Read wanga OBUFWIMBULI 11 Bible Online

OBUFWIMBULI 11 - wanga bible

OBUFWIMBULI 11

¹Mana nimbebwa litundu eliokhuchela elifwanana nende omutunga okunyala okhuchela ne nimboolelwa mbu, “Otsie ochele Ihekalu eya Nyasaye nende eshimalilo eshiemisango, mana obale abo abenamilangamwo Nyasaye.

²Nebutswa olachela olwanyi oluli elwanyi owa Ihekalu tawe, shichila luhanilwe khuba Amahanga abalasenachila litookho litakatifu khulwemiesi amakhumi kane nachibili.

³Ne ndalahelesia abaloli banje babili nibefwalile tsingubo tsiamakunia obunyali obwokhurumbula khulwa tsinyanga eshikhumila, ebikhumi bibili namakhumi kasasaba (1,260).”

⁴Abalakusi babili abo nibo Miseituni chibili nende ebichibi bietsitaha bibili ebili imbeli ewa Omwami oweshialo.

⁵Ne omundu yesi niyakhabanyasia, omulilo kularula muminwa chiabwe nikusamba abasuku babwe; ne omundu yesi niyakhabanyasia alamalilanwa ario.

⁶Bali nobunyali okhwikala likulu kho mbu ifula ileshe okhukwa olwa baba nibarumbulanga likhuwa lia Nyasaye. Khandi bali nobunyali khusebele etsiamatsi, okhutsikalukhasia tsikwe amatsayi; khandi bali nobunyali okhurerela eshialo amanyasio akahukhane koosi akhandi akhanji shinga olwa abeene benya.

⁷Olwa baba nibakhamala okhurumbula oburume bwabwe obwo, isolo imbalaba eyirula mubwina obwolutuungu yilabalwana. Ne yilabahula mana yibere.

⁸Ne emibili chiabwe chifwile chilasikala mumuhanda okwelitookho likhongo ewa Omwami wabwe yabaambilwa. Ne eliira lielitookho elo mululimi lwebilolelo ni Sodomu, noho Misiri.

⁹Khulwa tsinyanga tsitaru nende inusu, abandu okhurula mubuli tsimbia, tsinimi nende amahanga baliheenga emilambo chiabwe nibalafuchilila mbu chiyabilwe tawe.

¹⁰Ne abamenyanga khushialo balekhoya khulwa okhufwa okhwa abalakusi babili abo. Balekhoya nibahelesania ebihaanwa, shichila abalakusi babili abo bareera amanyasio amanji po khubomushialo.

¹¹Olunyuma olwa tsinyanga etsio tsitaru nenusu omuya okuhaana obulamu kwarula khu Nyasaye nikhwinjila khubo, mana nabo nibasinjila khubilenje biabwe, mana oburi obukhongo nibubatila abo boosi ababalola.

¹²Mana abalakusi babili abo bahulila omwoyo omukhongo okhurula mwikulu nikubaboolela kuri, “Tikulushe mwitse hano!” Nabo nibakulukha mwileesi nibatsia bario mwikulu abasuku babwe nibabarangala tsimoni.

¹³Ne mushise shiene eshio khwaliho okhurenga okhukhongo kweshialo; ne eshitonye eshiekhumi eshielitookho nishisasibwa, ne abandu ebikhumila musafu (7,000) niberwa. Abandi boosi baria ne nibahelesia Nyasaye womwikulu oluyali.

¹⁴Amasila akakhabili kahwele, nebutswa amasila akakhataru kaletsa lwangu!

¹⁵Mana omumalaika owomusafu nakhupa itarumbetaye mana oluyoka olukhongo niluhulilikha okhurula mwikulu niluboola luri, “Obwami bwokhuruka khushialo nobwa Omwami wefwe nende Kristowe, naye alaruka ebisoni nebisoni!”

¹⁶Mana abakofu amakhumi kabili nabane abo abekhalaanga khubifumbi ebioburuchi bwabwe imbeli wa Nyasaye nibenama hasi nibamwinamila Nyasaye,

¹⁷nibaboola bari: “Khukhupila orio Nyasaye Owobunyali Bwosi, oubetsangaho khandi owalinjiho! Shichila mbu, omalile okhubukula obunyalibwo obukhongo nochaaka okhuruka!

¹⁸Abamahanga batiililwe oburuma, shichila ebise ebielirumalio biulile, ebise ebiabafu balakhalachilwa eshiina. Ebise bimalile okhuula ebia iwe okhurunga abakhalabanibo, abalakusi, nende abandubo boosi, boosi abakhuriitsanga iwe, abakhongo nabatuutu nashilala. Ebise biulile ebiokhumululilamwo abo abasasiinjia eshialo!”

¹⁹Ihekalu eya Nyasaye eyili mwikulu yekulwa, ne lisanduku elie indakanoye nalio nililolekhamwo. Mana nibibaho tsimbenu, amayoosi nende okhukukuma khwelikulu, okhurenga okhweshialo, nende okhukwa okhukhongo okhwamachina akeifula.