Read wanga OBUFWIMBULI 12 Bible Online

OBUFWIMBULI 12 - wanga bible

OBUFWIMBULI 12

¹Mana eshilolelo eshikhongo eshiamakana nishilolekha mwikulu. Shiali omukhasi, niyefwalile eliuba, ne omwesi nikuli hasi wamakuluke, ne khandi khumurwekwe niyefwalile olusimbi olwalikhwo tsing'ining'ini ekhumi natsibili.

²Yali nali ahambi okhwibula, ne obutsunwi nende obululu obweyinumwa eyokhwibula biamukhola okhwayula obutinyu.

³Eshilolelo shindi eshikhongo eshiamakana shialolekha mwikulu. Kwaliho okuyokha okukhongo okwakhanyu okwemirwe musafu nende tsinzika ekhumi nende olusimbi khubuli murwe kwakwo.

⁴Omushila kwakwo kweya eshitonye eshiakhataru eshietsing'ining'ini tsiomwikulu nikutsisukuna hasi khushialo. Ne kwali nikusinjiile imbeli ewa omukhasi oyo, kho mbu kulie omwana owomukhasi oyo lwangu lwayebulwa.

⁵Mana omukhasi oyo niyebula omwana omusiani, ouliruka amahanga koosi nende indabushi yeshibia, nebutswa omwana oyo yayulwa bwangu nayilwa ewa Nyasaye nende khushifumbi shishie eshioburuchi.

⁶Omukhasi naye niyelukha natsia mushitsiimi, habundu aha Nyasaye yali namukasiliye okhumenya, aha yalisilibwa tsinyanga eshikhumila nebikhumi bibili namakhumi kasasaba (1,260).

⁷Mana lihe nilichaaka mwikulu. Mikaeli nende abamalaikabe nibaseera okhwirana nokuyokha nende abamalaika bakwo, niberana ninabo;

⁸nebutswa okuyokha nikuhulwa mana abamalaika bakwo nibalafuchililwa okhumenya mwikulu khandi tawe.

⁹Okuyokha okwo okukhongo nikusukunwa hasi, nikwo okuyokha kwakhale kulia, okulaangwa mbu, Eshishieno, noho Setani omubatsa oweshialo shiosi. Kwasukuwa hasi khushialo, halala nende abamalaika bakwo abakwali ninabo boosi.

¹⁰Mana ndahulila omwoyo omukhongo nikurula mwikulu nikuboola kuri, “Bulano obuhonia, obunyali, nende obwami bwa Nyasaye wefwe, nende obunyali bwa Kristo bulile okhuba omwinjilili wabaana befwe yakhasukunwa hasi oubenjililanga eshiteere neshilo imbeli wa Nyasaye wefwe.

¹¹Abaana befwe bamuhulile mubulwani khulwamatsayi aka Eshimeme nende likhuwa eliobuloli bwabwe okhubela shibaheela obulamu bwabwe ta okhuula okhufwa.

¹²Wikhoye iwe Likulu nende inywe mwesi abamenyangamwo! Nebutswa kalitukhana amasila khushialo nende khunyanza! Shichila Setani amalile okhwitsa khwinywe, ne ali noburuma obunji shichila amanyile mbu, ashilikhwo butswa nebise bitiiti.”

¹³Ne lwokuyokha okwo kwalola mbu kusukunwe hasi khushialo, nikuchaaka okhulondachilila omukhasi oyo, owali niyebule omwana omusiani.

¹⁴Nebutswa omukhasi oyo yahebwa tsimbaha tsibili etsieindutsu ikhongo kho mbu anyale okhupulukha okhurula khukuyokha okwo okhutsia mushitsiimi, aha alalisibwa khulwemiyika chitaru nende inusu.

¹⁵Mana okuyokha okwo nikusundula amaatsi akomuyembo okhurula mumunwa mwakwo mbu kalondachilile omukhasi oyo, kho mbu kamwire.

¹⁶Nebutswa eshialo shahabina omukhasi oyo, shiasama omunwa kwashio nishinywa amaatsi ako, akali nikarulile mumunwa okwokuyokha okwo.

¹⁷Okuyokha okwo kwatiilila omukhasi oyo oburuma nikurulaho nikuchaaka okhuseera aba olwibulo lwomukhasi oyo, abali nibatonyile boosi. Boosi abalondanga amalako aka Nyasaye khandi bali abasuubilwa khukatoto akafwimbulwa nende Yesu.

¹⁸Ne okuyokha nikusinjila khulukuku khweinyanza.