachenda norula mulukongo lwa Edomu, eshialo shiarenga, nayo ifula niyikwa okhurula mwikulu, toto amaatsi kakwa okhurula mumaleesi.

⁵Ebikulu biarenga imbeli ewa OMWAMI Nyasaye wa Isiraeli, imbeli ewa OMWAMI Nyasaye, Nyasaye wa Isiraeli.

⁶“Mutsinyanga tsia Shamugari, omusiani wa Anatsi, munyanga tsia Yaeli, amakaari shikabiranga mushialo ta, nabo abachendi babiranga khunjila tsinyelele.

⁷Abalima shibaliho mu Isiraeli ta, shibaliho tawe okhuula olwa isie Debora ndetsa, olwa ndetsa shinga nyina Isiraeli

⁸Olwa Abaisiraeli balobola abanyasaye abacheni, lihe lialiho mushialo. Khubandu ebikhumila amakhumi kane alikhwoho owachinga ingabo kata lifumo?

⁹Omwoyo kwanje kuli khubemilisi ba Isiraeli, khubandu abehaana abeene mukhuchama. Mwitsoomie OMWAMI Nyasaye.

¹⁰“Mukaboolekhwo inywe abachendelanga khutsisishili tsindafu, inywe abekhalanga khubwikhalo obulayi nende inywe abachendanga khunjila.

¹¹Rechelesie! Abakhupi bobukhana abali hamayabo kamaatsi, baboolanga khukobuhuli obwa OMWAMI Nyasaye, akobuhuli bwabandu ba Isiraeli. Mana abandu aba OMWAMI Nyasaye nibakholomokha mubiliibwa.

¹²“Buukha, Debora buukha! Buukha, buukha orereesie olwimbo! Buukha Baraki omusiani wa Abinoamu, imilila abahambebo okhurula mubuhambe bwabwe.

¹³Mana abandu bali nibatoonyile nibetsa khubemilisi babwe, abandu aba OMWAMI Nyasaye nibanzitsila, niberecheeshe okhulwana nende abamaani.

¹⁴Betsa okhurula mu Efuraimu okhuula mwibanda. Baloonda khwiwe Benjamini, nende abolwibulolwo. Abemilisi belihe betsa okhurula Makhiri, nabo abakhongo nibetsa okhurula Zebuluni.

¹⁵Abemilisi ba Isakari betsa nende Debora, toto, Isakari yetsa nende Baraki, mana nibamulondachila okhuula mwibanda. Nebutswa aboluyia lwa Rubeni bakabukhanamwo nibakanakania mumioyo chiabwe muno.

¹⁶Eshiachila nibatong'a inyuma nishiina? Batong'a okhurechelesia abaayi, nibalanga amakondi noho? Toto, aboluyia lwa Rubeni bakabukhanamwo, nibakanakania mumioyo chiabwe muno.

¹⁷Aboluyia lwa Gadi batong'a injelekha womwalo kwa Yorodani, nabo aboluyia lwa Dani, eshiachila nibatong'a hambi netsimeli nishiina? Aboluyia lwa Asheri batong'a khulukuku lweinyanza, batong'a halukuku lweinyanza.

¹⁸Nebutswa abandu ba Zebuluni nende aba Nafutali shibateeba obulamu bwabwe ta, kho nibatsia mwihe.

¹⁹“Abaruchi betsa nibalwana, balwana nende abaruchi ba Kanani mushialo shia Tanakhi, hamuchela kwa Mekido. Nebutswa shibayaayakhwo ifetsa yosi yosi tawe.

²⁰Tsing'ining'ini tsialwana nitsili mwikulu, olwa tsiachendanga bushiama mwikulu tsialwananga nende Sisera.

²¹Omuyembo kwa Kishoni kwabayuula, omwalo kwokhuyuula omukhulu kwa Kishoni. Ndalatsiililila okhuchenda, ndalatsiililila okhuchenda namaani.

²²“Mana tsifarasi nitsiitsa nitsiilukhanga, nitsiseena hasi obutinyu nebilenje biatsio.

²³Omumalaika owa OMWAMI Nyasaye aboola ari, ‘Merozi alaamilwe eshilaamo shiobubi, boosi abamenyangayo balaamilwe eshilaamo shiobubi shichila shibayetsa okhukhoonya OMWAMI Nyasaye ta, shibayetsa shinga abelihe okhumulwanila tawe.’

²⁴“Omukhasi wetsikhabi muno yali Yaeli, omukhasi wa Heberi Omukeni, Yaeli omukhasi wetsikhabi muno mubakhasi bamenya mumaheema.

²⁵Sisera yamusaba amaatsi kokhunywa, naye namuhelesia amabeele, yamureerera amabeele ketsikubuli khushikaye eshilayi.

²⁶Yabukula eshibaambo shieliheema mumukhono mulala, ne mumukhono kundi nabukula inyundo yomubaatsi. Yakhupa Sisera ne natubula omurwekwe, yafutula mumurwe.

²⁷Sisera yenama mumakuluke omwene, nakwa hasi, nakwa mubilenje bia Yaeli. Yenama mumakuluke mumasikamo ka Yaeli, Sisera yakwa hasi, ne nafwa.

²⁸“Nyinamwana Sisera yahenga elwanyi mwitirisha, yahenjelela elwanyi mumalobelo kelitirisha niyereeba ari, ‘Amakaari kashindile okhwitsa mbushiina? Mbushiina tsifarasitsie tsishindile okhukalukha?’

²⁹Abakhasibe bobuchesi muno nibamukalusia, kata omwene niyekalusia ari,

³⁰‘Bakhabanga butswa ebindu biokhuyaaya nibakabana, mbu, bakabane, omukhaana noho kata babili khubuli omulwani mulala. Sisera naye yekabe ingubo yang'oonwa nobuusi obulayi, nasi omwene tsingubo tsibili etsiang'oonwa nobuusi obulaayi.’

³¹“Iwe OMWAMI Nyasaye, abasukubo boosi bakhoya bafwa bario, nebutswa abetsabo nabo baashe shinga eliuba nilishirula.” Mana omulembe nikubaho mushialo khulwemiyika amakhumi kane.