Read wanga 3 YOHANA 1 Bible Online

3 YOHANA 1 - wanga bible

3 YOHANA 1

¹Isie Omukofu, ekhuhandichila iwe Gayo owa ndaheela mubwatoto.

²Omwitsa wanje omuheelwa, esaaya mbu buli shindu shibetsenje obulayi khwiwe khandi mbu obe nobulamu obulayi shinga emanyile oli omulamu muroho.

³Ndasaangaala okhushila olwa balala khu abaana befwe Abakristo boola hano nibamboolela shinga oli omusuubilwa mubwatoto, shinga lwomenyanga mubwatoto.

⁴Shibulaho eshinjamisinjia okhushila okhuhulila mbu abaana banje bamenyanga mubwatoto.

⁵Omwana wanje omuheelwa oli omusuubilwa muno mumilimo chia okhalabanilanga Abakristo bashienywe kata olwa baba nibali abacheni.

⁶Baboolile abeikanisa yino khukobuheelibwo. Nochama obakhonye batsililile khuluchendo lwabwe munjila eyokuchamisia Nyasaye.

⁷Okhuba bachaaka oluchendo lwabwe khulwa okhukhalabanila Kristo nibalafuchilila obukhoonyi bwosi bwosi okhurula khubalasuubila ta.

⁸Ifwe Abakristo okhuula khubakhonye abandu bano kho mbu khunyale okhukhonyana ninabo mumilimo chiabwe chiobwatoto.

⁹Ndahandika ibarwa inyimbichiti khu Kanisa; ne Dioterefe owachama okhwikhola omwimilisi wabwe shiyachama okhuhulila akandaboola tawe.

¹⁰Olwa nditsa okhumucheniha nilio olwa ndiliboola khukosi aka yakhola: akeshisinyo nende Obubeeyi. Akaboolanga khwifwe! Ne shikali ako konyene ta, khandi shiyenjisinjia Abakristo bashie nibali khubulandia obwo tawe, khandi akaninjia abo abenya okhubenjisia, nibakhabenjisiye ateemanga okhubalonda okhurula mukanisa.

¹¹Omwitsa wanje omuheelwa, olaloonda akali amabi tawe, nebutswa olonde akali amalayi. Omundu yesi oukholanga amalayi nowa Nyasaye; ne omundu yesi oukholanga akali amabi shiamulutsi Nyasaye tawe.

¹²Buli mundu amwitsoominjia Demeterio; ne obwatieli bwene bumwitsoominjia. Ne nasi emeetakhwo obuloli bwanje, ne mumanyile mbu akemboola nakatoto.

¹³Endi namanji okhushila akokhumuboolela, nebutswa shinzenya okhukhola endio mubuhandiche ta.

¹⁴Enaaya okhumucheniha ahambi hano mana nikhusungane moni namoni.

¹⁵Omulembe kube khwinywe. Abetsabo boosi, barumile amashiesio. Oshesie abetsa befwe boosi.