Read wanga OBUFWIMBULI 22 Bible Online

OBUFWIMBULI 22 - wanga bible

OBUFWIMBULI 22

¹Mana omumalaika oyo khandi yamanyia omwalo okwamatsi akobulamu, akang'inang'inanga shinga eshiho, nikurulanga mushifumbi eshioburuchi eshia Nyasaye nende eshia Eshimeme eshielikondi

²nikwikha okhubirira hakari khumuhanda okwelitookho. Khandi khutsinguku tsiakwo tsiombi etsiomwalo okwo eyi nende eyi kwaliho omusaala okwobulamu, netsimbia tsia ebiamo biakwo ekhumi natsibili tsiamanga ebiamo biakwo buli mwesi; ne amasafu kakwo kekhonyelungwa shinga omusaala okwokhuhoninjia amahanga koosi.

³Ne shishilibakhwo mwitookho elio eshindu shiosi eshiliba nishili mushilaamo eshia Nyasaye tawe. Eshifumbi shioburuchi eshia Nyasaye nende eshia Eshimeme eshielikondi shiakhabe mwitookho elo, ne abakholibe okhuula bakhamwinamile.

⁴Ne okhuula balilola obwenibwe, ne eliiralie liliba nilihandikwe khubweni bwabwe.

⁵Ne eshilo shishilibaho khandi ta, ne shibalienya etsitaha noho obulafu obweliuba tawe, shichila OMWAMI Nyasaye aliba obulafu bwabwe, ne nabo okhuula baliruka ebisoni nebisoni.

⁶Khandi omumalaika oyo niyamboolela ari, “Amakhuwa kano nakatoto khandi akokhusibilwa. Ne Omwami, Nyasaye, ouhaananga Rohowe khubalakusi, arumile omumalaikawe okhumanyia abakholibe amakhuwa aketsa okhwikhola munyanga tsitsanga bwangu buno.”

⁷“Ne lole nditsanga bwangu, noweikhabi oyo ouhulilanga natiila amakhuwa akobulakusi bwomushitabu shino!”

⁸Isie, Yohana, nisie owahulile khandi nindola ebindu bino biosi. Ne olwa ndahulila nende okhulola amakhuwa ako ndakwa mumakulu komumalaika oyo owali niyamanyiyenje ebindu ebio biosi, khulwa okhumwinamila.

⁹Nebutswa yamboolela mbu, “Lekha! Shiolakhola orio tawe! Endi omukhalabani washio khandi mulala khubalakusi nende abo abahulilanga nibalonda amakhuwa komushitabu shino. Inamila Nyasaye!”

¹⁰Khandi niyamboolela ari, “Shiolabisa amakhuwa akobulakusi obwomushitabu shino okhuba akamabiswi tawe, shichila ebise ebiamakhuwa kano kalekholeshelamwo bili ahambi.

¹¹Lekha abakholi bobumayanu batsililile okhukhola bario obumayanu bwabwe, nabo abali abeshifwabwi batsiililile bario okhukhola eshifwabwi; ne omulunjishi atsiililile ario okhukhola obulunjishi.”

¹²Yesu yaboola ari “Lola nditsanga lwangu nindeeranga emirungo chianje okhumurunga buli mulala okhulondana nende aka yakhola.

¹³Isie nisie Alfa nende Omega, owambeli khandi ouhelelesia, owokhuchaka khandi owokhumalilikha.”

¹⁴Nabeikhabi abo aboosia tsikanzu tsiabwe nitsilaba mbu, babe abafuchililwa okhulia ebiamo ebirula khumusaala okwobulamu nende okhubira mubiliibwa nibenjila mwitookho.

¹⁵Nebutswa elwanyi welitookho abaliyo ni tsimbwa, abafila, abafumu, nende abayilani, aberi, abo abenamilanga ebifwanani nende yesi owaheela okhukhola akobwikati.

¹⁶“Esie, Yesu erumile omumalaika wanje nobuloli buno okhurumbulila tsikanisa. Isie endi womulwibulo olwa Daudi; nisie eyasulwe ing'inang'ini eyomumabwibwi.”

¹⁷Roho nende omweha yesi, baboola mbu, “Yitsa!” Khandi lekha yesi ouhulila kano koosi aboole mbu, “Yitsa” lekha oyo owobuloho bulia yetse, naye owikoomba anywe amaatsi kobulamu akabula obukusi.

¹⁸Isie, Yohana, esiomela buli mundu ouhulilanga amakhuwa kobulakusi bwomushitabu shino: Omundu yesi naba nameetakhwo likhuwa liosi khukano, Nyasaye alameeta khuye amanyasio ako akahandikwa mushitabu shino.

¹⁹Ne omundu yesi naba narusiakhwo likhuwa liosi khumakhuwa kano akobulakusi buli mushitabu shino, Nyasaye naye alamuyiniakhwo omukabokwe okwebiamo ebiomusaala okwobulamu nende okwelitookho litakatifu ebiahandikwa mushitabu shino.

²⁰Ulia ourusinjia obuloli khumakhuwa kano koosi aboola mbu, “Toto mwene! Nditsanga lwangu!” Amina. Yitsa Omwami Yesu!

²¹Obukoosia obwa Omwami Yesu bube khubandu ba Nyasaye boosi. Amina.