Read wanga ABAYAASI 7 Bible Online

ABAYAASI 7 - wanga bible

ABAYAASI 7

¹Inyanga yindi, Gideoni nende abandube babuukha mumabwibwi ne nibakhupa ikambi ahambi nende isebele ya Harodi. Nayo ikambi ya Abamidiani yali elubeka wemasaba wabwe, mwibanda hambi nende eshikulu shia More.

²Mana OMWAMI Nyasaye naboolela Gideoni ari, “Abandu aboli ninabo nabanji muno khulwa isie okhuhaana Abamidiani mumakhono kenywe. Abaisiraeli banyala okhwiyitsiala imbeli wanje nibapara mbu, bahulile khulwa amaani kabwe abeene.

³Khulweshio boolela abandu boosi ori, ‘Omundu yesi yesi ouli noburi noho neindenga, akalushe ingo, nefu khulatong'a khushikulu shia Giliadi shino.’ ” Kho abandu ebikhumila amakhumi kabili nababili nibenyokha nibakalukha ingo, ne abandu ebikhumila ekhumi nibatong'a.

⁴Mana OMWAMI Nyasaye naboolela Gideoni ari, “Abandu aboshili ninabo nabanji muno, obakholomosie khumaatsi, ne isie mwene ndalabateemayo. Mana omundu wekhuboolela mbu, ‘Omusaatsa uno alatsia ninawe,’ omwene oyo alatsia ninawe, naye yesi yesi owekhuboolela mbu, ‘Omusaatsa uno shialatsia ninawe ta,’ kho shialatsia ninawe tawe.”

⁵Mana Gideoni nakholomosia abandu boosi khumaatsi, naye OMWAMI Nyasaye namuboolela ari, “Wahukhasie omundu yesi yesi owikopola amaatsi nolulimilwe shinga olwa imbwa yikopolanga, okhuchaachila khu yesi yesi ousikama hasi okhunywa amaatsi.”

⁶Kho abekopola amaatsi namakhono kabwe bali ebikhumi bitaru, ne abandi boosi, basikama hasi nibenama okhunywa amaatsi ako.

⁷Mama OMWAMI Nyasaye naboolela Gideoni ari, “Ndalakhuhonia iwe nende okhuhaana Abamidiani mumakhonoko khulwa okhwikhoonyela abandu ebikhumi bitatu, abokhukopola amaatsi abo. Abandu bandi abo obaboolele bakalushe nango wabwe.”

⁸Mana Gideoni naboolela Abaisiraeli boosi okhukalukha nango wabwe, okhurusiakhwo abandu ebikhumi bitaru abo, abatong'a nebiokhulia biabwe netsitarumbeta tsiabwe. Ikambi ya Abamidiani yali niyili mwibanda emwalo.

⁹Eshilo shiene eshio, OMWAMI Nyasaye yalachilisia Gideoni ari, “Buukha okholomoshe otsie oseere ikambi, okhuba emalile okhuchihaana mumakhonoko.

¹⁰Nebutswa noba noriire okhukholomokha okhuseera, kho obukule omukhalabaniwo Pura, mutsie ninaye khukambi eyo.

¹¹Mana alahulila aka baboola, ne olunyumakhwo, olaba neitswoni okhutsia okhuseera.” Kho Gideoni nende omukhalabaniwe Pura, nibakholomokha okhuula khundulo weikambi yabelihe bali nibemanuule.

¹²Nabo Abamidiani, nende Abameleki nende abandu bomushitsiimi bali nibasalaanile mwibanda elo shinga olucheka lwetsisiche, khandi bali nende tsingamia tsinyinji shinga omuyeshe kwokhunyanza.

¹³Olwa Gideoni yoola ewa bali, yahulila omusaatsa undi naboolelanga owashie akelilooro, naboola ari, “Endoorire mbu, omuhayila kwomukaate kweishayiri kulakaashe mukambi yefwe nikwikhupa khwiheema. Liheema elo nilikwa hasi nifuumama.”

