Read wanga 1 SAMWELI 12 Bible Online

1 SAMWELI 12 - wanga bible

1 SAMWELI 12

¹Samweli naboolela Abaisiraeli ari, “Emalile okhukhola koosi aka mwasaba mbu emukholele inywe. Emwahuliile omuruchi wokhumuruka.

²Bulano muli ninaye amwimilile. Isie emalile okhukofula, liswi lianje liakwile tsimbutsi, ne muli hano nabasiani banje. Ndabelenje omwimilisi wenywe okhurula nendi omuraaka okhuula bulano.

³Bulano esinjiile hano. Nimba nindakhola likhuwa libi liosi, mumboolele bulano imbeli ewa OMWAMI Nyasaye nende omuruchi wa yaahula. Neing'ombe noho isishili ya wiina eya ndabukulakhwo? Niwiina owa ndakatiakhwo noho okhusandia? Niwiina owa ndabukulakhwo eshiomufusi okhurula mumakhonoke? Nimba nindakholakhwo kata elala khwako, emba ndalakalusia eshia ndabukula.”

⁴Abandu nibakaana nibaboola bari, “Shiwakhukaatiakhwo kata okhukhusandia tawe. Shiwanuulakhwo omundu yesi yesi eshindushie tawe.”

⁵Samweli naboolela abandu abo ari, “OMWAMI Nyasaye halala nende omuruchi owa yaahuule nibo abaloli inyanga yino mbu, toto embulakhwo eshikha shiosi tawe.” Nabo nibafuchilila bari, “OMWAMI Nyasaye niye omuloli wefwe.”

⁶Mana Samweli nababoolela ari, “OMWAMI Nyasaye niye owaahula Musa nende Haroni ne narusia abakuuka benywe mushialo shia Misiri.

⁷Bulano sinjile aha muli yaho, nasi emwinjilile itookho nimuli imbeli ewa OMWAMI Nyasaye, nemwitsusia ebikhole biosi ebiamakana ebia OMWAMI Nyasaye yakhola khulwa okhumuhonia inywe halala nende abakuuka benywe.

⁸Olwa Yakobo nende abeinzuye batsia mushialo shia Misiri, nabo Abamisiri nibabasandia, abakuuka benywe bahabila OMWAMI Nyasaye mbu abakhoonye, ne naruma Musa nende Haroni, ababarusia Misiri nibareera mushialo shino okhumenyamwo.

⁹Nebutswa abandu abo bebilila OMWAMI Nyasaye wabwe, kho OMWAMI Nyasaye nalekha Abafilisiti, abaruchi ba Moabu nende Sisera omukhongo owabasikaari belitookho lia Hazori okhulwana abakuuka benywe nibabahula.

¹⁰Bahabila OMWAMI Nyasaye mbu abakhoonye nibaboola bari, ‘Khwonoonile, okhuba khwakhulekha iwe OMWAMI Nyasaye nikhwinamila abanyasaye ba Baali nende aba Ashitarotsi. Nebutswa khuhonokosie okhurula khubasuku befwe ne khulakhwinamila!’

¹¹OMWAMI Nyasaye naruma Gideoni, Baraki, Yebitsa, ne olunyuma naruma isie. Buli mulala khwifwe, yamuhoninjia okhurula mubasuku benywe, nenyu nimumenya nomulembe.

¹²Nebutswa olwa mwalola Nahashi omuruchi wa Abamoni niyetsanga okhuseera, mwaloba OMWAMI Nyasaye omuruchi wenywe ne nimumboolela muri, ‘Khwenya omuruchi wokhukhuruka ifwe.’

¹³Bulano omuruchi wa mwahuule nguouno hano. Mwasaba mbu muhebwe, ne bulano OMWAMI Nyasaye amuhelesiye.

¹⁴Inywe nende omuruchi wenywe nimwakhahulila OMWAMI Nyasaye wenywe, nimumuhelesia oluyali, nimumukhalabanila, nimumurecheresia nende okhuhulila amalakoke, muba mulamenya nomulembe.

¹⁵Nebutswa nimulahulila OMWAMI Nyasaye ta, nimukhaya okhulonda amalakoke, alamukalukhanakhwo namureerera eshinyasio shinga olwa yakholela abakuuka benywe.

¹⁶Bulano sinjile aha muli mana mulole amakhuwa amakhongo aka OMWAMI Nyasaye ali hambi okhukhola nimulolanga!

¹⁷Tsinyanga tsino shitsili etsieshimiyu noho? Ndalasaaya OMWAMI Nyasaye amureerere okhwatulukha khwelikulu nende ifula. Mana muletsulila obwonooni bwamwakhola imbeli ewa OMWAMI Nyasaye olwa mwasaba mbu, mwenya omuruchi.”

¹⁸Mana Samweli nasaaya OMWAMI Nyasaye ne OMWAMI Nyasaye nareera okhwatulukha kwelikulu nende ifula inyanga eyo. Buli mundu naria OMWAMI Nyasaye nende Samweli muno.

¹⁹Nibaboolela Samweli bari, “Chama okhusaayile ifwe abakhalabanibo khu OMWAMI Nyasayewo mbu khuleshe okhufwa. Bulano khumanyile mbu, khumalile okhumeeta khubwonooni bwefwe, obwonooni bwokhusaba khandi okhwonoona khulwa okhusaba OMWAMI Nyasaye omuruchi.”

²⁰Samweli nabakalusia ari, “Shimularia tawe. Kata nimukholile obwonooni obwo shimulaleshekhwo OMWAMI Nyasaye ta, habula mumukhalabanile nomwoyo kwosi.

²¹Shimulenamilekhwo ebifwanani, ebibulakhwo obunyali bwosi, kata ebilanyala okhumukhoonya inywe noho okhumuhonia olwa muba nimuli mumatinyu tawe.

²²OMWAMI Nyasaye amwahuule inywe okhuba abandube beene. Alamutereranga namulinda buli lwosi kho mbu, buli mundu amanye shinga olwa OMWAMI Nyasaye ali omukhongo.

²³Isie nimba nindekha okhusaayila inywe, emba endobanga okhuhulila OMWAMI Nyasaye! Buli lwosi ndalamwechesinjia okhukhola akobulunjishi.

²⁴Okhuula muhulile OMWAMI Nyasaye, nimumwinamila nomwoyo kwenywe kwosi, khandi mwitsulile ebikhole ebikhongo ebia yamukholeele inywe.

²⁵Nebutswa inywe halala nende omuruchi wenywe nimuba nimutsiililila okhwonoona muba muleerwa mwesi pe.”