Read wanga OBUFWIMBULI 13 Bible Online

OBUFWIMBULI 13 - wanga bible

OBUFWIMBULI 13

¹Mana nindola isolo imbalaba niyirulanga munyanza. Yali nemirwe musafu netsinzika ekhumi; ne buli khulwika lwalikhwo nende eshimwata. Ne buli khumurwe kwalikhwo neliira eliamanyeko khu Nyasaye.

²Isolo yandalola yafwana shinga ingwe, ebilenje biayo shinga ebielinani omunwa kwayo shinga kweyitalanyi. Okuyokha nikuhelesia isolo eyo obunyali bwakwo, neshifumbi shiakwo ehioburuchi, nende obunyali obukhongo.

³Mulala khumirwe chieisolo eyo kwalolekhana okhuba nolukuma nebutswa olukuma lwako lwahonibwa. Mana eshialo shiosi nishihuchisibwa nende okhukulondakhwo.

⁴Abandu boosi benamila okuyokha shichila kwali nikuheele obunyali bwakwo isolo, khandi nibenamila isolo nibaboola bari: “Niwiina ouli shinga isolo yino? Khandi niwiina ounyala okhuchilwana?”

⁵Okusolo okwo kwahebwa omunwa okhusunganga amakhuwa amakhongo akobunyechi khu Nyasaye, kwafuchililwa okhuruka kulwa emiesi amakhumi kane nende chibili.

⁶Okusolo okwo nikwasama omunwa kwakwo okhunyeka Nyasaye nende eliiralie, nende ahayamenya nende abo boosi abamenyanga mwikulu.

⁷Khandi kwafuchililwa okhulwana abatakatifu aba Nyasaye nokhubahula, ne kwahebwa obunyali khubuli oluyia, nende abandu nende olulimi nende lihanga;

⁸ne abandu boosi abamenyanga khushialo balakwinamila, Okhurusiakhwo abo abameera kabwe kahandikwa okhuchaaka khweshialo khulashiabaho ta, mushitabu shiobulamu eshia Eshimeme eshielikondi owerwa.

⁹Omundu ouli neshirwi, lekha ahulile!

¹⁰Omundu yesi oukhoyele okhuhambwa alahaambwa; omundu yesi owiira nolukanga yerwe nolukanga. Hano niho aha obwifwili nobusuubili bwabatakatifu bwenyelungwa.

¹¹Mana ndalola okusolo kundi okwarula mwiloba. Kwali nende tsinzika tsibili shinga etsieshimeeme shielikondi, ne kwaboola shinga okuyokha.

¹²Okusolo okwo nikuruka mushilenje shiokusolo okwaranjilila, nakwo mana nikukhola eshialo nende ebimenyelemwo okhwinamila okusolo okwambeli, okwa likonzo liakwo liali nilihonile.

¹³Okusolo kwakhabili okwo kukholanga ebilolelo ebikhongo; kata okhukhola omulilo omukhongo kwishe khushialo okhurula mwikulu mumoni tsiabandu.

¹⁴Ne khulwa ebilolelo ebio, kwafuchililwa okhukhola imbeli wokusolo kwambeli, okusolo okwakhabili okwo, kwakatia abamenyanga khushialo nikubanichilisia okhukasilia eshifwanani okusolo kwali nikuremerwe nolukanga, nebutswa nikulafwa ta.

¹⁵Mana okusolo kwakhabili okwo nikufuchililwa okhuheela omuya mushifwanani shiokusolo kwambeli, kho mbu shinyale kata okhuboola nende khandi okhwira boosi abaloba okhwinamila eshifwanani shiako.

¹⁶Khandi kwanichilisia buli mundu omutiiti nende omukhongo, omuyinda nende omumanani, boosi abasumba nabebule, barebwekhwo eshilolelo khumikhono chiabwe emisaatsa noho khubweni bwabwe.

¹⁷Abulaho oufuchililwa okhukula kata okhukusia nalali neshibalikho eshio, elili eliira elia okusolo okwo, noho inukuta eyeliira liakwo.

¹⁸Lino likhoyele obuchesi. Lekha omundu ouli nobumanyilisi amanyilisie eshisina shia isabu yokusolo okwo, okhuba isabu eyo niyinukuta yomundu, inukuta yene nebikhumi bisasaba amakhumi kasasaba nende tsisasaba (666).