Read wanga RUTSI 3 Bible Online

RUTSI 3 - wanga bible

RUTSI 3

¹Mana Naomi naboolela Rutsi ari, “Mukhaana wanje, kenya ekhukhaabile omusaatsa kho nawe obe neinzuyo.

²Witsulile mbu, Boazi wa wakholilenje nende abakholibe beshikhasi oyo nomwikho wefwe. Kho recheresia, inyanga yino khubwile alabisia nende okhuseesa ishayiriye ahabahulilanga.

³Khulweshio, wiyosie obulayi, wibashe amafura, wifwale tsingubotsio tsindayi mana okholomoshe ahabahulilanga ishayiri. Nebutswa wibise oleshe okhumuloleshela, okhuula olwa alaba namalile okhulia nende okhunywa.

⁴Ne ohenjelesie habundu aha yetsa okhwiyalisia. Ne olwa alaba nakonile tsindoolo, otsie omufimbule ebilenjebie mana wiyalisieho. Ne alakhuboolela eshiokhukhola.”

⁵Naye Rutsi nakalusia Naomi ari, “Ndalakhola koosi akoboolile.”

⁶Kho Rutsi nakholomokha natsia ahabahulilanga, ne nakhola butswa shinga nyakhufialanyene yali namubooleele.

⁷Ne olwa Boazi yali niyakhalia khandi niyakhanywa, ne nasangaalile mumwoyokwe, yatsia okhwiyalisia hasi khundulo weshituuli shieimeleye. Mana Rutsi nanyololokha kalaha nafwimbula ebilenje bia Boazi mana niyeyalisiaho.

⁸Mushilo hakari Boazi yashiukhana, ne niyesundukha okhunyoola omukhasi nakonile habilenjebie.

⁹Kho Boazi nareeba omukhasi oyo ari, “Niwe wina?” Naye nakalusia ari, “Nisie Rutsi omukholiwo weshikhaana. Khulwa okhuba oli omwikho wanje wahambi womusaatsa wanje owafwa, chama wungalusie.”

¹⁰Naye Boazi namukalusia ari, “Omukhaana wanje OMWAMI Nyasaye akhoya yakhuhelesia tsikhabi, amakhuwa akobuheeli kokholile kano namakhongo okhushila akawakhola olwambeli, shichila shiotsiile okhukhaaba abaraaka, babe abatakha noho kata abayinda tawe.

¹¹Ne bulano shiolaria ta, ndalakhukholela koosi akawenya, shichila abandu boosi abomwitookho bamanyile mbu, oli omukhasi ukhoyile.

¹²Khandi toto kali habwene mbu, endi omwikhowo, nebutswa aliho omwikho undi ouli ahambi khwiwe muno okhushilakhwo isie.

¹³Tong'a hano wisimilisie eshilo shieinyanga yino, nende mukamba mumabwibwi, ne naba nali omulekhuule okhukhukalusia, nobulayi akhukalusie. Nebutswa naba nalali omulekhuule okhukhukalusia ta, ekhwitsubila muliira elia OMWAMI Nyasaye ouliho mwoyo mbu, ndalakhukalusia. Wiyalisie hano okhuula olwa bushia.”

¹⁴Kho Rutsi niyeyalisia habilenje bia Boazi okhuula olwa bwashia, ne nabuukha eshialo nishishili okhwamuukha. Boazi namuboolela ari, “Omundu yesi shialamanyakhwo mbu, witsile aha bahulilanga imele tawe.”

¹⁵Khandi namuboolela ari, “Reera inguboyo yokhwifubila mana ochibambule.” Kho Rutsi nabukula inguboye nachibambula, naye Boazi nachela tsikilo amakhumi kabili tsieishayiri, namutuukha khwibeka. Mana Rutsi nakalukha mwitookho.

¹⁶Ne olwa Rutsi yakalukha, nyakhufialanyene yamureeba ari, “Mukhaana wanje, ewotsiile kafwanileyo karie?” Mana Rutsi naboolela Naomi koosi aka Boazi yali namukholeele,

¹⁷naboola ari, “Niye oumbelesiye tsikilo amakhumi kabili tsieishayiri tsino, naboola mbu, shiekhoyile okhukalukha khwiwe amakhono amakhaya tawe.”

¹⁸Naye Naomi nakalusia Rutsi ari “Mukhaana wanje, liinda okhuula lwolamanya eshilekholekha, shichila omusaatsa oyo shialahuluukha ta, okhuula olwa akaasia likhuwa elo inyanga yino.”