Read wanga ABAYAASI 9 Bible Online

ABAYAASI 9 - wanga bible

ABAYAASI 9

¹Abimeleki omusiani wa Gideoni yatsia mwitaala lia Shekemu, ebukhotsanyene, nababoolela mbu, bareebe abandu ba Shekemu bari,

²“Khwinywe elileena lilayi, mbu murukwe nabasiani ba Gideoni boosi abandu amakhumi musaafu, noho murukwe nomusiani mulala yenyene? Ne mwitsulile mbu, Abimeleki nowomumatsayi kenywe.”

³Nabo abakhotsanyene nibaboolela abandu ba Shekemu amakhuwa ako khulwa ye, mana abandu ba Shekemu nibaahula okhuloonda khu Abimeleki, shichila yali owomumatsayi kabwe.

⁴Kho nibamuhelesia tsifetsa amakhumi musaafu okhurula muhekalu yomunyasaye Baali Beritsi. Naye Abimeleki niyekhoonyela amapesa ako okhurunga abandu abayingwa khandi obamayanu kho mbu, bamulondekhwo.

⁵Mana natsia ewa basamwana abali Ofura, nali ebweneyo khubutenje bwelichina elala, yeera abaana babwe amakhumi musaafu, abasiani ba Gideoni. Nebutswa Yotsamu, owali omushe mubasiani ba Gideoni niyebisa, mana naleerwa tawe.

⁶Mana abandu ba Shekemu boosi nende aba Betsimilo nibakhung'ana halala, nibatsia nibaahula Abimeleki okhuba omuruchi wabwe hamuruba okwali ahambi neisiilo ikhongo Shekemu.

⁷Olwa Yotsamu yahulilakhwo amakhuwa ako, yatsia nasinjila khubutenje bweshikulu shia Gerizimu, ne nababoolela nomwoyo omukhongo ari, “Inywe abandu ba Shekemu murechelesie, nimuba nimwenya mbu Nyasaye amurechelesie inywe!

⁸Inyanga yindi emisaala chiakhung'ana halala okhwiyaulila omuruchi. Mana nichiboolela omutseituni chiri, ‘Iwe obe omuruchi wefwe.’

⁹Nakwo omutseituni nikuchikalusia kuri, ‘Nasi ndakhalekha okhurusia amafura kanje akekhoonyelungwa okhuhelesia abanyasaye nende abandu oluyali khulwa okhumuruka inywe?’

¹⁰Mana emisaala nichiboolela omukhuyu chiri, ‘Itsa, iwe obe omuruchi wefwe,’

¹¹Nebutswa omukhuyu kwachikalusia kuri, ‘Nasi ndakhalekha okhwama ebiamo bianje ebilayi khulwa okhumuruka inywe?’

¹²Kho emisaala echio nichiboolela omutsabibu chiri, ‘Itsa, iwe obe omuruchi wefwe.’

¹³Nebutswa omutsabibu okwo nikuchikalusia kuri, ‘Nasi ndakhalekha okhurusia idivai yanje, eyitsaatsahasinjia abanyasaye nende abandu khulwa okhumuruka inywe?’

¹⁴Kho emisaala chiosi nichiboolela omunyenya chiri, ‘Iwe, itsa obe omuruchi wefwe.’

¹⁵Nakwo omunyenya nikuchikalusia kuri, ‘Nimuba toto nimwenyanga mbu, embe omuruchi wenywe, yitse mwifise mushiinikha shianje. Ne nimulakhola murio ta, omulilo kularula mumasaka kanje kamahwa kano nikusamba emisiita chia Lebanoni.’ ”

¹⁶Yonatsani naboola ari, “Kho bulano muparanga mbu, mwemeeshe Abimeleki mubwatoto khandi mubukololofu? Khandi mupara mbu, mukholeele Gideoni nende abeinzuye akobwatoto, khandi akabakhoyeele khulwa ebikhole biabwe?

¹⁷Mwitsulile mbu, papa wanje yamulwanila inywe: Yahonokosia obulamubwe khulwa okhumuhonia okhurula khubandu ba Midiani.

