Read wanga OBUFWIMBULI 19 Bible Online

OBUFWIMBULI 19 - wanga bible

OBUFWIMBULI 19

¹Olunyuma olwa amakhuwa ako ndahulila eshindu shinga okhuhoola okhwa omukanda omukhongo okwa abandu abali mwikulu nibaboola bari, “OMWAMI Nyasaye Yetsoomibwe! Obuhonia, oluyali nende oburuchi nebia Nyasaye wefwe!

²Shichila obukhalachibwe nobwatoto khandi nobulunji! Yamukhalachile eshiina omutamba omukhongo oyo oubele niyonooninjia eshialo nende obwilaasibwe obwobuyilani. Nyasaye asambishile amatsayi kabakholibe.”

³Nibameeta okhwayula olwa khabili bari, “OMWAMI Nyasaye Yetsoomibwe! Omwosi okurula muye kutumukha nikutsia ikulu ebisoni nebisoni!”

⁴Nabo abakhulundu amakhumi kabili nabane abo nende ebilonje bine ebilimwoyo ebio bakwa hasi nibimwinamila Nyasaye, owali niyekhaale khushifumbi eshioburuchi. Nibaboola bari, “Kabe kario! Nyasaye Yetsoomibwe!”

⁵Mana omwoyo kwarula mushifumbi eshioburuchi nikwayula kuri, “Itsoomie Nyasaye wefwe, Inywe abasumbabe boosi, abakhongo nende abatiiti Inywe abamuritsanga.”

⁶Mana nimbulila eshiahulilikha shinga amayoosi akomukanda omukhongo, khandi shinga okhuhoola okhwamatsi amanji nikasundukhanga hasi okhurula ikulu, khandi shinga okhwatulukha okhukhongo khwelikulu nikhukukumanga nikuuboola kuri “OMWAMI Nyasaye, yetsoomibwe! Okhuba OMWAMI Nyasaye wefwe Owunyala biosi arukanga!

⁷Leshe khwikhoye nikhutsaatsala; leshe khwitsoomie obukhongobwe! Okhuba ebise ebieshiselelo eshie Eshimeme eshielikondi biulile, naye omwehawe wirecheshe.

⁸Yafuchililwa okhuhelesibwa ikitani indorotoro indayi eying'inang'inanga mbu afwale.” (Shichila ikitani indorotoro niyo ebikhole ebiobulunjishi ebiabatakatifu.)

⁹Mana omumalaika oyo niyamboolela ari, “Handika mbu: Nabeikhabi abo abalanjilwe mwisabo elieshiselelo eshia Eshimeme eshielikondi.” Kho omumalaika nameeta niyamboolela ari, “Kano namakhuwa katoto aka Nyasaye.”

¹⁰Nasi ndamala ningwa mafumama mumakuluke okhumwinamila, nebutswa yamboolela ari, “Shiolakhola orio tawe! Endi butswa omukhalabani ninawe khandi owashio ouli nobuloli bwa Yesu, inamila Nyasaye.” Okhuba obuloli obwa Yesu nishio eshihaanwa shia Roho yobulakusi.

¹¹Mana ndalola likulu nilikushe, ne yaliho ifarasi indafu. Ye owali niyekhalekhwo yalangwa mbu, Omwisikwa khandi owabwatieli, ne akhalakanga eshiina nalwana lihe mubulunjishi.

¹²Tsimonitsie tsili shinga olumemu olwomulilo, khandi khumurwekwe khulikhwo eshimwata shietsisimbi tsinjinji. Ne ali neliira eliahandikwa khuye, eliomundu yesi alamanyakhwo ta ahalali ye omwene.

¹³Yefwala ikanzu eyenikhwa mumatsayi yosi. Ne eliira lialangungwa ni, “Likhuwa lia Nyasaye.”

¹⁴Nabo abalwani abobuhe abomwikulu besiayile nibalondokhane, nibaniinile khutsifarasi tsindafu nibefwalile ebifwalo ebieikitani indorotoro, indafu, indayi.

¹⁵Olukanga olumemu lwatsomokha okhurula mumunwakwe nilwo olwa alahulila amahanga. Ne alabaruchila indabushi yeshibia, yetsa okhusenachila tsinzabibu mushitiinyilo eshieidivai eyobululu obwoburuma obwa Nyasaye Ounyala biosi.

¹⁶Khukaanzu yiye nende khwirangolie yali niyahandikwakhwo eliira mbu, “Omuruchi owabaruchi khandi Omwami owabami.”

¹⁷Mana ndalola omumalaika nasinjiile khuliuba, ne nomwoyo omukhongo yalanjilisia amanyonyi akali mulwanga ikulu ari, “Yitse mukhung'anile halala khwisabo likhongo elia Nyasaye.

¹⁸Yitse mulie inyama eyemibili echiabaruchi, echiabasesia abelihe nende, echia abasaatsa bamaani, inyama eyemibili echietsifarasi nende eya abelushilanga khufarasi, inyama eyabandu boosi, eya bosi abasumba kata abalekhuule abakhongo nabatuutu!”

¹⁹Mana ndalola okusolo okuhalaba okwo nende abaruchi abomushialo abo nende abamahe kabwe nibakhung'anile halala mbu baseere lihe owali naniinile khufarasi okhulasana abelihelie.

²⁰Nakwo okusolo okuhalaba okwo kwatiilwa nikubohwa, halala nende omulakusi owobubeeyi owali niyakhola ebilolelo ebiamakana imbeli wokusolo okuhalaba okwo. Mubilolelo ebiamakana ebio yakatilinjiamwo abandu abo abali neshibalikho eshiokusolo okuhalaba okwo nende abo abali nibenamilanga eshifwanani shiokusolo tsana okwo. Okusolo okwo nende omulakusi owobubeeyi oyo, bosi basindikhwa nibali abalamu munyanza eyomulilo eya salulukha shinga ilami.

²¹Abamahe kabwe boosi basinzwa nolukanga lwene olwatsomokha mumunwa okwa oyo owali naniinile khufarasi. Ne amanyonyi koosi nikabotso inyama eyemibili chiabwe nikekura.