Read wanga 1 SAMWELI 14 Bible Online

1 SAMWELI 14 - wanga bible

1 SAMWELI 14

¹Inyanga yindi Yonatsani omusiani wa Saulo yaboolela omuraaka owali namuchinjilanga ebimanulwabie ari, “Chenda khwambushe khutsie injelekha wabasikaari ba Abafilisiti bali.” Nebutswa Yonatsani shiyaboolelakhwo samwana amakhuwa ako tawe.

²Saulo yali niyerechekha niyalindila khulubeka lwokhumalilikha lwa Gibea, hasi womukomamanga okwali Migironi. Yali nabasikaari ebikhumi bisasaba (600).

³Omwisaaliisi owali namuchinjiile ifodi yali Ahiya, owali omwana wa Ahitabu omusiani wabwe Ikabodi. Ahiya yali omwitsukhulu wa Finehasi khandi eshitsukhulu shia Eli, owali omwisaaliisi owa OMWAMI Nyasaye Shilo. Nabo abandu shibaali nibamanyile mbu, Yonatsani amalile okhutsia tawe.

⁴Buli injila ya Yonatsani yateema okhubirirakhwo okhutsia okhuseera Abafilisiti yalikhwo tsinyanda tsimemu, lulala elubeka undi nalwo olundi elubeka undi. Ameera katsinyanda etsio kali Bozezi nende Sene.

⁵Lulala khutsio lwali elubeka wemasaba weinjila eyo niluhengaane nende Mikimashi. Nalwo olundi niluba emulambo niluhengaane nende Geba.

⁶Yonatsani naboolela omuraaka owamuchinjilanga ebimanulwabie oyo ari, “Chenda khwambushe khutsie khukambi ya Abafilisiti, abandu abalamanyile Nyasaye tawe. Haundi OMWAMI Nyasaye anyala okhukhukhoonya. Ne naba nakhukhoonya shibulaho eshindu shiosi shiosi eshinyala okhumwikalila okhukhola ifwe okhuhula kata khube abanji noho batiiti tawe.”

⁷Omuraaka oyo namukalusia ari, “Khola likhuwa liosi liosi elia omwoyokwo kukhuboolela. Ndalaba ninawe mu buli eliokhola.”

⁸Yonatsani namuboolela ari, “Nobulayi khwambushe mana khuchile Abafilisiti bakhulole.

⁹Nibaba nibakhuboolela mbu, khulinde betse ewa khuli, khulatong'a ewa khulaba nikhuli.

¹⁰Nibaba nibakhuboolela mbu, khutsie ewa bali, khuba khulatsiayo, okhuba eshio shilaba eshilolelo mbu, OMWAMI Nyasaye akhunyaliile ifwe okhubahula.”

¹¹Yonatsani nende omuraaka oyo nibarula nibasinjila hashikulu aha Abafilisiti banyala okhubalola. Abafilisiti abo nibamanyania nibaboola bari, “Lola, Abaheburania bandi barulanga mumatikho omwa babeele nibebisile.”

¹²Abafilisiti abo nibalanga Yonatsani nende omuraaka oyo bari, “Tikulushe mwitse hano! Khulikhwo nende aka khwenya okhumuboolela!” Yonatsani naboolela omuraakawe oyo ari, “Nondakhwo. OMWAMI Nyasaye alakhunyalila okhubahula.”

¹³Mana Yonatsani namoola natikulukha okhurula munjila eyo naye omusiani omuraaka oyo namulonda inyumawe. Yonatsani yakhupa nakwisia hasi Abafilisiti naye omusiani oyo nabeera.

¹⁴Mukhuseera khwambeli okhwo, Yonatsani nali nende omusiani wamukhoonyanga okhuchinga ebimanulwa oyo yeera Abafilisiti hambi amakhumi kabili nibali habundu ahela omukunda inusu yeiyeka ndala.

¹⁵Abafilisiti boosi abali ebweneyo baria muno. Abokhuseera halala nende abelihe abali mukambi omwo batechela noburi. Eshialo nishirenga, abandu nibahenda muno.

¹⁶Abelihe ba Saulo abali nibalindile Gibea mushialo shioluyia lwa Benjamini balola Abafilisiti nibelukhanga nibaburing'ana eyi nende eyi.

¹⁷Kho Saulo naboolela abelihebe ari, “Basie abelihe mulole mbu niwiina oubulaho.” Babasia abelihe abo ne nibanyoola mbu Yonatsani nende omuraaka owanuchinjilanga ebimanulwabie nibo abali nibabulaho.

