Read wanga OBUFWIMBULI 7 Bible Online

OBUFWIMBULI 7 - wanga bible

OBUFWIMBULI 7

¹Olunyuma lwakano ndalola abamalaika bane nibasinjiile mumbeka tsine tsieshialo nibekalile emiyeka chine chieshialo, mbu omuyeka kulahutsakhwo khushialo kata khunyanza kata khumusaala kwosi tawe.

²Mana nendola omumalaika undi natikulukhanga okhurula ebukwe nali nende eshibalikho eshia Nyasaye ouliho mwoyo. Yalanjilisia nomwoyo omukhongo khubamalaika bane abo, aba Nyasaye yali nahelesiye obunyali okhumulula eshialo nende inyanza.

³Omumalaika oyo naboola ari, “Shimulanyasia eshialo, kata inyanza, kata emisaala ta, okhuula olwakhura khubweni bwabakhalabani ba Nyasaye wefwe eshibalikho.”

⁴Mana nemboolelwa mbu obunji obwa abo abarebwakhwo eshibalikho eshia Nyasaye khubweni bwabwe bali ebikhumila eshikhumi amakhumi kane nabine (144,000). Barula mutsimbia tsiosi etsia Abaisiraeli ekhumi natsibili;

⁵ebikhumila ekhumi nabibili (12,000) okhurula muluyia lwa Yuda, ebikhumila ekhumi nabibili (12,000) okhurula muluyia lwa Rubeni, ebikhumila ekhumi nabibili (12,000) okhurula muluyia lwa Gadi,

⁶ebikhumila ekhumi nabibili (12,000) okhurula muluyia lwa Asheri, ebikhumila ekhumi nabibili (12,000) okhurula muluhia lwa Nafutali, ebikhumila ekhumi nabibili (12,000) okhurula muluyia lwa Manase,

⁷ebikhumila ekhumi nabibili (12,000) okhurula muluyia lwa Simeoni, ebikhumila ekhumi nabibili (12,000) okhurula muluyia lwa Lawi, ebikhumila ekhumi nabibili okhurula muluyia lwa Isakari,

⁸ebikhumila ekhumi nabibili (12,000) okhurula muluyia lwa Zebuluni, ebikhumila ekhumi na bibili (12,000) okhurula muluyia lwa Yosefu, nende ebikhumila ekhumi nabibili (12,000) okhurula muluyia lwa Benjamini.

⁹Olunyuma lwa kano ndahenga, ne nindola omukanda omukhongo kwomundu alanyala okhubala ta! Barula mu buli lihanga, mu buli oluyia nende mu buli olulimi. Ne bali nibasinjiile imbeli weshifumbi eshioburuchi nende imbeli ewa Eshimeme eshielikondi, nibefwalile tsikanzu tsindafu, ne nibatiilile amasaka kamashiindu mumakhono kabwe.

¹⁰Balaanjilisia nomwoyo omukhongo bari, “Obuhonia burulanga khu Nyasaye wefwe, owikhalanga khushifumbi eshioburuchi nende okhurula khu Eshimeme shielikondi!”

¹¹Abamalaika boosi basinjila nibabotokhana eshifumbi eshioburuchi, abakofu, nende ebilonje bine bilimwoyo. Mana nibenama hasi imbeli weshifumbi eshioburuchi nibamwinamila Nyasaye

¹²nibaboola bari, “Amina! Obwitsoomi, oluyali, obuchesi, nokhupa orio, neyifuma, nobunyali nende amaani nebia Nyasaye wefwe ebisoni nebisoni! Amina!”

¹³Mulala khubakofu abo niyareeba ari, “Nibena bano abefwalile etsikanzu tsindafu, ne barulanga hena?”

¹⁴Nasi nengalusia mbu, “Shiemanyile tawe Omwami, niwe oumanyile.” Niyangalusia ari, “Bano nabandu abahonokokha mubusandibwi obwa amatinyu. Bosia etsikanzu tsiabwe nibatsilafia mumatsayi aka Eshimeme shielikondi.

¹⁵Niko akachila basiinjiile imbeli weshifumbi eshioburuchi shia Nyasaye nibamukhalabanila eshiteere neshilo muhekalu yiyie. Owikhalanga khushifumbi eshioburuchi alabambula liheemalie okhubalinda.

¹⁶Ne shibalabakhwo inzala khandi kata obuloho shibulabalia tawe; omubasu, kata oluya shibilabasamba tawe.

¹⁷Okhubela Eshimeme, ouli hakari weshifumbi eshioburuchi alaba omwayi wabwe, ne alabeemilila okhuula khusebele etsiamatsi akobulamu. Ne Nyasaye alabeeya amasika koosi mumoni tsiabwe.”