Read wanga OBUFWIMBULI 8 Bible Online

OBUFWIMBULI 8 - wanga bible

OBUFWIMBULI 8

¹Ne olwa Eshimeme eshielikondi shiekula eshibalikho eshiamusafu, nibubaho obuholeelefu mwikulu eshise eshihela ahambi inusu yeisa.

²Mana bulano nindola abamalaika abo musafu abasinjilanga imbeli owa Nyasaye, mana nibahebwa etsitarumbeta musafu.

³Omumalaika undi yetsa ne nasinjiile hashimalilo shiemisango natilile eshikaye shieitsahabu, mana nahebwa obubane obunji okhutsokaasia nende amasaayo akabatakatifu boosi khushimalilo misango shietsahabu eshili imbeli weshifumbi shioburuchi.

⁴Ne omwosi okwobubane okwo, halala nende amasaayo akabatakatifu ako nibituumukha okhurula mumakhono aka omumalaika oyo imbeli wa Nyasaye.

⁵Ne omumalaika oyo nabukula eshikaye eshiobubane mana nashitsusia nomulilo okwokhushimalilo eshiemisango, kho nashisukuna khushialo; mana nikubaho omurundukho okwelikulu, amayoosi nende tsimbenu, nende okhurenga khweshialo.

⁶Bulano abamalaika musafu abo abali netsitarumbeta tsiabwe musafu etsio barechekha okhutsikhupa.

⁷Ne olwa omumalaika wambeli yakhupa itarumbetaye, ifula yamachina nende omulilo nibitsokanile nende amatsayi biasuundulwa khushialo. Eshitonye eshiakhataru eshieshialo shiasambwa nishiyia, eshitonye eshiakhataru eshiemisaala, nende obunyasi obubisi nibisambwa.

⁸Omumalaika owakhabili nakhupa itarumbetaye. Mana eshindu eshiafwana shinga eshikulu eshikhongo eshiakhangakhwo omulilo nishisukunwa munyanza. Eshitonye eshiakhataru shieinyanza nishikalukhana nishikwa amatsayi.

⁹Eshitonye eshiakhataru eshiebiloonje ebilamu munyanza nibifwa, khandi eshitonye eshiakhataru eshietsimeeli khunyanza nishisasikha.

¹⁰Omumalaika wakhataru nakhupa itarumbetaye. Mana ing'ining'ini ikhongo niyakukha okhurula mwikulu niyakhanga omulilo omukhongo niyikwa khushitonye eshiakhataru eshiemialo nende tsisebele tsiamatsi.

¹¹Eliira elieing'ining'ini eyo liali mbu, “Obululu.” Ne eshitonye eshiakhataru eshiamaatsi nishikalukhana okhukwa obululu, mana abandu abanji nibafwa khulwa okhunywa amaatsi ako, shichila kali nikalulile pia.

¹²Omumalaika owakhane yakhupa itarumbetaye. Ne eshitonye eshiakhataru eshieliuba, nende eshitonye eshiakhataru shiomwesi, nende eshitonye eshiakhataru eshietsing'ining'ini nibikhupwa, khulweshio ebitonye biakhataru biabwe ebiobulafu bielimibwa; eshitonye shiakhataru shieshiteere nende eshitonye shiakhataru shieshilo biosi bielimibwa.

¹³Mana niheenga ne nimbulila indutsu eyali niyipulushe ikulu mulwanga niyiboola nomwoyo omukali iri, “Amasila! Amasila! Amasila! Khu abo abamenyile khushialo, khulwa okhubela obuyoka obwetsitarumbeta tsindi tsiabamalaika bataru bali hambi okhupa!”