Read wanga 1 SAMWELI 10 Bible Online

1 SAMWELI 10 - wanga bible

1 SAMWELI 10

¹Samweli nabukula amafura nikali mulwika natsushilila Saulo khumurwe, namufumbeelela, ne namuboolela ari, “OMWAMI Nyasaye akhwahuule okhuruka abandube ba Isiraeli. Olaruka abandube nende okhubalinda okhurula khubasuku babwe. Shino nishio eshilolelo mbu, OMWAMI Nyasaye akhwahuule mbu obe omuruchi wabandube.

²Olwa orula hano notsia, olaakaana nende abasaatsa babili hambi neshilindwa shia Raheli eshili Zeliza mumukunda kwa Benjamini. Balamuboolela mbu, tsisishili tsia mwakhabilenje tsinyooleeshe. Senywe shiatsihendelanga khandi bulano ta, nebutswa ahendelanga inywe nareeba ari, ‘Ekhole shiina kho omusiani wanje anyooleshe?’

³Mularulaho nimutsiililila okhuula khumusaala kwomuruba omutakatifu okuli Tabori, ewa mulaakaana nende abasaatsa bataru nibatsitsanga okhukholela OMWAMI Nyasaye omusango Betseli. Mulala khubo alaba niyemisiye ebimeeme bietsimbusi bitaru, oundi nachinjile emikaate chitaru naye oundi nachinjile eshimuka shieliseelo nishitsuulemwo idivai.

⁴“Balakhushiesia nibakhuhelesia emikaate chibili nawe okhuula ochibukule.

⁵Mulatsiililila okhutsia khushikulu shia Nyasaye eshili mu Gibea, ewa Abafilisiti bakhupa ikambi ya abelihe babwe. Olaakaana nende omukanda kwabalakusi hamuliango welitookho elo nibarulanga khushimalilo shiemisango, abandi nibakhupanga litungu, abandi nibakhupa manyanga, abandi lilele nabo abandi nibakhupanga lichieng'i. Balaba nibachendanga nibakhola olukhu nibashina nibalakula.

⁶Roho owa OMWAMI Nyasaye alakhwinjilamwo nobunyali, nawe olekhola omundu omuyiakha nochaaka okhulakula ninabo.

⁷Ako koosi nikakhamala okhwikholekha, okhole likhuwa liosi elia Nyasaye akhuboolela.

⁸Uranjilile okhutsia Giligali, ewa ndalaakaanila ninawe, nekholela OMWAMI Nyasaye emisango emisambe nende echiokhureera omulembe. Unindeyo okhuula tsinyanga musaafu okhuula olwa nduulayo ekhuboolele akokhola.”

⁹Olwa Saulo yalekha Samweli niyakhenyokha, Nyasaye yakalukhasia Saulo okhuba omundu womwoyo omuyia. Buli shindu eshia Samweli yali nabooleele Saulo shiekholekha inyanga eyo.

¹⁰Olwa Saulo nende omukholiwe boola Gibea baakaana nende omukanda kwabalakusi. Bwangu bwene Roho wa Nyasaye namwinjilamwo ne nali hakari mubo, yachaaka okhulakula.

¹¹Olwa abandu bandi abali nibamumanya khale bamulola nakholanga ario, bareebana bari, “Nishiina eshiikholeeshe khumusiani wa Kishi? Saulo yekholile omulakusi noho?”

¹²Omusaatsa undi webweneyo nareeba ari, “Nabo abalakusi bandi bano, sabwe nibeena?” Buno nibwo obuchaachilo bwoluchelo mbu, “Saulo yesi khandi yekholile omulakusi noho?”

¹³Nolwa Saulo yali namalile okhulakula yatikulukha natsia khushimalilo shiemisango.

¹⁴Khotsanyene nareeba Saulo nende omukholi oyo ari, “Mubeelenje heena?” Saulo naye namuboolela ari, “Khukhaabilenje tsisishili. Olwa khwakhayilwe okhutsinyoola, khwitsile khu Samweli okhumureeba.”

¹⁵Khotsanyene namureeba ari, “Naye Samweli akhubooleelekhwo shiina?”

¹⁶Saulo nakalusia khotsanyene oyo ari, “Akhubooleele mbu tsisishili tsianyooleeshe.” Nebutswa Saulo shiyamuboolela aka Samweli yali naboolile mbu Saulo alaba omuruchi tawe.

¹⁷Samweli nalanga halala Abaisiraeli boosi okhwitsa imbeli ewa OMWAMI Nyasaye mushialo shia Mizipa,

¹⁸nababoolela ari, “OMWAMI Nyasaye wa Isiraeli aboola ari, ‘Ndamurusia inywe Misiri nimuhonokosia okhurula mubunyali bwa Abamisiri nende abandu bandi boosi abamusandinjia.

¹⁹Nisie Nyasaye wenywe, owamuhonokosia okhurula mumatinyu nende mumanyakhano, nebutswa mundobile khandi musabile mbu emuhelesie omuruchi. Nobulayi, bulano mwikhung'asie buli oluyia khandi buli eshiliibwa imbeli ewa OMWAMI Nyasaye.’ ”

²⁰Mana Samweli nasitia buli oluyia lwa Isiraeli ahambi, ne khulwa okhukhupa ikha, OMWAMI Nyasaye niyaahula oluyia lwa Benjamini.

²¹Samweli nasitia ahambi khandi buli abeshiliibwa shioluyia lwa Benjamini, khandi khulwa okhukhupa ikha, OMWAMI Nyasaye niyaahula abeshiliibwa shia Matiri. Samweli nasitia imbeli abeshiliibwa shia Mitiri mana Saulo omusiani wa Kishi niyaahulwa khulwa okhukhupa ikha. Bamukhaaba eshise eshio nibalamunyoola tawe.

²²Mana nibareeba MWAMI Nyasaye bari, “Yakhaba nashiliho omundu undi noho?” OMWAMI Nyasaye nabakalusia ari, “Saulo aliho yebisile inyuma wemisiiko.”

²³Abandu nibatsia tsimbilo nibatiila Saulo nibamurusia hakari mubandu. Yali omurambi okhushilakhwo abandi boosi.

²⁴Samweli naboolela abandu ari, “Uno niye omusaatsa owa OMWAMI Nyasaye yaahuule! Shialikhwoho omusaatsa undi yesi yesi mwifwe ouli shinga ye tawe.” Abandu boosi nibaayula obutinyu bari, “Omuruchi ayindile!”

²⁵Samweli niyenoosilia abandu akomuruchi akhoyile okhukhola, ne nahandika koosi mushitabu eshikanye nabiikha muhekalu habundu ahokhwinamila OMWAMI Nyasaye. Mana Samweli naseebula buli mundu okhukalukha nangowe.

²⁶Saulo yesi nakalukha nangowe Gibea. Yatsia nabandu bandi aba Nyasaye yali nafwimbuliile mumioyo chiabwe okhuba abalondibe.

²⁷Nabo abandi beinduli nibaboola bari, “Omundu uno alakhuhonia arie?” Nibamuleka khandi nibalamureererakhwo eshihaanwa shiosi shiosi tawe. Naye Saulo naholeela butswa nomulembe.