Read wanga YUDA 1 Bible Online

YUDA 1 - wanga bible

YUDA 1

¹Ibarwa eyirula khwisie Yuda, ouli omukhalabani wa Yesu Kristo khandi omusiani wabwe Yakobo; ehandichila abandu abalangwa, khandi aba Nyasaye Sefwe yaheela khandi abalindwa obulayi nende Yesu Kristo.

²Tsimbabasi, omulembe nobuheeli bimeteshe mwinywe.

³Abaheelwa banje, endi nobuha obunji okhushila obwokhumuhandichila khumakhuwa kobuhonia obwa khusangangamwo halala. Enyoolile nilili likhuwa likhoyele mbu emuhandichile nemusaaya mbu mulumilile mubulwani bwamakhuwa kobusuubili obwa Nyasaye yahelesia abandube lulala lwonyene.

⁴Balala khubandu balasuubilanga mu Nyasaye ta, beyinjisiiye mwifwe mumasilisi. Abandu abonooninjia oburume obwa Nyasaye wefwe kho mbu obulamu bwabwe obumayanu bufuchililwe. Abandu bano bekana Yesu Kristo, ouli Omwami wefwe, khandi omuruchi wefwe yenyene. Khale Amahandiko karumbula eshiina shiabakhalachilwe.

⁵Kata nimuba nimumanyile amakhuwa kano koosi, ndikomba okhumwitsusia mbu, Nyasaye owahonia Abaisiraeli okhurula mushialo shia Misiri, olunyuma yamala nasishia abandu balasuubilila muye ta.

⁶Mwitsulile mbu, abamalaika abalalinda obwikhalo bwabwe ta, abachwang'a eshimenyo shiabwe, babohwa mushiilima inziayo, ewa Nyasaye yababikha okhulindilila inyanga eyo ikhulundu olwa balikhalachilwa eshiina.

⁷Yitsulile khandi Sodomu nende Gomora nende amatookho karondakhaneho, akabandu bamwo bakhola shinga olwa abamalaika abo bakhola, nibeyinjisia mubwilasi bwobuyilani, nende okhukhola oluswa. Banyakhananga eshinyasio shiokhusambwa nomulilo enziayo, abandu abo neshilolelo shiahabulafu khubandu boosi.

⁸Munjila ndala eyo khandi abandu bano bali namalooro akachilanga nibelaasia; balechelesinjia obunyali obwa Nyasaye khandi banyekanga ebilonje bioluyali biomwikulu.

⁹Kata Mikaeli, omumalaika omukhulundu shiyakholakhwo kano ta. Olwa basolana nende Setani nibayingananga owakhabukula omubili kwa Musa, omumalaika Mikaeli shiyateemakhwo okhukhalachila Setani eshiina namakhuwa kokhunyeka ta, habula yaboola mbu, “OMWAMI akhuhalabile.”

¹⁰Nebutswa abandu bano abalasuubila ta banyekanga eshindu shiosi eshia balamanyile ta. Bali shinga tsisolo tsisilu etsimululungwa, okhubela tsikholanga ebindu nitsilapara tawe.

¹¹Muli mushilaamo shiobubi inywe khubo! Shichila bamenyanga obulamu shinga obwali bwa Kaini; khulwa okhukhaaba inganga, bonoona shinga olwa Balaamu yonoona. Bakhola obukhayi shinga obwa Kora yakhola, ne khulwako balasasibwa shinga ye yasasibwa.

¹²Ne nokhuhabasania khwabwe okhubula isoni, bali shinga eshipala eshimayanu mubiokhulia bienywe biomumasabo kahalala. Bali shinga amaleesi akomuyeka kuchinganga nikuhutsa, ne nikalareera ifula ta. Bali shinga emisaala echilaamanga ebiamo biosi ta, kata mutsinyanga etsieshilumbi ta. Bali shinga emisaala chisulilwe nemisi mana chimalile okhuniala.

¹³Bali shinga amarunda amahalaba kokhunyanza; ne ebikhole biabwe ebietsisoni bifutukhanga shinga lifilo. Bali shinga tsing'ining'ini etsitimatimanga; nibo aba Nyasaye yabishila habundu ahalahwaho ta mushiilima eshimali tititi mu Gehena.

¹⁴Bano nibo aba Enoka, owali owolwibulo lwamusafu okhurula khu Adamu yalakulakhwo khale khukabwe naboola ari, “Omwami yakhetse nende ebikhumila nebikhumila ebiabamalaikabe abatakatifu

¹⁵okhuyaasia boosi, nende okhubakhalachila eshiina abo boosi abalasuubilanga Nyasaye khulwebikhole biosi ebiobumayanu, nende akobufwoli koosi aka abonooni abamayaanu abo baboolanga okhufukula Nyasaye!”

¹⁶Abandu abo babuluulanga khatsotselo khandi nibatula abashiabwe; balondanga khubwikombi bwabwe, nibeyitsoomia khukabwe abeene, nibakatilisia abandi kho mbu babe abenyoolela akabachamisia abeene.

¹⁷Nebutswa inywe, abaheelwa banje mwitsulile obuchetsiyi obwabarume aba Omwami wefwe Yesu Kristo bamuboolela khale.

¹⁸Bamuboolela mbu, “Olwa tsinyanga etsiobumalilishi tsiliula balibaho abamukokonyela inywe nende Nyasaye, abandu abalonda mubwikombi bwabwe abeene nibalaria Nyasaye tawe.”

¹⁹Bano nibo abandu abareeranga obwahukhani, abemililungwa nende obwikombi obubi bwemibili chiabwe, abanashialo ababula Roho wa Nyasaye.

²⁰Nebutswa inywe abaheelwa banje, mutsiililile okhwiyumbakha mubusuubili obuli obutakatifu okhushila. Nimusaaya khatsotselo mubunyali obwa Roho Omutakatifu watsana oyo.

²¹Mwilindenje abeene mubuheeli obwa Nyasaye, nimulindililanga buli lwosi Omwami wefwe Yesu Kristo mumbabasitsie okhumuhelesia obulamu obubula eshiakamo.

²²Mubabeele tsimbabasi abenabo abashikanakania mumioyo chiabwe;

²³muhonia abandi khulwa okhubayuula okhurula mumulilo; mubabeele abandi tsimbabasi nimwilinda, nebutswa musile ebifwalo biabwe ebionoonibwa khulwa obwonooni bwabwe ebiobwikombi.

²⁴Kho bulano oluyali lube khuye ounyala okhumulinda muleshe okhwisichirala, nokhumusinjisia imbeli ewoluyalilwe nimubulakhwo eshikha shiosi, mukhwikhoya okhukhongo.

²⁵Khu Nyasaye ouli mulala yenyene, omuhonia wefwe okhubirira mu Yesu Kristo Omwami wefwe, ahebwe oluyali, nobukhulundu namani, nende obunyali obwali obubwe okhurula khale olwo, abetsenje ninabwo bulano nende okhuula inziayo. Amina!