Read wanga RUTSI 2 Bible Online

RUTSI 2 - wanga bible

RUTSI 2

¹Naomi yali nomwikhowe womuluyia lwomusaatsawe, owali omusaatsa omuyinda owolwibulo lwa Elimeleki. Elira liomusaatsa oyo liali Boazi.

²Inyanga yindi Rutsi yaboolela Naomi ari, “Lekha enzie ekhung'asie ingano mumukunda kwomundu oulakhufuchilila.” Naye Naomi namukalusia ari “Omukhaana wanje, tsia.”

³Kho Rutsi nasumukha natsia okhukhung'asia ingano munyuma mwabachesi. Mana niyetsukhana niyetsile mushitonye shiomukunda kwa Boazi owomulwibulo lwa Elimeleki.

⁴Mana Boazi niyetsa okhurula Betselehemu, nashiesia abachesi beingano naboola ari, “OMWAMI Nyasaye abe ninenywe.” Nabo nibamukalusia bari, “OMWAMI Nyasaye akhuhelesie tsikhabi.”

⁵Mana Boazi nareeba omusinjilili wabachesi abo ari, “Omukhaana uno niwiina?”

⁶Naye omusinjilili wabachesi oyo namukalusia ari “Nomukhaana Omumoabu owacheleele nende Naomi okhurula mushialo shia Moabu.

⁷Yasayile naboola mbu, nemba nenjama emuleshe akhung'asie ingano munyuma mwabachesi. Ne utsiililiile okhukhung'aia okhurula mumabwibwi okhuula ebise bino, ne shiahulushilekhwo kata na hatutu tawe.”

⁸Mana Boazi naboolela Rutsi ari, “Recheresia omukhaana wanje, bulano shiolatsia okhufulula ingano mumukunda kundi noho okhurula mumukunda kuno ta, habula osite ahambi nabakhaana banje.

⁹Ohenje omukunda kwabachesa mana obalondekhwo inyuma. Engayile abasiani ababuukha mbu balakhuranga tawe. Khandi lwohulila obuloho nibukhulia, otsie onywe amaatsi okhurula musiongo tsia basiani ababuukha balaba nibatayile.”

¹⁰Mana Rutsi nakwa hasi niyenamia obwenibwe nibuula khwiloba nareeba Boazi ari, “Shichila shiina niufuchilila okhufulula ingano, ne endi butswa omucheni mushialo shino?”

¹¹Nebutswa Boazi yamukalusia ari, “Ndaabooleelwe koosi akawakholeele nyakhufialayo okhurula khukhufwa khwomusaatsawo khandi shinga walekha papawo nende mamawo neshialo shienywe nokhwitsa khubandu abolali niwamanyakhwo khale tawe.

¹²OMWAMI Nyasaye akhurunje amalayi khulwa kawakhola khandi onyoole eshihaanwa eshikhongo okhurula khu OMWAMI Nyasaye wa Isiraeli, owa witsile okhumenya hasi wobulindibwe!”

¹³Mana Rutsi namukalusia ari, “Omwami wanje, ungoosiye muno isie omukholiwo okhushila abandi boosi, shichila uhotselesiye, khandi oboolile ninasi mubuholo shinga mulala khubakholibo beshikhaana.”

¹⁴Olwa ebise biokhulia biola, Boazi yaboolela Rutsi ari, “Yitsa oliekhwo omukaate khandi otonjekhwo mudivai.” Kho Rutsi niyekhala nabachesi abo, naye Boazi namukaamila imele yisiyiilwe khumulilo. Mana Rutsi nalia niyekura khandi ebindi nibitong'a.

¹⁵Olwa yabuukha okhutsiililila okhufulula ishairi, Boazi yalachilisia abasianibe ababuukha ari, “Muleshe afululekhwo kata hakari kari wemirwe chiamuboyile, ne mulamuyibila tawe.

¹⁶Khandi mutsomolekhwo imele yindi okhurula mumirwe chienywe nimumuleshela inyuma mbu, afulule ne mulamuhalabile tawe.”

¹⁷Kho Rutsi nafulula mumukunda okwo okhuula khungoloobe. Mana nahuula ebia yali nafuluule, ne nibihela ahambi tsikilo ekhumi.

¹⁸Mana niyetuukha nakalukha mwitaala. Rutsi namanyia nyakhufialanyene imele ya yali nafuluule khandi namuhelesia ebiokhulia bia yali naliilekhwo nibisikaale.

¹⁹Mana Naomi namureeba ari, “Inyanga yino ofuluule hena ingano? Ne okholile hena emilimo? OMWAMI Nyasaye alaamile omusaatsa ukhulutsi nakhufuchilila okhufulula ingano mumukundakwe oyo tsikhabi.” Kho Rutsi naboolela Naomi omundu wa yali nakholeele emilimo mumukundakwe ari, “Eliira liomundu wefuluule mumukundakwe ni Boazi.”

²⁰Naye Naomi naboolela Rutsi ari, “OMWAMI Nyasaye oulemananga obukosiabwe khubandu abalamu nende abafu ta akhoya yahelesia Boazi tsikhabi!” Khandi naboolela Rutsi ari, “Omundu oyo nomwikho wefwe, niye oulikhwo ahambi khwifwe mulwibulo lwomusaatsa wanje okhushila abandu bandi boosi, niye oukhoiele okhukhulinda.”

²¹Khandi Rutsi naboolela Naomi ari, “Okhumetakhwako Boazi yambooleele mbu, ‘Okhoyile obe ahambi nabachesi banje okhuula olwabamala okhuchesa mumikunda chianje chiosi.’ ”

²²Mana Naomi naboolela Rutsi ari, “Mukhaana wanje, nobulayi mbu otsitsenje okhufulula ingano nende abakhaana bakholelanga Boazi shichila notsia mumikunda chiabandu bandi bakhakhuranga.”

²³Kho Rutsi natsiililila okhuba ahambi nabakholi beshikhasi ba Boazi, nafululanga ingano okhuula khukhuwa khwelichesa lieishayiri nende ingano. Ne natsiililila okhumenya nende nyakhufialanyene.