Read wanga OBUFWIMBULI 10 Bible Online

OBUFWIMBULI 10 - wanga bible

OBUFWIMBULI 10

¹Mana nindola omumalaika oundi owamaani niyekhanga okhurula mwikulu. Yali niyeboyile mwileesi nali nolulindi khumurwekwe, ne obwenibwe bwakha shinga eliuba, nabio ebilenjebie nibing'inang'ina shinga tsisilo etsiomulilo.

²Yali nende eshitabu eshikanye nishibaambulwe mumukhonokwe. Ne naseena eshilenjeshie eshisaatsa khunyanza, ne eshilenjeshie eshikhasi nishisena khushialo.

³Mana nalanjilisia nomwoyo omukhongo, okwahoola shinga omwoyo okwe italanyi. Ne olwa yalanjilisia ario, emikukumo musafu echielikulu nichihulilikha nende okhuhoola okhukali.

⁴Olwa emikukumo echio musafu chiali nichiatulushe, ndali nindi ahambi okhuhandika, nebutswa nimbulila omwoyo okhurula mwikulu nikumboolela kuri, “Bisa amakhuwa akemikukumo musafu echio chirumbule; ne khandi olakahandika tawe!”

⁵Mana omumalaika owandalola nasinjiile khunyanza nokhushialo yachinguula omukhonokwe omusaatsa mwikulu,

⁶mana niyetsuba muliira lia Nyasaye, oumenyanga ebisoni nebisoni, owalonga likulu, nende biosi ebilimwo, eshialo nende ebilimwo, neinyanza nende ebilimwo mbu, “Okhushinda shikhulabakhwoho khandi ta!

⁷Nebutswa lwomumalaika owamusafu alikhupa olwika, nilwo olwa Nyasaye aliusiliamwo lichoomolie eliamabiswi, shinga olwa yarumbula khubakhalabanibe abalakusi.”

⁸Bulano omwoyo okwa ndahulila nikuboolanga okhurula mwikulu nikumboolela khandi kuri, “Tsia mana obukule eshitabu eshikanye oshibaambulwe mumukhono kwomumalaika ousinjiile khunyanza nende khushialo oyo.”

⁹Kho nenzia ewa omumalaika yali mana nimureeba mbu yambelesie eshitabu eshikanye eshititi eshio. Naye niyamboolela ari, “Shibukule oshilie, ne shilaba eshilulu pia mundamwo, nebutswa mumunwamwo shilaba eshimilamilu shinga obuushi.”

¹⁰Ndabukula eshitabu eshikanye eshio okhurula mumukhono omusaatsa kwomumalaika oyo mana neshilia, ne shiali eshimilamilu shinga obuushi mumunwa kwanje. Ne olwa ndashilia shiakalukhana nishiba eshilulu pia munda mwanje.

¹¹Mana ndaboolelwa mbu, “Okhuula khandi arumbule amakhuwa ka Nyasaye khubandu abanji nende khu amahanga nende khu tsinimi nende khubaruchi.”