Read wanga OBUFWIMBULI 6 Bible Online

OBUFWIMBULI 6 - wanga bible

OBUFWIMBULI 6

¹Mana nindola Eshimeme shielikondi nishikula eshieimbeli khubibalikho musafu ebio, ne nimbulila shilala khubilonje bine ebio, nishiboola nomwoyo omukhongo shinga omukukumo kwelikulu shiri, “Yitsa!”

²Ndahenga ne nindola ifarasi indafu, ne owali naninilekhwo yali nobuyiingo, ne nahelesibwa olusimbi mana narula shinga omuhuli outsia okhuhula.

³Mana Eshimeme shielikondi nishiikula eshibalikho shiakhabili ne nimbulila eshilonje eshiakhabili eshilimwoyo nishiboola shiri, “Yitsa!”

⁴Mana ifarasi yindi inzakhanyu pa niyiitsa. Owali naninilekhwo yahelesibwa obunyali okhureera lihe khushialo, kho mbu abandu beerane; nahelesibwa olukanga olurambi.

⁵Mana Eshimeme eshielikondi nishikula eshibalikho shiakhataru, ne nimbulila eshilonje eshiakhataru eshilimwoyo nishiboola shiri, “Yitsa!” Ndahenga ne nindola ifarasi imali niyiliho. Owali naninilekhwo yali neyiratili mumukhonokwe.

⁶Ndahulila eshiahulilikhana shinga omwoyo nikurula mubilonje bine ebilimwoyo nikuboola kuri, “Eshibaba shiobusie bweingano khulwa omurungo kweidinari ndala[2], nende ebibaba bitaru bieishayiri khulwa omurungo kweidinari ndala. Nebutswa olasasia omusaala kwamafura nende omusaala okweidivai yirulangakhwo tawe.”

⁷Mana Eshimeme eshielikondi nishiikula eshibalikho shiakhane, ne nimbulila eshilonje eshiakhataru eshilimwoyo nishiboola shiri, “Yitsa!”

⁸Ndahenga ne nindola ifarasi eyobukondo obusembe niyiliho. Owali naninilekhwo yalangwa mbu, Olufu, ne eshialo shiemakombe nishili khumukongokwe. Baheebwa obunyali khushitonye shilala khubitonye bine bieshialo, okhwira khulwa lihe, inzala, obulwale nende tsisolo nabulimo.

⁹Mana Eshimeme eshielikondi nishikula eshibalikho eshiakharano. Ndalola mulwalo mweshimalilo shiemisango emioyo echia abo abali niberwa shichila mbu bayaala likhuwa lia Nyasaye khandi nibaba abasuubilwa mubuloli bwabwe.

¹⁰Nibalaanjilisia nomwoyo omukhongo bari, “Iwe Omwami Owunyala biosi, Omutakatifu khandi owobwatoto! Olalinda okhuula liina kho obakhalachile eshiina nende okhubahelesia eshinyasio abo abakhwiira ifwe khushialo?”

¹¹Mana nibahesibwa buli shiamulala ikanzu indafu, ne nibaboolelwa okhulinda eshise eshitiitikhwo okhuula olwa abo boosi abakhalabani bashiabwe nende abaana babwe baba niberiirwe shinga olwa nabo boosi berwa.

¹²Khandi ndalola Eshimeme eshielikondi nishikula eshibalikho shiakhasasaba. Eshialo shiarenga obutinyu, ne eliuba nililima ti, nakwo omwesi nikukalukhana nikwakhanya shinga amatsayi.

¹³Natsio tsing'ining'ini nitsikwa hasi khushialo shinga omukhuyu olwa kubungulusinjia amakhuyu amachishi lwomuyeka omukhongo kukureesia.

¹⁴Likulu liakhamulukha shinga eshitabu eshikanye eshikanywa, ne buli eshikulu nende eshikhalachinga biasiulwa okhurula mubwikhalo mwabio.

¹⁵Mana abaruchi abeshialo, nabakhongo bamahe, abayinda, abobunyali, nende abandu bandi boosi, abasumba nende abalekhuule, bebisa mutsimbinga mukari mwetsinyanda tsiomubikulu.

¹⁶Balaanga ebikulu, nende tsinyanda nibabiboolela bari, “Mukhukwile mukhufunishe okhurula mumoni omwa oyo owikhalanga khushifumbi shioburuchi nende okhurula khwiruma elia Eshimeme shielikondi!

¹⁷Inyanga yamasila, yeliruma liabwe yulile, ne owakhanyala okhuchifwiila niwiina?”