Read wanga ABAYAASI 8 Bible Online

ABAYAASI 8 - wanga bible

ABAYAASI 8

¹Mana abandu ba Efuraimu nibaboolela Gideoni bari, “Mbushiina nolakhulanga lworulile okhuseera Abamidiani? Eshichilile nokhukholela kano nishiina?” Mana nibamuhalabila obutinyu.

²Habula Gideoni yabakalusia ari, “Akekholile bulano shikanyala okhuchelaasibwa nende aka inywe mukholile tawe. Eshitiiti shiaboluyia lwa Efuraimu bachesa, neshilayi khandi eshinji muno okhushila kata eshiaboluyia lwanje lwa Abiezeri bachesa.

³Nyasaye areere Orebu nende Zebu, abakhulundu ba Abamidiani mumakhono kenywe. Kho eshia nasi ekholile okhuchelaasia khwinywe nishiina?” Ne olwa yaboola ario, ne oburuma bwabwe khuye nibubombolokha.

⁴Khubise ebio Gideoni nende abandube ebikhumi bitaru abo bali nibakhambukha Yorodani. Bali nibachoonyile, nebutswa bali nibashilondachilanga abasuku babwe.

⁵Olwa boola Sukotsi, Gideoni yaboolela abandu belitookho elo ari, “Nimuchama, muhelesiekhwo abandu banje emikaate, bachoonyile nasi eshilondachilanga Zeba nende Zalimuna abaruchi ba Abamidiani.”

⁶Nebutswa abakhulundu ba Abasukotsi bamureeba bari, “Mbushiina khuhelesie abelihebo emikaate ne bashili okhuhamba Zeba nende Zalimuna?”

⁷Kho Gideoni nabakalusia ari, “Nobulayi, olwa OMWAMI Nyasaye alaba nareere Zeba nende Zalimuna mumakhono kanje, nasi ndalamukhupa inywe namasaka kamahwa, nebisisia biomushitsiimi.”

⁸Ne okhurula ebweneyo, yatsia Penueli khandi naboolela abandu bebweneyo amakhuwa malala ako, khandi abandu ba Penueli nibamukalusia butswa namakhuwa malala ako shinga olwa abandu ba Sukotsi bamukalusia.

⁹Kho nababoolela ari, “Ndalakalukha mumulembe, ne olwa engalukha mumulembe, ndalalikulula omunara kwenywe kuno.”

¹⁰Nabo Zebu nende Zalimuna bali nibali Karikori nende abelihe babwe, abandu abahela ebikhumila ekhumi nabirano, abali nibatong'a khubelihe bebukwe. Abandi ebikhumila eshikhumi namakhumi kabili bali niberwa netsinganga.

¹¹Gideoni nalonda khunjila eyili khundulo weshitsiimi, eyili ebukwe wa Noba nende Yogibeha, ne naseera abelihe abo, olwa bali nibashili okhwirechekha.

¹²Abaruchi babili ba Abamidiani abo, Zeba nende Zalimuna nibelukha, nebutswa yabalondachila nibalila, kho nachila abelihe babwe boosi nibatiilwa netsindenga.

¹³Olwa Gideoni yali nachelelanga okhurula mwihe, yabirira khunjila ya Heresi,

¹⁴ne natiila omuraaka undi owokhurula Sukotsi namurebelesia. Omuraaka oyo namuhandichila ameera kabakhulundu ba Sukotsi amakhumi musaafu namusaafu.

¹⁵Mana Gideoni nakalukha khubandu ba Sukotsi nababoolela ari, “Mwitsulila shinga olwa mwaloba okhuukhoonya? Mwaboola mbu, shimunyala okhuhelesiakhwo abandu banje abali nibachoonyile eshiokhulia ta, shichila ndali nishili okhuhamba Zeba nende Zalimuna. Kho bulano Zeba nende Zalimuna mbabano hano.”

¹⁶Mana nabukula amasaka kamahwa nende ebisisia biomushitsiimi nanyweshela abakhulundu ba Abasukotsi abo.

¹⁷Khandi nalikulula omunara kwali Penueli ne niyeera abandu belitookho elo.

