Read wanga 2 YOHANA 1 Bible Online

2 YOHANA 1 - wanga bible

2 YOHANA 1

¹Isie omukofu, emuhandichila omukhaye omulobole nende abaana bebe aba ndaheela toto. Ne shiendi isie sienye ta, habula boosi abamanyile obwatoto bamuheelanga inywe,

²shichila obwatoto buli mwifwe khandi bulamenya inziayo.

³Obukoosia, tsimbabasi, nomulembe ebirula khu Nyasaye Sefwe nende Yesu Kristo Omwana wa Sefwe, bibetsenje ninefwe mubwatoto nende mubuheeli.

⁴Ndekhoya okhushila okhunyoola mbu balala khubaana benywe balondanga obwatoto butswa shinga khwalachilisibwa nende Sefwe.

⁵Ne ekhusaaya, omukhaye omulobole mbu muhelanenje abeene khu beene. Lino shilili lilako liyia ta, habula nelilaka elia khwali ninalio okhurula khukhuchaaka.

⁶Obuheeli bwemboolangakhwo mbwobuno mbu, khukhoyile okhumenya muburechelefu khumalako aka Nyasaye. Lilako liene elia mwesi mwahulila okhurula mukhuchaaka, lili mbu, mwesi mukhoyile okhumenya mubuheeli.

⁷Ababeeyi abanji bamala okhusalana mushialo shiosi, abandu abalafuchililanga mbu, Yesu Kristo yetsa shinga omundu namundu tawe. Omundu shinga oyo nomubeeyi khandi omusuku wa Kristo.

⁸Mube meeso kho mbu muleshe okhukosia eshiamwakhalabanila, habula mbu munyoole omurungo kwenywe mubwitsulu.

⁹Omundu yesi oulamenyanga mumechesio aka Kristo ta, nebutswa nakabiririra shiali nende Nyasaye tawe. Omundu yesi oumenyanga mumechesio aka Kristo ali nende Sefwe nende Omwana.

¹⁰Kho omundu yesi namwitsila nalarera amechesio kano ta, mulamwinjisie mumataala kenywe tawe; kata mulamushesia tawe.

¹¹Shichila omundu yesi oumushesia omulembe aba asanganga ninaye mubikholebie ebibi.

¹²Endi namukhuwa amanji akakhumuboolela, nebutswa shinzenya okhukara mubuhandiche tawe, habula enaaya okhumucheniha nende okhuboola ninenywe moni na moni kho khube nomwikhoyo kwitsule.

¹³Abaana bomukhana wenywe[1] omulobole bamushesiye.