Read wanga OBUFWIMBULI 17 Bible Online

OBUFWIMBULI 17 - wanga bible

OBUFWIMBULI 17

¹Mana mulala khubamalaika abo musafu abali nebikaye musafu yetsa khwisie nende okhumboolela ari, “Yitsa ne ndalakhumanyia obuyaasibwi obwo mutamba omukhongo, owikhale mwitookho eliombakhwa ahambi khumialo echietsimbia tsinyinji. (Nilio litookho lia Babuloni.)

²Ne niye owabaruchi beshialo abayilananga ninaye; abandu abamenyanga khushialo bameela khulwa okhunywa idivai yobutambabwe.”

³Kho Roho niyanzinjilamwo ne omumalaika niyanjinga niyayila ehale mushitsiimi. Mana nindola omukhasi niyekhaale khukusolo okwakhanyu pa, okwali nikwitsulekhwo ameera akanyekanga Nyasaye. Okusolo okwo kwali nemirwe musafu nende tsinzika ekhumi.

⁴Omukhasi oyo yali niyesiayile mubifwalo ebiobukondo obweyisambarau, nende obwakhanyu pa, khandi yali niyesiayile ebimili ebietsahabu, tsinyuma etsiobukusi obutinyu, nende tsilulu. Mumukhonokwe yali natilile eshikombe eshietsahabu nishitsulemwo ebisinyo nende ebindu ebimayanu ebiobuyilanibwe.

⁵Ne khubwenibwe eliira liali nilihandikwe liali eliamabiswi mbu, “Babuloni omukhongo, nyinamwana abatamba boosi nende eshinoko eshiamasinyo akomushialo koosi.”

⁶Ne khandi ndalola mbu omukhasi oyo yali nameelile amatsayi akabatakatifu, nende akabo abeerwa shichila bali abasuubilwa nibarumbula akobuloli khu Yesu. Olwa ndamulola ndahuka muno.

⁷Omumalaika oyo niyareeba ari, “Oukanga khulwashina? Ndalakhuboolela eshisina shiamabiswi eshiomukhasi oyo nende okusolo okuhalaba okomuchinjile okwo, okuli nemirwe musafu nende tsinzika ekhumi.

⁸Ne okusolo okuhalaba okwa olutsi okwo, kwali okulamu, ne bulano shikuli okulamu ta. Khandi kuli ahambi okhurula mulutungu emakombe, ne kulatsia butswa okhusishibwa. Ne abandu abamenyanga khushialo, aba ameera kabwe kashili okhuhandikwa mushitabu eshiobulamu okhurula khubusimikhwi obweshialo ta, boosi balihuka olwa balilola okusolo okuhalaba okwo, shichila kwaliho ne shikuliho ta, nebutswa nakuloleshe khandi.

⁹“Kano kakhoyeele obuchesi nende obumanyilisi. Emirwe echio musafu nibio ebikulu musafu ebiomukhasi oyo yekhalangakhwo, nibo khandi abaruchi musafu.

¹⁰Aba barano khubo bamalile okhukwa mulala niye oushirukanga.

¹¹Ne okusolo okuhalaba okwo okwaliho ne shikuliho ta, ni kulala khubatsia okhusishibwa nende abo abaruchi musafu.

¹²“Ne tsinzika etsio ekhumi etsioluutsi nibo abaruchi ekhumi abashili okhunyoola obunyali obwoburuchi, nabo balahebwa obunyali shinga abaruchi khulwa isa ndala halala nende okusolo.

¹³Bano bali nobuchesi bulala, ne bahaana amaani kabwe nobunyali khukusolo okwo.

¹⁴Ne balabusia lihe okhuseera Eshimeme eshielikondi; nebutswa Eshimeme eshielikondi, alabahula shichila Eshimeme niye omwami owabami khandi omuruchi wabaruchi, ne abali ninaye nabalaangwa, abahulwa khandi abasuubilwa.”

¹⁵Ne omumalaika oyo niyamboolela mbu, “Amaatsi akoluutsi ako, ewa omutamba oyo yekhale niko abandu, emikanda echia abandu, namahanga nende tsinimi.

¹⁶Ne tsinzika ekhumi tsiolutsi; halala nende okusolo okwo bilamusila omutamba oyo; balamunuula ebindubie biosi nibamulekha eshiechenye; balalia inyama eyomubilikwe nende okhumusamba nomulilo.

¹⁷Shichila Nyasaye alireere mumioyo chiabwe okhukhola lichoomolie khulwa okhuba nobuchesi bulala nende okhuhelesia obunyali bwoburuchi bwabwe okusolo okwo okhuula olwa amakhuwa ka Nyasaye kakhabe nikosibwe.

¹⁸“Naye omukhasi owa walola, niye litookho likhongo elili nobunyali oburukanga abaruchi abomushialo.”