¹⁸Mana Gideoni nareeba Zeba nende Zalimuna ari, “Abandu bamwera Tabori bali abafwana barie?” Nabo nibamukalusia bari, “Bafwana butswa shinga olwa iwe oli, buli mulala khubo yafwana shinga omwana womuruchi.”

¹⁹Naye Gideoni nabakalusia ari, “Abo bali abasiani befwe, abomunda ndala ninasi. Toto mwene shinga olwa OMWAMI Nyasaye ali mwoyo, muba nimwalaabeera ta, shindakhamwirire inywe tawe.”

²⁰Mana Gideoni naboolela Yetseri, omusianiwe omukhulundu ari, “Buukha obeere!” Nebutswa omubuukha oyo nalatsomola olukangalwe tawe. Yaria shichila yali nashili omubuukha.

²¹Mana Zeba nende Zalimuna nibaboolela Gideoni bari, “Omwene buukha okhwire, shichila kuno nomulimo kwomundu omutuukhu.” Kho Gideoni nabukula ebiuma biali mumakosi ketsingamia tsiabwe.

²²Mana abandu ba Isiraeli nibaboolela Gideoni bari, “Okhuruche, iwe nende omusianiwo nende omwitsukhuluwo, shichila okhuhoniye okhurula mumakhono ka Abamidiani.”

²³Naye Gideoni nabakalusia ari, “Isie kata omusiani wanje shikhulamuruka inywe ta, habula OMWAMI Nyasaye niye oulamuruka inywe.”

²⁴Mana natsiililila okhubaboolela ari, “Nimuchama, leshe emureebekhwo eshindu shilala, buli omundu khwinywe yambelesie ebiuma biamuyaayile ebio.” (Abamidiani bafwalanga ebiuma shinga olwa abandu bomushitsiimi bafwalanga).

²⁵Nabo nibamukalusia bari, “Khuchamile okhukhuhelesia.” Mana nibabambula ingubo hasi ne buli mundu narakhwo ebiuma bia yali nabukuule.

²⁶Ebiuma bieitsahabu, ebia Gideoni yanyoola biali ebihela ahambi tsikilo amakhumi kabili. Ne ebio shibiali halala nende ebiuma, nende ebitati nende tsingubo tsieikitani, tsiomundu wa Midiani yafwalanga ta, kata shibiali halala netsinyolo etsiali mumakosi ketsingamia tsiabwe tawe.

²⁷Kho Gideoni nakaasia eshifwanani shiomunyasaye okhurula khutsahabu eyo, ne nashira mwitaala lia Ofura, eliali nangowe. Abaisiraeli boosi nibalekha Nyasaye wabwe, ne nibatsia ebweneyo okhwinamila eshifwanani eshio. Ne okwo kwali omubero khu Gideoni nende abeinzuye.

²⁸Kho Abamidiani nibahulwa nende Abaisiraeli, mana Abaisiraeli nibalabaakhwo nende eshibahendia tawe. Eshialo shiabwe nishiba nomuleembe khulwemiyika amakhumi kane, okhuula olwa Gideoni yafwa.

²⁹Mana Gideoni nakalukha nangowe bwene namenyayo.

³⁰Gideoni yali nabasiani amakhumi musaafu, okhuba yali nabakhasi abanji.

³¹Yali khandi nomukhasi omubiikha mu Shekemu, owamwibulila omwana omusiani. Naye Gideoni nakulikha omusiani oyo mbu, Abimeleki.

³²Mana Gideoni omusiani wa Yoashi nafwa nali omuyindifu, ne nayabilwa mung'ani ya samwana, eyali Ofura, litookho liaboluyia lwa Abiezeri.

³³Olunyuma lwokhufwa khwa Gideoni, Abaisiraeli bakalukhana nibalekha Nyasaye wabwe, ne khandi nibachaaka okhwinamila abanyasaye ba Baali. Nibakhola omunyasaye Baali Beretsi okhuba omunyasaye wabwe.

³⁴Mana Abaisiraeli nibaletsulila OMWAMI Nyasaye, Nyasaye wabwe, owabahonia okhurula mumakhono kabasuku babwe tsimbeka tsiosi tawe.

³⁵Abaisiraeli shibayetsulilakhwo okhuhelesia Gideoni nabeinzuye oluyali khulwa amalayi koosi aka bakholela Isiraeli tawe.