Read wanga ABAYAASI 6 Bible Online

ABAYAASI 6 - wanga bible

ABAYAASI 6

¹Mana khandi abandu ba Isiraeli nibakhola obwonooni imbeli owa OMWAMI Nyasaye. Kho OMWAMI Nyasaye nalobola Abamidiani okhubaruka khulwemiyika musaafu.

²Abandu ba Midiani bali bamaani okhushila ba Isiraeli, kho Abaisiraeli nibebisa okhurula khubo mubinga nende mungoba etsiali mubikulu.

³Buli olwa Abaisiraeli barakanga emimela, Abamidiani betsanga nende Abameleki nende abetsimbia tsindi tsiomushitsiimi okhubaseera.

⁴Bakhung'asinjia mana basasia biosi ebia Abaisiraeli balinji nibarachile mumikunda chiabwe. Basasinjia ebirache biosi ebialinji emulambo nende okhubotokhana okhuula Gaza. Babukulanga amakondi, tsing'ombe nende tsisishili, ne shibaleshelangakhwo Abaisiraeli eshiokhulia shiosi shiosi tawe.

⁵Batikulukhanga netsing'ombe tsiabwe nende amaheema kabwe nibetsa shinga tsisiche. Bo abeene nende tsingamia tsiabwe bali abanji abolanyala okhubasia tawe. Kho betsanga nibasasia emikunda,

⁶mana Abaisiraeli nibakalusibwa hasi muno khulwa Abamidiani. Mana abandu ba Isiraeli nibahabila OMWAMI Nyasaye mbu, abakhoonye.

⁷Ne olwa bahabila OMWAMI Nyasaye mbu, abakhoonye okhuyinga Abamidiani,

⁸yabarumila omulakusi, owabareerera oburume okhurula khu OMWAMI Nyasaye wa Isiraeli naboola ari, “Ndamurusia mubuhambe mushialo shia Misiri.

⁹Ndamuhonokosia mumakhono ka Abamisiri nende akabandu bamulwana nibamuyinga mushialo shino. Ndarusia abandu abo imbeli wenywe, ne nemuhelesia eshialo shiabwe.

¹⁰Ndamuboolela mbu, nisie OMWAMI Nyasaye wenywe, ne shimulenamilakhwo abanyasaye ba Abamori, abamumenyanga mushialo shiabwe tawe. Nebutswa shimwayarechelesia tawe.”

¹¹Bulano omumalaika owa OMWAMI Nyasaye yetsa mulukongo lwa Ofura, ne niyekhala hasi womusaala omuruba, okwali kwa Yoashi, owa muluyia lwa Abiezeri. Ne omusianiwe mbu, Gideoni yali nahuulanga ingano mushitinyilo shieidivai mumasiliisi, kho mbu, Abamidiani baleshe okhumulola.

¹²Mana omumalaika owa OMWAMI Nyasaye namuloleshela habwene yaho namuboolela ari, “OMWAMI Nyasaye ali ninawe, iwe omusaatsa omuchesi khandi owamaani!”

¹³Naye Gideoni namukalusia ari, “OMWAMI Nyasaye, afuchiliile ekhureebe mbu, OMWAMI Nyasaye naba nali ninefwe, eshichila kano koosi nikakhukwila nishiina? Ebikhole ebikhongo, ebiabakuuka befwe bakhuboolela mbu, yabakholela bili heena? OMWAMI Nyasaye niye owakhurusia Misiri, ne bulano yakhulekha khandi yakhuhaana mumakhono ka Abamidiani.”

¹⁴Mana OMWAMI Nyasaye namulachilisia naboola ari, “Tsia namaaniko amakhongo ohonie Isiraeli okhurula khubandu ba Midiani. Nisie omwene oukhurumanga.”

¹⁵Gideoni nakalusia ari, “Nasi ndakhahonie endie Isiraeli? Abeshiliibwa shianje muboluyia lwa Manase nibo abateshele muno, nasi nisie omutiiti muno khubeinzu yefwe.”

¹⁶Mana OMWAMI Nyasaye namukalusia ari, “Onyala okhubahonia shichila ndalakhukhoonya. Olatubula Abamidiani shinga outubula omundu mulala.”

¹⁷Gideoni nakalusia ari, “Nimba nekhuchamisiye, kho umanyiekhwo eshifwanani mbu, niwe OMWAMI Nyasaye toto.

¹⁸Ekhusaaya nochama shiolarula hano neshili okhukhukholela omusango kweshiokhulia tawe.” Naye OMWAMI Nyasaye nakalusia ari, “Ndalakhulinda hano okhuula lwokalukha.”

¹⁹Kho Gideoni natsia munzumwe nakaasia eshimeeme shieimbusi nende omukaate kubulamwo limela okhurula mushimwelo shiobusie. Nara inyama mushimwelo, nakwo omunyu nakura khushikaye. Mana nabireera ewa omumalaika oyo yali, mushiinikha shiomuruba, namuhelesia.

²⁰Mana omumalaika owa OMWAMI Nyasaye oyo namuboolela ari, “Bukula inyama eyo nende emikaate chibulamwo limela echio obire biosi khulwanda luno mana otsushekhwo omunyu okwo.” Naye Gideoni nakhola ario.

²¹Mana omumalaika owa OMWAMI Nyasaye oyo nanyiila namurwe weindabushi eya yali natiilile, ne niyeenakhwo khunyama nemikaate echio, mana omulilo nikurubukha okhurula khulwanda olwo nikusamba inyama eyo nemikaate echio. Ne omumalaika oyo nakhamuukha.