¹⁸Saulo naboolela omwisaaliisi Ahiya ari, “Reera hano lisanduku lieindakano elo.” (Inyanga yeneyo Ahiya yali nachinjile lisanduku elo niyemiile ninalio imbeli wabandu ba Isiraeli).

¹⁹Olwa Saulo yali nashiboolelanga Ahiya ario, obukoyanu obunji muno nibutsiililila okhwimeeta mukambi ya Abafilisiti, mana Saulo namuboolela ari, “Ebise shibiliho ebiokhureeba OMWAMI Nyasaye tawe!”

²⁰Saulo nalanga abelihebe halala, nabemilila okhutsia okhuseera Abafilisiti. Khubise ebio Abafilisiti bali nibakoyanile muno, nibalwananga abeene khu beene nibeerana.

²¹Abaheburania bandi abali mukambi ya Abafilisiti nibabakhoonyanga, bamala babaleshe, nibetsa khulubeka lwa Saulo nende Yonatsani okhubakhoonya.

²²Olwa Abaisiraeli bandi abali nibebisile mubikulu bia Efuraimu bahulila mbu, Abafilisiti belukhanga, boosi khandi betsa okhukhoonya Saulo, nibakhupa Abafilisiti.

²³Babatafia okhuula nibaburire litookho lia Betsaweru. Inyanga eyo OMWAMI Nyasaye nakhoonya Abaisiraeli okhuhula.

²⁴Inyanga eyo, Abaisiraeli bali nibachoonyile, inzala niyibaluma, shichila Saulo yali nabalachilisiye okhuburira mushitsubo ari, “Omundu ouliakhwo eshiokhulia shiosi shiosi inyanga yino, olwa emba neshili okhurunga eshikwooli khubasuku banje alaba mushilaamo shiobubi.” Shialikhwoho omundu yesi yesi owali naliile eshiokhulia inyanga eyo yosi tawe.

²⁵Abandu boosi nibetsa mumutsuru ne nibanyoolamwo obuushi obunji muno.

²⁶Emisaala chiali nichietsulakhwo obuushi, nebutswa abulaho owabuliakhwo ta, shichila boosi bali nibariire eshilaamo shia Saulo yali nabalachile.

²⁷Naye Yonatsani shiyali namanyile mbu, samwana yali nariisiye abandu nende eshilaamo shiobubi tawe. Yenikha indabushiye mushicheyo shiobuushi ne nabura khulwala, nabukhomba. Yamala nanyoola amaani mana tsimonitsie nitsilaba.

²⁸Mulala khubasikaari abo namuboolela ari, “Papawo yakhulakachilisia okhuburira mushitsubo mbu, omundu yesi yesi ouliakhwo eshiokhulia inyanga yino, alaba mushilaamo shiobubi, mana fwesi nikhufichilisania mbu, shikhuliakhwo tawe. Neshichila ifwe nikhutofula muno.”

²⁹Yonatsani naboola ari, “Papa wanje akholeele abandu befwe likhuwa litinyu. Lolekhwo shinga olwa tsimoni tsianje tsilabile, khulwobuushi bwekhoombilekhwo butiiti.

³⁰Bwakhabeele obulayi nimwakhaliilekhwo ebiokhulia bia muyaayile olwa mwahulile Abafilisiti. Mwakhanyaliilwe okhwira abanji muno.”

³¹Inyanga eyo okhuula khubwile abelihe ba Abaisiraeli bali nibachoonyile muno, nibeerirenje Abafilisiti okhuchaachila Mikimashi okhuula Aiyaloni.

³²Abaisiraeli nibakwa khubiokhulia bia bali nibayaayile Abafilisiti matetekhana, nibachaaka okhulia. Basinzila hashikuuri welihe bwenaho tsing'ombe, amakondi nende ebimoosi, ne nibalia inyama yabio niyishilimwo amalasile.

³³Abandu nibaboolela Saulo bari, “Lolakhwo abandu bonoonelanga OMWAMI Nyasaye khulwa okhulia inyama yishilimwo amalasile.” Saulo naboola nomwoyo omukhongo ari, “Muli abakhobi! Serenjesie lichina likhongo nimureera ahendi hano.”

³⁴Nabalaka khandi ari, “Tsie mubandu nimubaboolela mbu, buli mundu areere ing'ombeye nende likondilie aliile hano. Bakhoyile okhutsisinzila hano mana batsiliileho. Shibalonoonelakhwo OMWAMI Nyasaye khulwa okhulia inyama yishilimwo amalasile tawe.” Mana eshilo shiene eshio buli mundu niyetsa neing'ombeye, ne nibaliila habundu yaho.

³⁵Saulo niyombashila OMWAMI Nyasaye eshimalilo shiemisango shiambeli habwene yaho.

