Read wanga OBUFWIMBULI 21 Bible Online

OBUFWIMBULI 21 - wanga bible

OBUFWIMBULI 21

¹Mana ndalola likulu liyia nende eshialo eshiyia. Likulu eliambeli nende eshialo eshiambeli biali nibihweleho, nayo inyanza yali yikhamulushe.

²Kho ndalola litookho litakatifu, Yerusalemu liyia, nilikhanga okhurula mwikulu khu Nyasaye, nilirecheshe obulayi khandi nilikasiye, shinga omweha niyefwalile okhwakanila omusaatsawe.

³Khandi nimbulila omwoyo omukhongo nikuboolanga okhurula mushifumbi eshioburuchi kuri, “Lola eshimenyo eshia Nyasaye shili mubandu! Omwene alamenyanga ninabo; nabo okhuula balabetsanga abandube, ne Nyasaye mwene alabetsanga ninabo, khandi mwene alabetsanga Nyasaye wabwe.

⁴Aleeya amasika koosi mumoni tsiabwe. Ne okhufwa shikhulabaho khandi ta, kata okhwikhuula kata okhulila kata okhutsunwa shibilabaho tawe. Shichila ebindu ebiambeli ebio bulano bihweleho.”

⁵Ne ulia owekhala khushifumbi shioburuchi yaboola ari; “Lola engasia ebindu biosi okhuba ebiyakha!” Niyambolela khandi mbu, “Handika kano, shichila amakhuwa kano nakakhoyeele okhusuubilwa khandi nakatoto.”

⁶Ne naboola ari, “Kahwele! Nisie Alfa khandi Omega, eshisina mbu owokhuranga khandi owokhumalilikha. Khu abobuloho bulia ndalabahelesia amaatsi okhurula mushinoko shia amaatsi kobulamu nibalarungakhwo eshindu ta.

⁷Ulia yesi ouhula alalamilwa obulaame, khandi ndalabetsanga Nyasayewe, naye okhuula alabetsanga omwana wanje.

⁸Nebutswa khu abo abari, abakhobi, abeshisinyo, aberi, abayilani, abafumu, abenamilinga ebifwanani, ababeeyi boosi obwikhalo bwabwe buli munyanza eyakhanga omulilo nobunoro okhwo nikhwo, okhuliba okhufwa okhwakhabili.”

⁹Mana mulala khubamalaika abo musafu abali nebikaye musafu nibitsulemwo ebinyasio ebihelelesia musafu yetsa niyamboolela ari, “Yitsa ne ndalakhumanyia omweha, omukhasi owa Eshimeme eshielikondi.”

¹⁰Ne mu Roho niyambukula, niyanjinga okhumbila khubutenje obweshikulu eshiraambi. Niyamanyia Yerusalemu, Litookho Litakatifu, nilikhanga okhurula mwikulu khu Nyasaye.

¹¹Ne niling'inang'ina noluyali lwa Nyasaye. Obung'inang'inu bwelitookho elo bwali shinga amachina akobukusi obutinyu, shinga lichina liayasepi elieleleshe shinga eshiho.

¹²Liali nelisisi likhongo lirambi nende ebiliibwa ekhumi nabibili nende abamalaika ekhumi nababili nibalindanga ebiliibwa ebio. Ne khubiliibwa ebio biali nibiahandikwakhwo ameera aketsimbia ekhumi natsibili etsia Abaisiraeli.

¹³Ebukwe ebiliibwa bitaru emulambo ebiliibwa bitaru, ebemasaba ebiliibwa bitaru ne mumbo ebiliibwa bitaru.

¹⁴Amasisi kelitookho elo kombakhwa khumushinji okwamachina ekhumi nakabili akahandikwakhwo ameera akabarume ekhumi nababili aba Eshimeme eshielikondi.

¹⁵Ne Omumalaika owali naboolanga ninasi oyo yali nende eshipimo sheitsahabu eshiayenya okhupiimila litookho, ebiliibwa bialio nende lisisi lialio.

¹⁶Litookho elo tsimbeka tsialio tsiosi tsine tsiahelana obulayi oburambi nende obuchikha burio. Omumalaika oyo yachela litookho elo nende eshipimoshie eshio: liali etsikilomita ebikhumila bibili nebikhume bine (2,400), oburambi nibuhelana nobuchikha.

¹⁷Omumalaika oyo khandi yachela lisisi, ne liali etsimita amakhumi kasasaba (60) okhutsia ikulu, okhuheela khushichelo eshihelana eshiobupimi eshiayali narumishilanga.

¹⁸Lisisi liombashilwa amachina kayasipa, nelitookho liene liakasilibwa itsahabu inzeleleshe, eyalolekha shinga eshiho eshieleleshe.

¹⁹Omusinji okwelisisi elielitookho liene elo kwali nikwasiywa namachina akahukhane akobukusi. Lichina eliambeli eliomusinji liali eliayasipa, eliakhabili liali elieisapiri, eliakhataru liali lielulu, eliakhane liali liamaralidi

²⁰eliakharano elia lisaridoniki, eliakhasasaba liali likaarineliani, eliomusafu liali kurisotilo, eliamunane liali elielisabarajadi, eliashienda liali elielitopasi, elielikhumi liali elielikrisopiraso, elielikhumi na ndala liali elieliyakimitso, elielikhumi nakhabili liali elia liametsisito.

²¹Ebiliibwa ekhumi nabibili ebio biali ebietsilulu ekhumi natsibili; buli eshiliibwa shiakasibwa khululu ndala. Injila eyomwitookho omwo yalwakhwo etsahabu inzeleleshe eya ng'inang'ina shinga eshiho.

²²Ne shindalolakhwo Ihekalu mwitookho omwo ta, shichila Ihekalu yalio niye OMWAMI Nyasaye Owunyala biosi nende Eshimeme eshielikondi.

²³Ne litookho elo kata shilienya eliuba kata omwesi okhwakha mulio tawe, shichila oluyali olwa Nyasaye nilwo obulafu bwalio, ne Eshimeme eshielikondi niye itaha yalio.

²⁴Obulafu bwabwo nibwo obwamahanga akabandu abomushialo kalachendela, nabo abaruchi abomushialo okhuula balarelamwo oluyali lwabwe.

²⁵Khandi ebiliibwa ebielitookho elio okhuula shibilekalungwakhwo mushiteere ta; bilekukhanga ebise biosi, shichila eshilo shishilibayo tawe.

²⁶Okhuula balarerangamwo oluyali nende ifuma eya amahanga koosi.

²⁷Nebutswa eshindu shiosi eshionoonekha shishilinjila mwitookho omwo nahatuutu ta, kata omwene oyo oukholanga akeshisinyo noho Obubeeyi bwoluyia lwosi shialinjilakhwomwo kata nahatuutu ta. Okhuyiniakhwo abo bonyene aba ameera kabwe kahandikwa mushitabu eshia Eshimeme eshielikondi shiobulamu.