²²Mana Gideoni namanyilisia mbu, owa yali naluutsi yali omumalaika owa OMWAMI Nyasaye, kho naboola muburi ari, “Iwe OMWAMI Nyasaye, khoonya! Okhuba emalile okhulola omumalaikawo moni namoni.”

²³Nebutswa OMWAMI Nyasaye yamuboolela ari, “Obe nomulembe, shiolaria tawe. Shiolafwa tawe.”

²⁴Mana Gideoni niyombakhaho eshimalilo shiemisango shia OMWAMI Nyasaye, ne nashikulikha eliira mbu, “OMWAMI Nyasaye nowomulembe.” (Okhuula bulano shishisinjiile Ofura, litookho liaboluyia lwa Abiezeri).

²⁵Eshilo eshio, OMWAMI Nyasaye naboolela Gideoni ari, “Bukula ihunwa ya papawo, nende eyindi yemiyika musaafu, mana olikulule eshimalilo shiemisango shia papawo, eshia yakholelangakhwo emisango chiabanyasaye ba Baali, mana olikulule eshifwanani shiomunyasaye weshikhasi Ashera, eshili halubeka washio.

²⁶Mana unyumbashileho isie OMWAMI Nyasayewo, eshimalilo shiemisango eshilayi. Mana obukule ihunwa yakhabili eyo ochisambe yoosi shinga omusango, ochisambe netsikhwi tsirula khushifwanani shia Ashera, shiolaba noremache eshio.”

²⁷Kho Gideoni nabukula khubakholibe abandu ekhumi, nakhola shinga olwa OMWAMI Nyasaye yali namubooleele. Nebutswa khulwa okhuba yali nariire abeinzuye nende abandu belitaala elo shiyakhola mushiteere ta, habula yakhola mushilo.

²⁸Olwa abandu belitaala elo babuukha mumabwibwi inyanga yalondakhwo, banyoola eshimalilo shiemisango shia Baali nishilikuluulwe khandi eshifwanani shia Ashera, eshialinji halubeka washio nishiremaakwe, ne ihunwa yakhabili niyisambiilwe khushimalilo shiemisango shiali nishiombakhwaho.

²⁹Abandu abo nibareebana abeene khu beene bari, “Oukholile kano niwiina?” Ne olwa bali nibamalile okhukhaabilisia nokhurebelesia banyoola mbu, Gideoni, omusiani wa Yoashi niye owali nakholile amakhuwa ako.

³⁰Mana nibaboolela Yoashi bari, “Reera omusianiwo elwanyi kho mbu, khumwire, shichila alikuluule eshimalilo shiemisango shia Baali, khandi aremaache eshifwanani shia Ashera, eshibetsanga halubeka washio.”

³¹Nebutswa Yoashi yabareeba boosi ari, “Mwenya okhusoola Baali noho? Mwenya okhumuterera noho? Owenyanga okhumusoola yerwe nibushili okhushia. Baali naba nali omunyasaye, lekha omwene yeterere, shichila niye oweshimalilo shiemisangoshie shilikuluulwe.”

³²Khulweshio okhurula khunyanga eyo, Gideoni yamala alangwe mbu, Yerubabeli, shichila Yoashi yaboola ari, “Lekha Baali yeterere omwene, shichila eshimalilo shiemisangoshie nishio eshilikuluulwe.”

³³Mana Abamidiani boosi nende Abameleki, nende abetsimbia tsiomushitsiimi nibakhung'ana halala nibaambukha omwalo kwa Yorodani, ne nibakhupa ikambi yabwe mwibanda lia Yezerili.

³⁴Naye Roho owa OMWAMI Nyasaye niyenjila mu Gideoni, kho nakhupa olwika khulwa okhulanga aboluyia lwa Abiezeri mbu, bamulondekhwo.

³⁵Kho naruma abarume mutsingongo tsia Manase tsiosi kho mbu, boosi betse bamulondekhwo. Khandi naruma abarume khuboluyia lwa Asheri, olwa Zebuluni, nende olwa Nafutali, ne boosi nibetsa nibamulondakhwo.

³⁶Mana Gideoni naboolela Nyasaye ari, “Oboolanga mbu, omalile okhwahula okhunzikhoonyela khulwa okhuhonia Abaisiraeli.

³⁷Kho bulano ndalara obwoya bwelikondi aha bahuulilanga imele. Olwa bushia ninyoola mbu, liime lili butswa khubwoya bwonyene, ne shililikhwo hasi ta, kho ndalamanya mbu, toto olanzikhoonyela khulwa okhuhonia Isiraeli.”

³⁸Nikamala nikekholekha butswa kario. Olwa Gideoni yabuukha mumabwibwi inyanga yalondakhwo, yatiinya obwoya bwelikondi obwo, liime lialikhwo liarusia amaatsi akanyala okhwitsula eshikaye.

³⁹Kho Gideoni naboolela Nyasaye ari, “Shiolaasinyishila ta, nochama lekha emboolekhwo khandi, lekha khandi endeemekhwo nobwoya mbu, bube obuumu, nebutswa liime libe hasi hosi pe.”

⁴⁰Mana Nyasaye nakhola ario eshilo eshio khandi kho mbu, olwa bwashia inyanga yalondakhwo, obwoya obwo bwali obuumu, nebutswa hasi hosi hali nihamile liime.