¹⁸Nebutswa bulano mukalukhane khubeinzu ya papa wanje. Mwirire abasianibe, abandu amakhumi musaafu khulwa lichina elala. Mana mwahuule Abimeleki omwana womukhalabaniwe weshikhasi okhuba omuruchi wenywe, shichila mbu, nomwihwa wenywe.

¹⁹Kho bulano nikali mbu akamukholeele Gideoni nende abeinzuye inyanga yino nakobwatoto khandi akobukololofu, kho mwikhoyele Abimeleki naye amwikhoyele inywe.

²⁰Ne nikalali kario ta, omulilo kurule khu Abimeleki kusambe abandu ba Shekemu nende aba Betsimilo. Khandi omulilo kurule mubandu ba Shekemu nende aba Betsimilo kusambe Abimeleki.”

²¹Mana Yotsamu niyelukha natsia okhumenya Beeri, shichila yali nariire Abimeleki omusiani wabwe.

²²Abimeleki yaruka Isiraeli khulwemiyika chitaru.

²³Mana Nyasaye naruma roho wobusuku hakari wa Abimeleki nende abandu ba Shekemu, mana abandu ba Shekemu nibakhoba Abimeleki.

²⁴Kano kekholekha kho mbu, Abimeleki nende abandu ba Shekemu, abamutsuba mbu, yeere abasiani ba Gideoni abali amakhumi musaafu barungwe khulwa amabi kabakhola.

²⁵Abandu ba Shekemu nibarechekha abandu okhukoneshela khubutenje bwebikulu, abokhunuula abandu boosi ababirangaho. Mana Abimeleki naboolelwa amamakhuwa ako.

²⁶Mana Gaali, omusiani wa Ebedi niyetsa Shekemu nabasiani babwe, kho abandu Shekemu nibaba nende itswoni muye.

²⁷Mana boosi nibarula nibatsia mumikunda chiabwe chiemitsabibu, nibanoka emitsabibu echio, nibachitiinya nibarusiamwo idivai mana nibakhola lisabo. Nibatsia munzu yomunyasaye wabwe, nibanywa khandi nibaliilamwo, khandi nibanyeka Abimeleki.

²⁸Mana Gaali nareeba ari, “Kho ifwe khuli abandu ba mbia shiiina mushialo shia Shekemu shino? Mbushiina nikhukhalabanilanga Abimeleki? Ne kata kario, Abimeleki uno naye niye wiina? Ye nomusiani wa Gideoni butswa! Ne Gideoni nende omunyaparawe Zebuli bakhalabanilanga Hamori samwana Shekemu, nebutswa kho nefu mbushiina nikhukhalabanila Abimeleki?

²⁹Abandu bano nibaba mbu, bali hasi wobunyali bwanje, khane ndakharusiyeho Abimeleki. Ndakhamubooleele mbu meeta abelihebo witse ebulafu khulwane.”

³⁰Olwa Zebuli owarukanga litookho elo yahulilakhwo amakhuwa ka Gaali, yasinyikha muno.

³¹Mana narumila Abimeleki oburume Aruma naboola ari, “Gaali omusiani wa Ebedi halala nende abasiani babwe betsile Shekemu ne bayakuule induli mubandu mbu, bakhufukule iwe.

³²Khulweshio iwe nende abandubo mutsie mubakoneshele mumikunda mushilo.

³³Kho obuushe mukamba mumabwibwi mana oseere litookho. Mana olwa Gaali nende abandube bakhuseera, obakholele shinga lwoba nonyalilwa.”

³⁴Kho Abimeleki nende abandube boosi nibabuukha mushilo nibatsia nibakoneshela Shekemu nibali mumikanda chine.

³⁵Olwa Abimeleki nende abandube balola Gaali narula elwanyi nasinjila mushiliibwa shielitookho, babuukha nibarula ewa bali nibakonesheele.

³⁶Ne olwa Gaali yabalola, yaboolela Zebuli ari, “Lola! Abandu bakholomokhanga okhurula khubutenje bwebikulu.” Naye Zebuli namukalusia ari, “Abo shibali abandu ta, nebiniini khubikulu.”

³⁷Gaali naboola khandi ari, “Lola! Abandu bakholomokhanga okhurula hasi bwene weshikulu, ne omukanda kundi nakwo kwitsilanga khunjila yomusaala omuruba kwabafumu.”

