Read wanga OBUFWIMBULI 18 Bible Online

OBUFWIMBULI 18 - wanga bible

OBUFWIMBULI 18

¹Olunyuma lwakano ndalola omumalaika undi niyekhanga hasi okhurula mwikulu, nali nobunyali obukhongo. Ne eshialo shiosi shiang'ang'asibwa nobulafu bwoluyalilwe.

²Mana nalanjilisia nomwoyo omukhongo ari, “Likwile! Elikwile ni Babuloni litookho likhongo! Likholile eshimenyo eshiebishieno, khandi ahashienwa khubuli iroho yeshifwabwi khubuli bubolo nende buli linyonyi liasilwa.

³Shichila Amahanga koosi kanywele idivai yalio eyobwikombi bwobwilaasi. Khandi abaruchi beshialo bayilana ninaye, khandi abakholi bobukhala bokhushialo nabo bayindalile khulwa obunji bwobwilaasi bwalio.”

⁴Khandi ndahulila omwoyo kundi okhurula mwikulu nikuboola kuri, “Rule mwitookho abandu banje! Muleshe okhusanga mubwonooni biabwe, muleshe okhusanga mushinyasio shilala ninaye.

⁵Shichila obwonooni bibie bichelekhaane okhuula mwikulu, mana Nyasaye yetsulile tsimbi tsitsie etsiobushiamu.

⁶Mumukalusilie butswa akenako shinga aka yamukholela; khandi mumurunje khandi khabili ako akayakhola. Mumutsokasilie akhandi khabili obunyakhani mushikombe eshia yamutsokasilia.

⁷Shinga olwa yeyitsoomia niyeyichinguula oluyali nende okhwihelesia emienya kho mumuhelesie eshichelo eshihela shirio eshiobunyakhani nende okhwikhuula khulala khurio. Okhuba yeyitsoominjia omwene mumwoyo kukwe mbu, ‘Esie enzikhala shinga omukhaye omuruchi, shiendi omukhasi omulekhwa ta, okhuula shindilikhuulakhwo tawe!’

⁸Kho khulwa kano amanyasioke kaletsa khunyanga ndala mbu olumbe, okhwikhuula nende inzala; khandi alasambilwa elala nomulilo, shichila OMWAMI Nyasaye oumukhalachilanga eshiina nowobunyali.”

⁹Nabo abaruchi abeshialo abayilananga ninaye, nibamenya mumienya ninaye bakhalile nibekhula olwa balilola omwosi okuliba nikutumukhanga okhurula khumemu etsiomulilo nikumusaambanga.

¹⁰Balisinjila ehale nibarile obunyakhani bubwe, nende okhuhuka bari, “Wowe! Wowe! Iwe Babuloni litookho likhongo, khandi eliamaani obuyaasibwibwo bwitsile butswa khusaa ndala!”

¹¹Ne nabo abakhala bomushialo balila nibakhwikhula, shichila abulaho oushikulanga emiandu chiabwe tawe;

¹²emiandu echie itsahabu, ifetsa, amachina kobukusi obutinyu, nende ebiuma biobukusi; tsingubo etsiekitani tsindorotoro, etsieisambarau, etsieilasi nende tsinzakhanyu, kata ebindu biosi ebikasibwa khutsimbao etsilang'ayile ta, nende ebindu biosi ebikasibungwa khumeeno aketsinzofu, khandi tsimbao etsiobukusi obutinyu, ebiraanywa, ebiemikasa, ebieshibia nende ebibaatswa ebiamachina amalafu.

¹³Halala nende obuhoni obwemikombela, ebiluunjilo, amalesi akelibuliesi, amafura akeshing'ari nende obubane; idivai nende amafura, obusie obunyushe neyingano netsing'ombe, namakondi, netsifarasi, namakaari ketsifarasi, abasumba, kata nende obulamu bwabandu.

¹⁴Abakholi abeinganga bamuboolela bari, “Ebiamo biosi ebiomwoyokwo kwikoombanga bikhurulilekhwo, kata obuyindabwo nende oluyalilwo biakhamulukha, ne shiolibinyoola khandi tawe!”

¹⁵Abakhala beene emiandu chino abayindahalila muye, balasinjilila ehale nibarile obutsunwi bubwe. Balilila nende okhwikhuula obutinyu,

¹⁶nibahuka bari, “Wowe! Wowe! Khwiwe litookho likhongo eliefwalanga ebifwalo ebie ikitani indorotoro, ebieisambarau, nende ebiakhanyu, khandi eliesiyanga ebimuli bietsahabu, ebiamachina akobukusi obutinyu nende ebiuma.

¹⁷Mushise shitiiti butswa ebindu bino biosi bimalile okhusasibwa!” Mana abasinjilili abokhuyila tsimeli nende abachingungwa mumeeli, abakholi abomumeli nende abandi boosi abeinganga yokhunyanza, basinjilila ehale,

¹⁸mana nibayula olwa balola omwosi okwetsimemu tsiomulilo okwasamba litookho elo; nibaboola bari, “Ne litookho shiina eliali shinga litookho likhongo lino!”

¹⁹Mana nibepuka olufu khumirwe chiabwe nibekhula nibaboola bari, “Wowe! Wowe! Litookho likhongo ewa boosi abali netsimeeli khunyanga bayindihala! Musaa ndala lisasibwe.”

²⁰Iwe likulu, wikhoye khulwa okhusasibwa khwalio! Abatakatifu nende abarume nende abalakusi mwikhoye! Shichila Nyasaye ahelesiye litookho elo eshinyasio khulwa akayamukholela inywe.

²¹Mana omumalaika owamaani yatoola lichina elingana oluchina olukhongo ne nalifuuba munyanza, naboola ari “Nindio okhuula litookho likhongo Babuloni lilakokwa omunyikha omukhongo okwamani, shilililolekha khandi tawe.

²²Kata amayoosi akobukhana, akelitungu nende kamalelele nende ketsitarumbeta shikalihulilikha mwiwe khandi tawe! Kata omubatsi yesi owobubatsi bwoluyia lwosi shialinyoolekha mwiwe khandi tawe; amayoosi akoluchina shikalahulilikha mwinywe khandi tawe!

²³Kata obulafu obweitaha shibuliakhakhwo khandi mwinywe tawe; kata amayoosi aka mwene shiselelo nende omwehawe shikalihulilikhakhwo mwiwe khandi tawe. Shichila abakhalabo nibo abali abandu abakhongo bomushialo shiosi, ne amahanga koosi kakatibwa nobufumubwo.”

²⁴Ne Babuloni liahebwa eshinyasio khulwa okhubela eshitsayi eshia abalakusi nende eshia abatakatifu shiali mwitookho elo, eshitsayi eshia abo boosi abali nibeerwa khushialo.