¹⁴Owashie oyo namukalusia ari, “Olwo nolukanga olwa Omuisiraeli Gideoni, omusiani wa Yoashi. Shilulikhwo neshifune shindi shiosi shiosi tawe! Nyasaye ahelesiye Gideoni obuhuli khu Abamidiani nende abelihe babwe boosi.”

¹⁵Olwa Gideoni yahulila khukelilooro liomusaatsa oyo nende eshifune shialio, yasikama hasi niyenamila OMWAMI Nyasaye. Mana nakalukha mukambi ya Abaisiraeli naboola ari, “Buushe! OMWAMI Nyasaye ahaanile abelihe ba Abamidiani boosi mumakhono kenywe.”

¹⁶Mana nakabula abandube ebikhumi bitaru abo mumikanda chitaru, ne nahelesia buli omundu olwika nende tsisiongo tsikhaya naramwo tsitaha.

¹⁷Ne nababoolela ari, “Olwa nduula khundulo khweikambi, munenje mana mukhole eshia isie ekhola,

¹⁸olwa isie nende abomukanda kwanje khukhupa tsinzika tsiefwe, nenywe mwesi mukhupa etsienywe ninubotokhana ikambi yoosi, nimwayula nimuboola muri, ‘Khulwa OMWAMI Nyasaye, khandi khulwa Gideoni!’ ”

¹⁹Kho Gideoni nende abomukandakwe eshikhumi abo niboola khundulo khweikambi ahambi mushilo hakari, olwa bali nibakharaho abalindi bandi. Mana nibakhupa tsinzika tsiabwe nende okhwaraka tsisiongo tsia bali nibatiilile mumakhono kabwe,

²⁰ne abemikanda chindi chiabali ninachio boosi nibakhola bario. Mana nibatiila tsitaha mumikhono chiabwe emikhasi, natsio tsinzika mumikhono chiabwe emisaatsa, nibayula bari, “Olukanga khulwa OMWAMI Nyasaye, khandi khulwa Gideoni!”

²¹Mana buli mundu nasinjila mubwiyangubwe nibabotokhaane ikambi, ne abasuku babwe abelihe boosi nibayula ne nibelukha tsimbilo.

²²Olwa abandu ba Gideoni bali nibashikhupanga tsinzika tsiabwe, OMWAMI Nyasaye yakhola abemikanda chiabasuku babwe okhulwana abeene khu beene netsinganga tsiabwe. Mana abasuku babwe abo nibelukha nibahenjile Zanetsani, okhuula Betsi-shita, okhuula khulwakho lwa Abeli-Mehola, ahambi nende Tabatsi.

²³Mana abasaatsa okhurula muluyia lwa Nafutali, olwa Asheri, nende muboluyia lwa Manase boosi nibalangwa, nabo nibalondachila Abamidiani.

²⁴Mana Gideoni naruma abarume mushialo shiebikulu shia Efuraimu shiosi okhuboola bari, “Kholomoshe, mwitse museere Abamidiani, mwikalile omwalo kwa Yorodani nende emichela chindi chiosi echibukangamwo okhuula Betsibara kho mbu, mwikalile Abamidiani bakhaywe okhwambukha.” Kho aboluyia lwa Efuraimu boosi nibalangwa, nabo nibekalila omwalo kwa Yorodani nende amichela chindi chiosi echibukangamwo okhuula Betsibara.

²⁵Mana nibatiila abakhulundu babili ba Abamidiani mbu, Orebu nende Zebu, nibeerera Orebu halwanda lwa Orebu, naye Zebu nibamwirira hashitiinyilo shieidivai shia Zebu. Nibatsiililila okhulondachila Abamidiani mana nibareerera Gideoni emirwe chia Orebu nende Zebu. Gideoni yali nali injelekha wa Yorodani.