Read wanga OBUFWIMBULI 2 Bible Online

OBUFWIMBULI 2 - wanga bible

OBUFWIMBULI 2

¹Handichila omumalaika oweikanisa eyili Efeso ori, “Buno nibwo oburume okhurula khu oyo outiilile tsing'ining'ini musafu mumukhonokwe musaatsa, khandi ouchendanga hakari webichibi bietsitaha musafu bieitsahabu.

²Emanyile shinga olwa mukholanga emilimo namaani, nende okhwisimilisia khwenye. Emanyile shinga olwa mulanyala okhwifwila abonooni ta, nebutswa mwabateemile abo abelanganga mbu nabarume ne nibalali bario ta, mana nimubamanya mbu nababeeyi.

³Muli abesimilisi, mwasandibwa khulwanje, ne shimwafwa omwoyo tawe.

⁴Nebutswa lino nilio elia ndiyiniakana khwinywe; mwalekha obuheeli obwa mwali ninabwo olwambeli.

⁵Mwitsulile bulano ahamwarula nimukora. Mwikalukhasie okhurula mubwonooni, mana mukhole ebikhole bia mwakholanga olwambeli. Ne nimulekalukhasia ta, ndalamwitsila nendikulula eshichibi shienywe shieitaha okhurula mubwikhalo bwashio.

⁶Nebutswa lilayi liamukholanga ndielino mbu, mwasila ebikhole ebimayanu ebia Abanikolai bakholanga, shinga olwa isie siesi ndasila.

⁷“Ouli neshirwi lekha ahulile aka Roho aboolela tsikanisa. Ouhula ndalamuhelesia obunyali bwokhulia khubiamo biomusaala kwobulamu, okuli mumukunda kwa Nyasaye.”

⁸Handichila omumalaika weikanisa eyili Simirina ori, “Buno nibwo oburume oburula khu oyo owambeli khandi owokhumalilikha, owafwa mana nalamukha.

⁹Emanyile amanyakhano kenywe nende obutakha bwenywe, nebutswa toto muli abayinda! Emanyile amakhuwa amabi akabandu abelanganga Abayahudi, ne nibalali Abayahudi ta. Habula nabomukanda kwa Setani.

¹⁰Mularie aka muli ahambi okhunyakhana tawe. Lole Setani ali hambi okhusukuna abandi khwinywe mumbohe, kho mbu muteemwe; khandi khulwa tsinyanga ekhumi mulaba mumatinyu. Mube abasuubili okhuula khukhufwa mana ndalamuhelesia olusimbi lwobulamu.

¹¹“Omundu ouli neshirwi, lekha ahulile aka Roho aboola khutsikanisa. Oyo ouhula shialasalisibwa nelifwa liakhabili tawe.”

¹²Handichila omumalaika weikanisa ya Perigamo ori, “Buno nibwo oburume okhurula khu oyo ouli nende olukanga olumemu tsimbeka tsibili;

¹³Emanyile ewa omenyanga. Habwenaho niho aheshifumbi shioburuchi shia Setani shili. Musuubilanga eliira lianje khandi shimwalekha okhusuubila mwisie ta, kata mutsinyanga tsia Antipa omuloli wanje omusuubilwa, oweerwa mwinywe, aha Setani yamenya.

¹⁴Nebutswa endi nende matiiti aka ndiyiniakana khwinywe mbu: Abandi baliho mwinywe abalondanga amechesio aka Balaamu, owechesia Balaki okhukatilisia Abaisiraeli, kho mbu balie ebiokhulia bikholiilwe omusango khubifwanani, khandi bakhole obwilaasi bwokhuyilana.

¹⁵Ne khandi abandi baliho mwinywe abalondanga amechesio aka Nikolai.

¹⁶Mwikalukhasie okhurula mubwonooni! Nimulakhola murio ta, ndaletsa lwangu okhubalwana nolukanga olurula mumunwa kwanje.

¹⁷“Omundu ouli neshirwi lekha ahulile aka Roho aboola khutsikanisa! Khu oyo ouhula ndalamuhelesia imana[1] eyabiswa. Khandi ndalamuhelesia lichina lilafu eliahandikwakhwo eliira liyia elia omundu yesi alamanyilekhwo ta, habula oyo owalihelesibwa yenyene.

¹⁸“Handichila omumalaika weikanisa eyili Tsiatira ori, ‘Buno nibwo oburume oburula khu Omwana wa Nyasaye ouli netsimoni shinga olumemu lwomulilo, khandi owebilenjebie biang'ang'a shinga eshibia shiomukasa okusaalulwe mumulilo,’ aboola ari,

¹⁹‘Emanyile koosi akamukholanga. Emanyile obuheeli bwenywe, obusuubili bwenywe, obukhalabani bwenywe nende obwisimilisi bwenywe. Emanyile mbu bulano mukholanga obulayi okhushila olwambeli.’

²⁰Nebutswa elia ndiyiniakana khwinywe ndielino mbu; mwinywe mufuchililanga omukhasi mbu Yezebeli owilanganga omulakusi wa Nyasaye khulwa amechesike akakosinjia abandu banje, nabahombelesia okhukhola ebikhole biobuyilani nende okhulia ebiokhulia bihaanilwe khumisango chiebifwanani.

²¹Ndamuhelesia obwiyangu mbu yekalukhasie okhurula mubwonoonibwe naye shiafuchililanga okhwikalukhasia okhurula mubwilasibwe tawe.

²²Lola ndalamurakhwo obulwale obulaba khuye nende khu abo boosi abayilananga ninaye. Ndalabarakhwo amanyakhano amatinyu nibaba nibalekalukhasia okhulekha obwonooni bwabwe ta.

²³Khandi ndalamulula abaanabe, mana tsikanisa tsiosi tsilamanya mbu, nisie oyo oukhabilisinjia amapaaro nende akomumwoyo kwomundu. Ndalarunga buli mulala khwinywe okhuloondana nende ebikholebie.

²⁴“Nebutswa abatong'a mwinywe Tsiatira abalalondanga abamechesio ka Yezebeli ta, abalekha akabandi balanganga mbu amakhuwa amefisu ka Setani; emulaka mbu, shindalarakhwo khwinywe amanyakhano koosi koosi tawe.

²⁵Muhande khu aka muli ninako okhuula olwa nditsa.

²⁶“Omundu yesi ouhula khandi oulumilila mukhukhola amakhuwa kanje okhuula khushihesi, ndalamukhola okhuba nobunyali khubandu bamahanga kandi.

²⁷Naye alakaruka nende indabushi yeshibia nende okhubaarakamwo mubitonye shinga owaraka ebikaye ebialongwa khwitoyi.

²⁸Siesi khandi ndaheebwa obunyali obwo okhurula khu Papa. Khandi ndilimuhelesia eyasulwe yomumabwibwi”

²⁹Omundu ouli neshirwi, lekha ahulile aka Roho aboola khutsikanisa.