Read wanga OBUFWIMBULI 3 Bible Online

OBUFWIMBULI 3 - wanga bible

OBUFWIMBULI 3

¹Handichila omumalaika weikanisa eyili Saride ori, “Buno nibwo oburume okhurula khu oyo ouli nende tsiroho musafu tsia Nyasaye nende tsing'ining'ini musafu: “Emanyile ebikholebio, ololekhanga okhuba omulamu, ne noli omufu.

²Kho buukha otinyisie aka oshili ninako nikashili okhufwila elala. Shichila shinyoolile ebikholebio nibili ebilayi imbeli wa Nyasaye wanje tawe.

³Yitsulila bulano akawechesibwa nende akawahulila; okalinde khandi wikalukhasie okhulekha obwonoonibwo. Nebutswa nimulabuukha ta, ndaletsa shinga omwifi, ne shimulamanya ebise ebia ndalamwitsila tawe.

⁴Habula muli nabandu abasuubili batuutu mu Saride, abandu abalafwabiakhwo ebifwalo biabwe ta; abo balachenda ninasi nibefwalile ebifwalo ebilafu okhuba nabakwanile.

⁵Abahula balafwala bario ebifwalo ebilafu. Nasi shindalasiliisia ameera kabwe okhurula mushitabu eshiobulamu tawe. Ndalarumbula habulafu ameera kabwe imbeli wa Papa wanje nende abamalaikabe.

⁶“Omundu ouli neshirwi, lekha ahulile aka Roho aboola khutsikanisa!

⁷“Handichila omumalaika owelikanisa lia Filadelifia ori, Buno nibwo oburume okhurula khu oyo Omutakatifu, owatoto, ouli nolufungwo lwa Daudi, ne niyekula abulaho owikala, ne niyekala abulaho owikula.

⁸“Emanyile obukholibwo. Lola endeere omuliango okwikuushe imbeliwo, kwomundu alanyala okhwikala tawe. Emanyile mbu, oli butswa namaani matutu, oshifuchililanga likhuwa lianje khandi oshili okwikaana eliira lianje.

⁹Lola, ndalakhola abomukanda kwa Setani, abekaati abo, abelahanga mbu nabayahudi, ne nibalali Abayahudi ta. Lola! Ndalabakhola okhukhwinamila mumakuluko, kho bamanye mbu ndakhuheela iwe.

¹⁰Shichila waloondile lilako lianje liokhwifwiila amatinyu, ndalakhulinda eshise shiobusandibwi obuletsa mushialo shiosi okhuteema abandu boosi.

¹¹Ndiitsanga bwangu, ohande khu aka oli ninako, kho mbu, omundu yesi yesi alabukulakhwo olusimbilwo tawe.

¹²“Omundu ouhula, ndalamukhola okhuba isiilo muhekalu ya Nyasaye, ne shialirulamwo ta; khandi ndalahandika khuye eliira elia Nyasaye nende eliira lielitookho lia Nyasaye, Yerusalemu liyia, eliikha okhurula khu Nyasaye wanje; nende eliira lianje omwene liyia.

¹³“Omundu ouli neshirwi, lekha ahulile aka Roho aboola khutsikanisa!”

¹⁴“Handichila omumalaika oweikanisa eyili Laodikia ori: “Buno nibwo oburume oburula khu Amina! Amusuubilwa khandi omuloli watoto, ouli omuruchi webilonje bia Nyasaye biosi.

¹⁵“Emanyile ebikholebio. Shioli omunyifu kata ouyiile pia ta. Ndakhekombile waba omunyifu noho ouyile pia.

¹⁶Kho okhuba oli butswa eshiyambala, shioli omunyifu kata ouyile pia ta, ndalakhufutsa orule mumunwa kwanje!

¹⁷Okhuba oboolanga ori, ‘Endi omuyinda, eyindihaale, ne shibulaho eshia endamba ta,’ ne shiomanyanga mbu oli mumatinyu tawe, khandi oli owokhubeelelelwa, omutakha, omubofu khandi oli eshiechenye.

¹⁸Kho ekhuchetsiyia mbu, okule khwisie itsahabu eyitsienuulwe mumulilo, mbu kho obeekhwo omuyinda. Okule khwisie ebifwalo ebilafu bikhurusiekhwo tsisoni tsieshihechenyeshio. Khandi okule khwisie omusaala obashe khutsimonitsio mbu olole.

¹⁹Abo aba ndaheela ebahalabilanga nebahelesia eshinyasio. Kho mube abeshinani khandi mwikalukhasie okhurula mubwonooni bwenywe.

²⁰Lola! Esinjiile hamuliango ekhong'ondanga; omundu yesi ouhulila omwoyo kwanje niyekula omuliango, ndalenjila munzumwe, ndalalia ninaye, naye alalia ninasi.

²¹“Omundu ouhula ndalamufuchilila okhwikhala ninasi khushifumbi shianje shioburuchi, shinga isie omwene ndahula mana nenzikhala halala nende Papa khushifumbishie shioburuchi.

²²“Omundu ouli neshirwi lekha ahulile aka Roho aboola khutsikanisa!”