Read wanga OBUFWIMBULI 16 Bible Online

OBUFWIMBULI 16 - wanga bible

OBUFWIMBULI 16

¹Mana ndahulila omwoyo omukhongo okhurula muhekalu nikuboolelanga abamalaika abo musafu kuri, “Tsie musundule khushialo ebikaye ebio musafu ebioburuma obwa Nyasaye.”

²Kho omumalaika owambeli yatsia nasundula eshikayeshie khushialo. Amakonzo akahunya obubolo niketsa khu bandu abalikhwo eshibalikho shiokusolo khandi nibenamilanga eshifwanani shiakwo.

³Naye omumalaika owakhabili nasundula eshikaye munyanza, ne inyanza niyikwa shinga amalasile akomundu oufwile, mana buli shindu shiobulamu eshiali munyanza nishifwa.

⁴Omumalaika owakhataru nasundula eshikayeshie khumialo nende mubinoko ebia amaatsi, mana amaatsi kabio nikekhola amalasile.

⁵Ne nimbulila omumalaika oulindanga amaatsi naboola ari, “Obukhalachibwo nobwahabwene, iwe omutakatifu, ouliho khandi owaliho!

⁶Shichila abandu baratsiye amalasile akabatakatifu nende abalakusi, nawe obahelesie amalasile mbu banywe niko akabakwanile!”

⁷Mana nimbulila omwoyo nikurula hashimalilo shiemisango nikuboola kuri, “Iwe OMWAMI Nyasaye ounyala biosi! Obukhalachibwo nobwatoto khandi nobulunji!”

⁸Mana omumalaika owakhane nasundula eshikayeshie khuliuba ne nilifuchililwa okhusamba abandu obululu nomulilo kwalio.

⁹Abandu nibasambwa nomulilo omululu, mana nabo nibanyeka eliira lia Nyasaye, ouli nobunyali khumanyasio, shibayekalukhasia okhurula mubwonooni biabwe nende okhumuhelesia Nyasaye oluyali ta.

¹⁰Omumalaika owakharano nasundula eshikayeshie khushifumbi eshioburuchi eshiokusolo okwo. Mana obwami bwakwo nibuba mushiilima. Mana abandu nibeluma tsinimi tsiabwe khulwa obutsunwi

¹¹nende okhunyeka Nyasaye womwikulu khulwobutsunwi bwamakonzo kabwe. Nebutswa shibayekalukhasia okhulekha ebikhole biabwe ebibi tawe.

¹²Omumalaika owakhasasaba nasundula eshikayeshie khumwalo omukhongo okwa Yufurate, mana amaatsi kakwo nikakhama khamu, khulwa okhukasilia abaruchi abebukwe injila.

¹³Mana nindola tsiroho etsieshifwabwi tsitaru etsiafwana shinga amashele, nitsirulanga ndala mumunwa okwa okuyokha, eyindi mumunwa mwokusolo okwo, ne eyindi mumunwa mwa omulakusi omubeeyi.

¹⁴Etsio nitsio tsiroho etsiebishieno etsikholanga ebilolelo, etsitsitsanga khubaruchi beshialo shiosi okhubakhung'asia khulwa lihe khunyanga ikhongo ya Nyasaye ounyala biosi.

¹⁵“Lola, ndilitsa shinga omwifi! Noweikhabi ouli meeso, oubikhanga ebifwalobie, kho mbu aleshe okhufimbulwa okhuchenda eshiechenye. Mana afimbwe omurwe mubandu!”

¹⁶Kho tsiroho etsio nitsikhuung'asia abaruchi abo halala habundu aha langwa Muluheburania, mbu Arimagedoni.

¹⁷Omumalaika owamusafu nasundula eshikayeshie mumuya. Omwoyo omukhongo nikurula muhekalu khushifumbi eshioburuchi, nikuboola kuri, “Kakholilwe.”

¹⁸Mana tsimbenu nitsihenukha, Amayoosi nikahulikha, okhwatulukha okhwelikulu nende okhurenga okhukhongo khweshialo, okhwali nikhushili okhubakhwoho okhurula abandu nibaba khushialo. Okhurenga okhwo khwali okhukhongo muno.

¹⁹Litookho likhongo liarwa ebitonye bitaru, ne amatookho kakwisibwa, mana Nyasaye niyetsulila Babuloni likhongo, okhulikhola okhunywela elala shikombe shioburumabwe.

²⁰Ne buli lichinga liakhamukha, ebikulu biosi biakhamuukha;

²¹amachina amakhongo akeifula amasiro, buli elala elihela shinga tsikilo amakhumi karano nikakwa khubandu okhurula mwikulu. Nabo abandu nibanyeka Nyasaye khulwa eshinyasio eshio, shichila shiali eshiokhurisia muno.