Read wanga OBUFWIMBULI 14 Bible Online

OBUFWIMBULI 14 - wanga bible

OBUFWIMBULI 14

¹Mana ndahenga nindola imbeli wanje, Eshimeme shielikondi nasinjiile khushikulu shia Zayuni, yali nende abandu ebikhumila eshikhumi namakhumi kane nende bine (144,000), abali abahandikwa khubweni bwabwe eliiralie, nende elia Samwana.

²Mana nembulila omwoyo okhurula mwikulu okwahulilikha shinga okhuhoola kwamaatsi amanji, khandi shinga okhwatulukha khwelikulu. Omwoyo okwa ndahulila kwali shinga amayoosi ka abakhupi bamatungu.

³Mana abandu ebikhumila abo, nibemba olwimbo oluyiakha imbeli weshifumbi shiobwami nende imbeli webilonje bine ebilamu, nende abakofu; ne abulaho owakhanyalile okhweka olwimbo olo, okhurusiakhwo abo ebikhumila eshikhumi namakhumi kane nende bine (144,000) abali nibahonokosibwe okhurula mushialo.

⁴Bano nibo abandu abaleyenoonia nokhuba nabakhasi ta, shichila nabashisilia. Bano nibo abalondanga Eshimeme hosi hosi aha yatsitsanga. Abeene bano nibo abahonibwa okhurula mumbia tsiosi etsiabandu shinga ebichese biambeli[5] biambeli ebia Nyasaye nende Eshimeme.

⁵Ne muminwa chiabwe obubeeyi shibwanyolekhakhwomwo ta, shichila bahuma eshikha.

⁶Mana nindola omumalaika oundi napulukhanga mulwanga, narumbulilanga abamenya khushialo, khubuli lihanga nende oluyia, buli khululimi nende khubuli bandu Injiili yobumeli.

⁷Kho naboola nomwoyo omukhongo ari, “Murie Nyasaye khandi mumuhelesie oluyali, shichila eshise shiobuyaasibwi shiulile; khandi mumwitsoomie ye owalonga likulu nende eshialo, inyanza nende ebinoko biamatsi!”

⁸Omumalaika undi owakhabili yalonda khuwambeli naboolanga mbu “Likwile! Babuloni litookho likhongo likwile! Nilio elianywesia amahanga koosi idivai indulu eyobwikombi obwobwilaasi!”

⁹Mana omumalaika undi wakhataru yalonda babili abo naboola nomwoyo omukhongo ari, “Omundu yesi niyenamila okusolo neshifwanani shiakwo ne nabalikhwa eshibalikho khubwenibwe noho khumukhonokwe,

¹⁰yesi okhuula alanywa idivai yoburuma obwa Nyasaye, eyitsushilwe mushikombe shioburuma obwa Nyasaye niyilatsokasibwemwo eshindu shiosi ta. Ne alanyasibwa mumulilo nende mubunoro obusambanga imbeli wabamalaika abatakatifu nende imbeli weshimeeme.

¹¹Omwosi kwomulilo kusambanga kutumukhanga inziayo. Eshiteere neshilo; obuhulushi bubulaho kwabo abenamilanga okusolokwo nende eshifwanani shiakwo, nende yesi owarebwakhwo eshibalikho shieliira eliokusolo okwo.”

¹²Hano niho ewa omulango kuli kwobwisumilisi bwabandu abatakatifu, abo abahulilanga amalako aka Nyasaye nende obusuubili obwa Yesu.

¹³Mana nembulila omwoyo nikurula mwikulu nikuboola kuri: “Handika kano! Nabeikhabi abafu abafwila mu Omwami okhurula olwa leelo.” “Nabeikhabi po. Roho aboola ario, mbu banyala okhuhuluukha okhurula khumilimo chiabwe, shichila ebikhole biabwe bilabalondakhwo!”

¹⁴Mana ndahenga, ne nindola lileesi lilafu, ne owali niyekhaale khulio yafwana shinga Omwana womundu, nali nolusimbi lweitsahabu khumurwe, nende injeso yimemu mumukhonokwe.

¹⁵Mana omumalaika undi narula muhekalu naboolanga nomwoyo omukhongo khu owali niyekhaale khwileesi ari, “Chaka okhuchesa neinjeso yiyio, shichila ebise bielichesa biulile, okhubela lichesa lieshialo lilabile liosi!”

¹⁶Kho ulia owali niyekhaale khwileesi nahutsa injesoye khushialo mana eshialo nishicheswa.

¹⁷Mana omumalaika undi khandi narula muhekalu mwikulu khandi yesi yali neinjeso imemu.

¹⁸Habwenaho omumalaika undi niyetsa okhurula khushimalilo shiemisango, ouli nobunyali khumulilo, ne nalanga nomwoyo omukhongo, owali neinjeso imemu ari, “Chaka okhuchesa neinjeso yiyio shichila emitsabibu chienjile muno.”

¹⁹Kho omumalaika oyo nahutsa injeso khushialo, nende okhukhung'asia okusakanya kwemitsabibu chiokhushialo nende okhukusukuna mushitiinyilo shioburuma bwa Nyasaye.

²⁰Mana eshitinyiilo eshia idivai eshio nishitinyilwa elwanyi welitookho, ne amatsayi karaatsa okhurula mushitiinyilo eshio kayemba obwinikhu bwahela ahambi imita ndala neinusu, nabwo oburambi bwomukhula kwako bwahela tsikilomita ebikhumi bitaru.