³⁶Saulo naboolela abandube ari, “Chende khukholomoshe khutsie khuseere Abafilisiti mushilo, nikhubayaaya okhuula okhushia, khandi khubeere boosi pe.” Abandube abo nibamukalusia bari, “Khola eliochama.” Nebutswa omwisaaliisi naye naboola ari, “Leshe khureebekhwo Nyasaye mbelio.”

³⁷Saulo nareeba Nyasaye ari, “Enzie eseere Abafilisiti noho? Olakhunyalila okhubahula noho?” Nebutswa Nyasaye shiyamukalusiakhwo likhuwa inyanga eyo tawe.

³⁸Kho Saulo naboolela abemilisi babandube ari, “Yitse hano, ne mukhaabilisie obwonooni bukholilwe iyanga yino.

³⁹Nditsuba muliira lia OMWAMI Nyasaye ouliho mwoyo, ounyalilanga Abaisiraeli okhuhula mbu, omundu wonoonile oyo okhuula yeerwe, kata naba nali omusiani wanje Yonatsani.” Nebutswa abulaho omundu owakalusiakhwo likhuwa liosi liosi tawe.

⁴⁰Saulo nababoolela ari, “Inywe mwesi sinjile yaho, nasi nende Yonatsani omusiani wanje khulasinjila hano.” Nabo nibamukalusia bari, “Khola eliochama.”

⁴¹Saulo nareeba OMWAMI Nyasaye wa Isiraeli ari, “Mbushiina nolangalusiakhwo likhuwa liosi liosi inyanga yino? OMWAMI Nyasaye wa Isiraeli, ngalusiakhwo likhuwa okhuburila mumachina amatakatifu kano. Naba nali Yonatsani noho isie owonoonile, ololosie okhuburira mu Urimu, nebutswa nibaba nibali abandubo ba Isiraeli abonoonile, ololosie okhubirira mu Tsumimu. Likalusio lialolosia mbu, yali Yonatsani nende Saulo abali nibonoonile, mana abandu bandi nibaba abalekhuule.

⁴²Saulo khandi nalaka mbu, ikha eyahukhasia owonoonile hakariwe nende omusianiwe Yonatsani ikhupwe.” Mana ikha eyo niyikwila Yonatsani.

⁴³Saulo nareeba Yonatsani ari, “Mboolelakhwo eshiokholile?” Yonatsani nakalusia ari, “Ekhoombilekhwo obuushi butiiti nindikhoonyelanga indabushi yembeele nenjinjile. Endi hano. Ndirecheeshe okhufwa.”

⁴⁴Saulo namuboolela ari, “Iwe noba noleerwa ta, OMWAMI Nyasaye akhoya yanzira isie!”

⁴⁵Abandu nibaboolela Saulo bari, “Yonatsani, owanyalila Abaisiraeli okhuhula obuhuli okhukhongo muno buno, yeerwe? Tawe! Khwitsuba muliira lia OMWAMI Nyasaye ouliho mwoyo mbu, liswilie kata elala shililarulakhwo khumurwekwe tawe. Akaakholile inyanga yino, kabeele khulwa obunyali bwa Nyasaye.” Abandu nibahonokosia okhwiirwa khwa Yonatsani.

⁴⁶Olunyuma lwako, Saulo nalekha okhulondachila Abafilisiti mana Abaisiraeli nibakalukha mushialo shiabwe.

⁴⁷Saulo niyaahuulwe okhuba omuruchi wabandu ba Isiraeli, yalwana abasuku babwe tsimbeka tsiosi. Yalwana abandu beshialo shia Moabu, Amoni nende Edomu, abaruchi ba Zoba nende Abafilisiti. Buli hosi hosi aha yalwananga, yahulanga.

⁴⁸Yalwana neitswoni ne nahula Abameleki. Yahonokosia abandu ba Isiraeli okhurula mubasuku boosi ababaseeranga nibabayaaya ebindu.

⁴⁹Abasiani ba Saulo bali Yonatsani, Ishiwi nende Malikishua. Omukhanawe omukhulundu yali Merabu, naye omushe yali Mikali.

⁵⁰Omukhasiwe yali Ahinoamu omukhaana wa Ahimaazi. Omusesiawe welihelie yali Abuneri, mufialanyene wa khotsanyene oulangwa mbu Neri.

⁵¹Kishi samwana Saulo nende Neri samwana Abuneri bali abasiani ba Abieli.

⁵²Olwa Saulo yali nashiliho mwoyo, yalwananga Abafilisiti neitswoni. Olwa yanyoolangakhwo butswa omusaatsa yesi yesi wamaani khandi oulali omuri ta, yamuretsanga mubasikaaribe.