Read wanga RUTSI 4 Bible Online

RUTSI 4 - wanga bible

RUTSI 4

¹Mana Boazi natikulukha natsia niyekhala ahabakofu bekhasinjia omuse, ahambi hashilibwa shielitookho. Ne omwikho wa Rutsi wa hambi oushilakhwo Boazi, owa Boazi yali naboolilenjekhwo, niyetsa nabiraho. Kho Boazi namulanga namuboolela ari, “Owashianje yitsa wikhalekhwo hano,” mana omwikho oyo niyetsa niyekhalaho.

²Kho Boazi nabukula abakofu ekhumi belitookho nababoolela mbu, bekhalekhwoho.

³Mana naboolela omwikhowe oyo ari, “Naomi wacheleele okhurula mushialo shia Moabu, ne yenyanga okhukusia eshitonye shiomukunda kwali kwa Elimeleki omusaatsawe ouli omwikho wefwe.

⁴Kho ndenyile mbu, ekhuboolelekhwo likhuwa elo. Khandi mbu, ekhuboolele okukule imbeli wabakofu boluyia lwanje bekhaale hano bano. Noba nokwenya okukule. Ne noba nolakwenya ta, wumboolele emanye shichila omundu undi abulaho ounyala okhukukula nalali iwe, ne nisie oundi ounyala okhukukula.” Mana omwikho oyo naboola ari, “Ndalakukula.”

⁵Naye Boazi namukalusia naboola ari, “Inyanga yokula omukunda okwo okhurula khu Naomi, omanye mbu okulilamwo Rutsi yesi, omukhasi omulekhwa oyo. Kenya omukalusie wibulile omusaatsawe owafwa abaana khulwa okhutsililisia eliiralie muluyia lwefwe. Khandi omukunda okwo kutonye muluyia lwomusaatsa oyo.”

⁶Mana omwikho oyo nakalusia ari, “Shienyala okhukukula ta, shichila abaana banje shibanyala okhulamilwa omukunda okwo ta. Kho ekhuhelesia obulekhuule bwokhukukula.”

⁷Ne munyanga tsia khale mu Isiraeli, eshiima shialinjiho shinga lwokhoyile okhukula noho okhukulaasia obulaamebwo khumundu undi, kalinji mbu omundu ukusinjia eshindu yafwalulanga eshilaroshie mana ahelesia oukulanga, ne munjila yino, Abaisiraeli bamanyisinjia mbu okhukulaasania khuhwele.

⁸Kho lwomwikho oyo yaboolela Boazi ari, “Iwe kukule, kube okukwo,” yarusia eshilaroshie nahelesia Boazi.

⁹Mana Boazi naboolela abakofu nende abandu boosi abali nibekhaaleho ari, “Inyanga yino muli abaloli mbu, engulile buli shindu shiali shia Elimeleki, nende ebindu biosi ebiali biabaanabe, Chilioni nende Mahaloni okhurula khu Naomi.

¹⁰Okhumeetakhwo enguliilemwo Rutsi, omukhasi Omumoabu usika Mahaloni, umalile okhuba omukhasi wanje. Kho mbu ndibulile Mahaloni abaana, okhutsiililisia eliiralie muluyia lwefwe; kho mbu eliiralie lileshe okhusikha tawe. Inyanga yino muli abaloli belikhuwa lino.”

¹¹Mana abakofu nende abandu boosi abali habundu habakofu bakhung'anilanga nibakalusia bari, “Kali habwene, khuli abaloli. OMWAMI Nyasaye akhoya yakhola omukhasi witsa munzuwo oyo, okhuba shinga Raeli nende Lea abebulila Yakobo abaana abanji. Nawe okhoya webula abandu abanji muluyia lwa Efuratsi khandi ifumayo yimanyishe mu Betselehemu.

¹²Ne abaana aba OMWAMI Nyasaye akhuhelesia okhubirila mumukhasi oyo bebulane babe shinga abolwibulo lwa Perezi omusiani wa Tamari yebulila Yuda.”

¹³Kho Boazi nabukula Rutsi ne namuteshia, naye Rutsi naba omukhasiwe. Naye OMWAMI Nyasaye namuhelesia ikhabi, nahela inda, ne niyebula omwana omusiani.

¹⁴Mana Rutsi naboolela Naomi ari, “OMWAMI Nyasaye oukhuhelesiye omwitsukhulu yetsoomibwe. Ne eliira liomwitsukhuluwo uno likhoya liamanyikha mu Isiraeli yosi.

¹⁵Omwitsukhulu uno alikhola obulamubwo okhuba obuyiakha, khandi alikhulinda nokofuule, shichila omukhasi usika omusianiwo owakhuheela khandi omulayi khwiwe okhushila abasiani musafu niye oumwibuule.”

¹⁶Mana Naomi nabukula omwana oyo ne namulela khumakuluke mana niyekhola omulesiwe.

¹⁷Ne nabo abakhasi abamenyani ba Naomi nibakulikha omwana oyo eliira mbu, Obedi, khandi nibaboolela abandu boosi bari, “Naomi anyoolile omwana omusiani.” Niye owali samwana Yese, samwana omuruchi Daudi.

¹⁸Ne bano nibo abolwibulo lwa Perezi, okhurula khu Perezi okhuula khumuruchi Daudi. Perezi yebula Hezironi,

¹⁹Hezironi niyebula Ramu, Ramu niyebula Aminadabu,

²⁰Aminadabu niyebula Nashoni, Nashoni niyebula Salimoni,

²¹Salimoni niyebula Boazi, Boazi niyebula Obedi,

²²Obedi niyebula Yese, naye Yese niyebula Daudi.