³⁸Mana Zebuli namureeba ari, “Kho aka waboola kali heena? Shichila niwe owareeba mbu, mbushiina nikhukhalabanilanga omusaatsa mbu, Abimeleki uno? Bano shibali abandu tsana abawalechelesinjia? Bulano rula otsie obalwane.”

³⁹Mana Gaali narula niyemilila abandu Shekemu, ne nalwana nende Abimeleki.

⁴⁰Mana Abimeleki nalondachila Gaali, namuyiima naye Gaali namwilukha. Mana abandu abanji nibasaalisibwa khandi nibakwa khunjila okhuula khushiliibwa shielitookho.

⁴¹Kho Abimeleki namenya Aruma, naye Zebuli nalondachila Gaali nabeinzuye okhurula mwitookho lia Shekemu kho mbu, baleshe okhumenyayo.

⁴²Inyanga yalondakhwo, Abimeleki yaboolelwa mbu, abandu ba Shekemu berechekhanga okhutsia nibali mumikanda.

⁴³Kho nabukula abandube nabakabula mumikanda chine kho mbu, batsie bakoneshele abandu abo mumikunda echio. Olwa yalola abandu abo nibetsanga okhurula mwitookho, yarula ewa yali nabakonesheele ne nabeera.

⁴⁴Mana Abimeleki nende abomukanda kwa yali ninakwo nibatsia bwangu okhulinda khushiliibwa shielitookho, nabo abemikanda chindi chibili abo nibaseera abandu bali mumikunda boosi nibabeera.

⁴⁵Mana Abimeleki nakhupana nende abandu belitookho elo eshiteere shiosi, nabukula litookho elo, niyeera abalimwo boosi khandi nalilikulula liosi, ne nalimiitsakhwo omunyu.

⁴⁶Ne olwa abandu boosi abomunara kwa Shekemu bahulilakhwo amakhuwa ako, belushila mulukoba lweinzu yomunyasaye owalangwa mbu, Baali Eliberitsi.

⁴⁷Abimeleki naboolelwa mbu, abandu bomunara kwa Shekemu bakhung'anile halala.

⁴⁸Kho Abimeleki natikulukha khushikulu shia Zalumoni nende abandube. Nabukula ihaywa, narema lisaka liomusaala, nalichinga khwibeka. Naboolela abandu mbu, boosi bakhole bario bwangu.

⁴⁹Kho buli mundu narema lisaka liomusaala ne nibalonda khu Abimeleki, nibabunjikha amasaka ako khumunara okwo, ne nibahafia omunara tsana omulilo. Ne abandu balimwo, abasaatsa nende abakhasi bali abahela ahambi eshikhumila shilala, nibafwa boosi pe.

⁵⁰Mana Abimeleki natsia Tsebezi nabotokhana litookho liosi ne nalitiila.

⁵¹Nebutswa omunara kwalimwo okwamaani, kho abandu belitookho elo boosi, abasaatsa nabakhasi, halala nabemilisi babwe nibelushila mumunara okwo. Beyikalilamwo mana nibaniina khushilama.

⁵²Olwa Abimeleki yetsa okhuseera litookho elo, yatsia nasita habwinjililo bwomunara kho mbu, ahafilieho omulilo.

⁵³Nebutswa omukhasi undi nalasa isio khumurwe kwa Abimeleki, niyitubula eshiangangashie.

⁵⁴Mana Abimeleki nalanga bwangu omusianiwe omuraaka, owali nachinjile ebimanulwabie, namulaka ari, “Bukula olukangalwo unzire. Shienzenya mbu, abandu bamboolekhwo mbu, omukhasi niye ounzirire tawe.” Kho omuraaka oyo namufimira nafwa.

⁵⁵Olwa Abaisiraeli balola mbu, Abimeleki afwile, benyokha nibakalukha buli mundu ingowe.

⁵⁶Nolwa Nyasaye yarunga Abimeleki khulwa obubi bwa yakholela samwana khulwa okhwira abasiani babwe amakhumi musaafu.

⁵⁷Nyasaye khandi nakhola abandu ba Shekemu okhunyakhana khulwa obumayanu bwabwe, shinga olwa Yotsamu omusiani wa Gideoni yali yiyarumbula, olwa yabalaama eshilaamo shiobubi.