Read wanga OBUFWIMBULI 5 Bible Online

OBUFWIMBULI 5 - wanga bible

OBUFWIMBULI 5

¹Mana nindola eshitabu eshikanye eshiali nishiahandikwakhwo mukari nende emukongo nishili mumukhono musaatsa okwa oyo owikhalanga khushifumbi shioburuchi, nishiboyilwe nebibalikho musafu.

²Mana nindola omumalaika owamaani owareeba nomwoyo omukhongo ari, “Niwiina oukwanile okhukhalaka ebibalikho nende okhukanyulula eshitabu eshikanye shino?”

³Nebutswa shiyaliho mwikulu noho khushialo kata mukari mweshialo owanyala okhukanyulula eshitabu eshikanye eshio kata okhusooma akahandikwamwo tawe.

⁴Ndekhuula obululu shichila shiyanyoolekhakhwoho omundu kata mulala owakwanila okhukanyulula eshitabu eshikanye eshio nende okhusooma akalimwo tawe.

⁵Mana mulala khubakofu abo niyamboolela ari, “Shioleekhuula ta! Lola, Italanyi yomuluyia lwa Yuda, okhurula mulwibulo lwa Daudi amalile okhuhula abasukube, kho anyala okhukanyulula ebibalikho musafu ebio mana khandi akanyulule eshitabu eshikanye eshio.”

⁶Mana nindola eshimeme shielikondi nishisinjiile hakari weshifumbi shioburuchi, nishibotokhanwe nende ebilonje bine ebilimwoyo ebio nende abakofu abo. Eshimeme shielikondi eshio shifwana shinga eshisinzilwe, ne shiali nende tsinzika musafu nende tsimoni musafu etsili Roho musafu tsia Nyasaye, etsiarumwa khushialo shiosi.

⁷Eshimeme shielikondi eshio shiatsia, ne nishibukula eshitabu eshikanye okhurula mumukhono musaatsa okwa owali niyekhaale khushifumbi shioburuchi.

⁸Ne olwa yali nashibukule, ebilonje ebilimwoyo bine ebio nende abakofu amakhumi kabili nabane abo, basikama imbeli weshimeme shielikondi eshio. Buli mulala yali nende litungu nende ebikaye bieitsahabu nibitsulemwo obubane, nibio amasaayo kabatakatifu aba Nyasaye.

⁹Mana nibemba olwimbo oluyia bari, “Niwe oukwanile okhubukula eshitabu eshikanye nende okhwikula ebibalikho biashio. Okhuba werwa, ne khulwa okhufwakhwo khweshitiso wareera khu Nyasaye abandu okhurula mubuli olwibulo, olulimi, amahanga nende okhurula mutsimbia tsiosi.

¹⁰Wabakhola okhuba lihanga liabesaaliisi okhukhalananila Nyasaye wefwe, ne bakharuche eshialo.”

¹¹Mana ndahenga ne nimbulila emioyo chiabamalaika ebikhumila nebikhumila biebikhumila abali nibabotokhane eshifumbi shioburuchi, ebilonje bine ebilimwoyo ebio nende abakofu abo,

¹²nibembe nomwoyo omukhongo nibaboola bari, “Eshimeme shielikondi owerwa niye oukwanile, okhuhebwa oluyali, obunyali, obuyinda, obuchesi, amaani, ifuma nende okhwitsoomibwa!”

¹³Ne ndahulila buli eshilonje mwikulu nende mushialo nende musi mweshialo nende munyanza nende biosi ebilimwo nibimba biri: “Obwitsoomi, neifuma, noluyali, nende obunyali ne ebia oyo owikhale khushifumbi shioburuchi, khandi ebia Eshimeme shielikondi, betsoomibwe ebisoni nebisoni!”

¹⁴Ne ebilonje bine ebilimwoyo ebio biakalusia biri, “Amina!” Mana abakofu abo nibasikama nibenamila Nyasaye nende Eshimeme shielikondi oyo.