Read wanga RUTSI 1 Bible Online

RUTSI 1 - wanga bible

RUTSI 1

¹Olundi munyanga tsia Abayaasi barukanga Isiraeli, inzala yaliho mushialo shia Isiraeli. Ne omusaatsa undi wokhurula Betselehemu mushialo shia Yuda, yahuyila mushialo shia Moabu, ye nomukhasiwe nende abaanabe abasiani babili.

²Omusaatsa oyo yalangwa mbu, Elimeleki naye omukhasiwe yali Naomi. Ne abaanabe abasiani bali Mahaloni nende Chilioni. Bali abeshilibwa shia Efuratsi nibamenya Betselehemu mushialo shia Yuda. Batsia mushialo shia Moabu mana nibamenyayo.

³Olunyumakhwo Elimeleki omusaatsa wa Naomi yafwa mana Naomi natong'a nabasianibe babili abo.

⁴Abasianibe babili abo bateshia abakhasi Abamoabu, mulala mbu, Oripa naye oundi mbu Rutsi. Olunyuma lwemiyika ahambi ekhumi,

⁵abasiani abo Mahaloni nende Chilioni boosi khandi bafwa, mana Naomi natong'a nende abaanabe abasiani nabula omusaatsa.

⁶Olunyumakhwo Naomi yahulila mbu, OMWAMI Nyasaye yali niyahelesiye Abaisiraeli tsikhabi khulwa okhubahelesia lichesa lilayi. Kho Naomi nachaaka oluchendo nende abanyakhufialanyenebe abo okhurula mushialo shia Moabu okhukalukha Yuda.

⁷Kho Naomi nabanyakhufialanyenebe abo nibasumukha oluchendo lwokhukalukha mushialo shia Yuda.

⁸Nebutswa Naomi yaboolela abanyakhufialanyenebe abo ari, “Kalushe ingo wenywe mumenye nende banyinenywe. OMWAMI Nyasaye akhoya yamukholela akeshisa amalayi kario shinga akamwayakholeele nende kamwakholela abaana banje abasiani abafwa.

⁹OMWAMI Nyasaye amunyalile munyoole abasaatsa nende amataala khandi!” Mana nabafumbeelela nabaseebula, nabo nibachaaka okhulila,

¹⁰nibamuboolela bari; “Ifwe khulatsia ninawe khubandubo.”

¹¹Nebutswa Naomi yababoolela ari, “Abaana banje abakhaana, mbushina nimwenya okhutsia ninasi? Mupaaranga mbu, ndalebula abasiani bandi kho mbu bamuteeshie noho?

¹²Inywe shiukhane mukalushe ingo wenywe ewamwarula, shichila isie ndakofula, shinyala okhuteeshibwa tawe. Ne kata nindakhaboola mbu, eshilikhwo nobunaayi bwokhwibula, mana embe nomusaatsa eshilo shino ne ndibule abaana abasiani,

¹³mwakhabalinda batuukha abokhumuteeshia? Tawe! Abakhaana banje, shikanyalikha tawe. Obulamu bwitsile okhuba obutinyu muno khwisie, shichila OMWAMI Nyasaye yangalukhanekhwo, ne emubeelelelanga inywe muno.”

¹⁴Mana abakhaana abo nibachaaka okhulila khandi. Ne Oripa nafumbeelela nyakhufialanyene, namusebula ne niyenyokha. Nebutswa Rutsi yahanda khu Naomi.

¹⁵Mana Naomi naboolela Rutsi ari, “Lola, mwalikhwayo akaluushe khubandube nende khubanyasayebe. Wesi kalukha ewenywe oloonde khumwalikhwayo.”

¹⁶Nebutswa Rutsi yamukalusia ari “Shiolahombelesia okhwinyokha noho okhukalukha mbu endeshe okhukhulondakhwo ta, shichila ewa otsia ndalatsiayo khandi ewa okona, ndalakonayo. Abandubo balaba abandu banje, ne Nyasayewo alaba Nyasaye wanje.

¹⁷Ewa ofwila niho ewa siesi khandi ndalafwila, khandi habwene yaho niho ahandiliyabilwa. OMWAMI Nyasaye akhoya yashilaasia eshinyasio shianje nimba nekhulekha, nikhulali okhufwa nikhukhukabukhasia.”

¹⁸Ne olwa Naomi yalola mbu, Rutsi akhayile mbu okhuula atsie ninaye, shiyameeta okhuboola elindi tawe.

¹⁹Kho bosi babili bario batsiililila noluchendo okhuula olwa boola Betselehemu. Ne olwa boola Betselehemu, abali mwitookho boosi basangaala khulwa okhulola Naomi nende Rutsi. Abakhasi nibachenya nibereeba bari “Uno ni Naomi?”

²⁰Naye Naomi nabakalusia ari, “Mulananje mbu, Naomi[1] ta, habula munanje mbu, Mara[2] okhuba OMWAMI Nyasaye yakholile obulamu bwanje okhuba obululu muno.

²¹Ndarula hano nendi nabandu, ne OMWAMI Nyasaye yanjelesiye omukhaya. Mbushiina munanje mbu Naomi, olwa OMWAMI Nyasaye yakhupiye khushibi, khandi Nyasaye Owobunyali Bwosi yaaraakhwo amatinyu?”

²²Kho Naomi nachelela okhurula Moabu nali nende Rutsi omukhaana Omumoabu. Ne bachelela Betselehemu mukhuchaaka khwelichesa lieishayiri.