Read wanga OBUFWIMBULI 1 Bible Online

OBUFWIMBULI 1 - wanga bible

OBUFWIMBULI 1

¹Shino neshitabu shiamakhuwa ka Yesu Kristo yafisula. Nyasaye yamuhelesia obufwimbuli buno khulwa okhumanyia abakhalabanibe akali niketsa okhwikholekha bwangu. Naye Yesu Kristo yamanyisia amalolelo kano omukhalabaniwe Yohana khulwa okhumurumila omumalaikawe.

²Naye Yohana aboolanga obuloli khwikhuwa lia Nyasaye nende khukobwatoto obwalolosibwa nende Yesu Kristo nende koosi akomwene yalola.

³Noweikhabi omundu ousoomela abandu amakhuwa kobulakusi kano, nabeikhabi abahulila nende okhulonda amakhuwa akahandikwa mushitabu shino. Okhuba ebise biamakhuwa kano koosi okhwikholekha bili ahambi.

⁴Isie Yohana ehandichila tsikanisa musafu etsili mulukongo lwa Asia. Obukoosia nende omulembe bibe khwinywe okhurula khu Nyasaye ouliho owalinjiho, khandi owitsanga nende akarula khutsiroho musafu etsili imbeli weshifumbi shia Nyasaye eshioburuchi,

⁵nende akarula khu Yesu Kristo omuloli omusuubilwa, owambeli okhulamusibwa okhurula mubafu, khandi ouli omuruchi wabaruchi abomushialo. Kristo yakhuheela, ne khulwa okhufwakhwe yakhuhonia okhurula mubwonooni bwefwe.

⁶Khandi nakhukhola abesaaliisi mubwamibwe okhukhalabanila Nyasaye ouli Samwana. Oluyali nende obunyali bibe khu Yesu Kristo ebisoni nebisoni! Amina.

⁷Lole Kristo yetselanga mumaleesi! Buli mundu alamulola, kata nende abo abamufumira. Abandu boosi mushialo balamwikhuula muburi neshisa. Kho kabe kario! Amina.

⁸OMWAMI Nyasaye aboola ari, “Nisie owambeli khandi owokhumalilikha, ouliho, owaliho, oulibaho khandi owobunyali bwosi.”

⁹Nisie Yohana omusiani wenywe, khandi shinga omulondi wa Yesu, endi owashienywe mubwisimilisi bwobusandibwi obwitsanga khwabo abali abomubwamibwe. Ndabohwa mushikhalachinga shia Patimo, okhuba ndali neyaalile likhuwa lia Nyasaye nende obwatoto bwa Yesu Kristo yali nabisule.

¹⁰Roho owa Omwami yali mwisie khunyanga eya Omwami, nimbulila inyuma wanje omwoyo omukhongo

¹¹nikuboola kuri, “handika mushitabu aka ololanga, mana oshirume khutsikanisa musafu tsino; Efeso, Simurina, Perigamo, Tsiatira, Saride, Filadelefia nende Laodikia.”

¹²Olwa ndashiukhana okhulola owali naboolanga, ndalola ebichibi bietsitaha bieitsahabu musafu.

¹³Hakari webichibi bietsitaha ebio yaliho omundu owafwana Omwana omundu; niyefwalile ikanzu eyoola khubilenjebie, niyeboyile omushipi kwetsahabu khushilifushie.

¹⁴Omurwekwe nende liswilie biali ebilafu tsererere shinga ipamba, tsimonitsie tsiang'ang'a shinga olumemu olwomulilo.

¹⁵Ebilenjebie biang'ang'a shinga eshibia eshisambilwe mwirumbi, nakwo omwoyokwe kwakukuma shinga amarunda akomunyanza.

¹⁶Ne yali nende tsing'ining'ini musafu mumukhonokwe omusaatsa; nalwo olukanga olumemu tsimbeka tsibili lwarula mumunwakwe. Obwenibwe bwang'ang'a shinga eliuba liomushiteere.

¹⁷Ne olwa ndamulola ndakwa mumakuluke shinga omundu oufwiile. Yaarakhwo omukhonokwe omusaatsa naboola ari, “Shiolaria ta! Nisie owambeli khandi owokhumalilikha.

¹⁸Nisie ouliho mwoyo! Ndali nindafwa, ne lola, bulano endiho mwoyo inziayo. Endi nende obunyali khwifwa nende mushialo eshia abemakombe.

¹⁹Bulano handika amakhuwa aka olola, akaliho nende akalilolekha olunyuma.

²⁰Eshisina shielibiso lietsing'ining'ini musafu etsioluutsi nindi ninatsio mumukhono kwanje omusaatsa, nende ebichibi bietsitaha musafu bieitsahabu njieshino mbu, tsing'ining'ini musafu nibo abamalaika betsikanisa musafu, nabio ebichibi musafu nibio tsikanisa musafu.”