Read wanga OBUFWIMBULI 20 Bible Online

OBUFWIMBULI 20 - wanga bible

OBUFWIMBULI 20

¹Mana ndalola omumalaika niyekhanga hasi okhurula mwikulu, natilile olufunguwo olwobwina obwolutuungu nende omunyololo omukhongo mumukhonokwe.

²Natila okuyokha kwatsana okwo, okuyokha kwene okwakhale, nikwo Eshishieno khandi Setani, mana nakuboha nomunyololo khulwemiyika eshikhumila shilala (1,000).

³Khandi omumalaika oyo yakusindikha mubwina obwolutuungu obwo, nakwikalilamwo nasilisia omunwa okwobwina khombu kwakame okhukatilisia amahanga okhuula olwa emiyika echio eshikhumila (1,000) chiakhabe nichihwele. Mana olunyuma lwa yako kulilekhuulwa khulwa eshise shituutu.

⁴Kho nindola ebifumbi ebioburuchi, nende abo abali nibekhalekhwo baheebwa obunyali okhuyasia. Ndalola khandi emioyo echia abo abali nibaremwa emirwe khulwa obuloli bwabwe khu Yesu nende khulwa likhuwa lia Nyasaye. Abo nibo abalali nibenamila okusolo okwo noho eshifwanani shiakwo, kata okhurebwa khubweni bwabwe noho khumikhono chiabwe eshibalikho eshiokusolo okuhalaba okwo tawe. Balamukha khandi nibaruka nende Kristo emiyika eshikhumila shilala (1,000).

⁵(Abafwa bandi boosi shibalamukha tawe okhuula olwa emiyika eshikhumila shilala (1,000) chiali nichihwele.) Khuno nikhwo okhulamusibwa khwambeli okhwabafu.

⁶Noweikhabi khandi nomutakatifu ouliba mumukanda okwa abo abalilamusibwa olwambeli. Okhufwa okhwakhabili khubula obunyali khubo tawe; nebutswa balaba abesaaliisi aba Nyasaye khandi Abakristo ne okhuula baliruka ninaye khulwemiyika eshikhumila shilala (1,000).

⁷Olwa emiyika echio eshikhumila shilala (1,000) chiliba nichihwele, Setani alibohololwa okhurula mumbohe,

⁸ne alirula natsia okhukatia amahanga koosi akali khushialo shiosi, niko, Gogu nende Magogu. Setani alibakhung'asia boosi halala, okhuseera lihe, nabo baliba abanji shinga omuyeshe okwomunyanza.

⁹Balalandaala khushialo shiosi nibamaamila obubambalifu bwosi obweshialo, nibabotokhana ikambi eya abatakatifu tsimbeka tsiosi nende litookho elo lia Nyasaye yaheela. Nebutswa omulilo kwekha okhurula mwikulu nikubamulula boosi.

¹⁰Mana Setani owali nabakatiiye, nasukunwa munyanza yomulilo, eyatsana eyomulilo kwobunoro omwa okusolo okuhalaba okwo nende omulakusi owobubeeyi oyo bali nibasindikhwa; aha balisambungwa eshilo neshiteere khulwebisoni nebisoni.

¹¹Khandi ndalola eshifumbi eshioburuchi eshikhongo eshilafu nende ulia owali niyekhalekhwo. Eshialo nende likulu bielukha nibikhama okhurula imbeliwe ne shibialolekhakhwo khandi ta.

¹²Ne nindola abafwa, bosi abakhongo nabatuutu, nibasinjiile imbeli weshifumbi eshioburuchi. Ebitabu nibibambulwa, khandi eshitabu shindi nishibambulwa eshia abalamu. Abafwa nibakhalachilwa eshiina okhulondana nende akabali nibakhola akali nikahandikwa mubitabu ebio.

¹³Mana inyanza nayo yalekhula abafwa abali muyo. Nabio olufu nende emakombe khandi nibilekhula abafwa abali mubio. Ne boosi nibakhalachilwa eshiina okhulondana nende aka bali nibakhola.

¹⁴Nabio olufu nende emakombe bisukunwa munyanza eyomulilo. Inyanza eyomulilo yino niyo okhufwa okhwakhabili.

¹⁵Ne omundu yesi oweliiralie lilanyolekha niliahandikwa mushitabu eshiobulamu ta, yasukunwa munyanza eyomulilo.