Read wanga OBUFWIMBULI 9 Bible Online

OBUFWIMBULI 9 - wanga bible

OBUFWIMBULI 9

¹Omumalaika owakharano yakhupa itarumbetaye. Mana nindola ing'ining'ini eyali niyikwile khushialo okhurula mwikulu, ne yali niyihelwe olufungwo olwokhwikula obwina obwolutuungu.

²Ing'ining'ini eyo niyikula obwina obwo, mana omwosi nikurulamwo shinga omwosi okurula mumukuba omukhongo okwelirumbi, ne eliuba nende eshialo nibilima khulwa omwosi okwo okwarula mubwina obwo.

³Ne tsisiche nitsirula mumwosi nitsiba khushialo, nitsihelesibwe obunyali obufwana shinga obwa amakatia[3] keshialo.

⁴Tsisiche nitsilachilisibwa mbu tsileshe okhunyasia obunyasi obwokhushialo, kata emimela emibisi kata Omusaala kundi kwosi ta habula tsinyasie abandu abalareebwa khubweni bwabwe eshibalikho shia Nyasaye ta.

⁵Tsisiche etsio tsiafuchililwa okhunyasia abandu abo khulwemiesi chirano nebutswa shitsiafuchililwa okhubera tawe. Ne obutsuni bwatsio buli shinga obutsunwi obwa likatia liba nilikhulasile.

⁶Ne mumiesi chirano echio abandu balikhaaba olufu nebutswa shibalilunyoola tawe, abandu abo balikomba okhufwa nebutswa okhufwa khulibeelukha.

⁷Tsisiche tsiafwana shinga tsifarasi tsirecheshe khulwa lihe; khumirwe chiatsio chialikhwo nende ebindu ebifwana shinga ebimwata bieitsahabu, ne obweni bwatsio bwafwana shinga obweni bwabandu.

⁸Liswi liatsio liali shinga liswi lirambi eliabakhasi, ne ameeno katsio kali shinga ameeno ketsitalanyi.

⁹Khubilifu biatsio nitsifwalile eshialolekhana shinga eshitsengwa eshieshibia, ne oluyoka olwokhupabala khwetsimbaha tsiatsio lwali shinga oluyoka olwa amakaari amanji aketsifarasi nitsirekushe okhutsia mwihe.

¹⁰Tsiali nemishila shinga amakatia, ne tsialasanga, khandi obunyali bwatsio bwokhulasa abandu khulwemiesi chirano buli mumishila chiatsio.

¹¹Omuruchi watsio, yali omumalaika owobwina obubula eshiakamo, oweliiralie Muluheburania mbu Abadoni; ne mu Lugiriki ni Apolioni (eliboolanga mbu, “Omumalilani”).

¹²Amasila kokhuranga kahwele, ne lola, amasila kandi aka khabili kashitsanga.

¹³Mana omumalaika owakhasasaba nakhupa etarumbetaye. Ne nimbulila omwoyo mutsinzika tsine etsia eshimalilo eshiemisango eshietsahabu eshili imbeli owa Nyasaye.

¹⁴Omwoyo okwo nikuboolela omumalaika owakhasasaba oyo kuri, “Lekhuula abamalaika abo bane ababohwa khumwalo omukhongo okwa Yufurate!”

¹⁵Kho abamalaika bane abo babohololwa abali neberecheshe khulwa isa, inyanga, omwesi nende omuyika okhwira eshitonye shiakhataru shiabandu.

¹⁶Obunji bwabaseeri belihe khutsifarasi, bwahela abandu tsimilion ebikhumi bibili (200,000,000).

¹⁷Ne mwilolelo lianje ndalola tsifafasi nende abatsilushilangakhwo nibefwalile ebitsengwa ebiali khubilifu biabwe, ebiakhanyu shinga omulilo, ebiabuluu khandi ebiamayayi. Emirwe chietsifarasi[4] chiali shinga emirwe echietsitalanyi, ne muminwa chiatsio biarulamwa omwosi, omulilo nende amachina keyisambakhulu.

¹⁸Khulwa okhubirira mumanyasio kataru kano eshitonye shiakhataru shiabandu nishirwa; nomulilo, omwosi nende amachina keyisambakhulu ebiarula muminwa echietsifarasi.

¹⁹Okhuba obunyali bwetsifarasi bwali muminwa chiatsio nende khandi mumishila chiatsio. Emishila chiatsio chiali shinga tsinzokha, etsikhoonyelanga emirwe chiatsio okhuluma abandu.

²⁰Ne abandu bandi abatong'a abalayerwa nende amanyasio ako ta, shibeyekalukhasia okhurula khubilonje ebiamakhono kabwe ta, kata okhulekha okhwinamila ebishieno nende ebifwanani ebietsahabu, ebieifetsa, omukasa, amachina, nende emisaala, ebilanyala okhulola, okhuhulila kata okhuchenda tawe.

²¹Kata shibayekalukhasia okhurula mubwiri, obufumu, obwilaasi obwobuyilani nohomba obwifi bwabwe tawe.