Read wanga 1 SAMWELI 15 Bible Online

1 SAMWELI 15 - wanga bible

1 SAMWELI 15

¹Samweli naboolela Saulo ari, “Nisie owa OMWAMI Nyasaye yaruma okhukhwahula mbu, obe omuruchi wabandu ba Isiraeli. Kho bulano orecheresie amakhuwa ka OMWAMI Nyasaye aboola.

²OMWAMI Nyasaye omwene mahe aboola ari, ‘Ndalahelesia Abameleki eshinyasio, shichila abakuuka babwe bafukula Abaisiraeli olwa Abaisiraeli bali nibarulanga mushialo shia Misiri.

³Kho tsia oseere Abameleki mana osasie buli shindu shiabwe, wiire abasaatsa boosi, abakhasi boosi, abaana babwe halala nende abaana babwe abatoro, tsing'ombe tsiabwe, amakondi kabwe, tsingamia nende tsisishili tsiabwe tsiosi.’ ”

⁴Kho Saulo nalanga abelihebe boosi halala mulukongo lwa Telemu. Abelihe ba Isiraeli balimwo abandu ebikhumila ebikhumi bibili (200,000) nende abandi eshikhumila shilala (10,000) okhurula muluyia lwa Yuda.

⁵Kho Saulo nende abelihe abo nibatsia mwitookho lia Ameleki ne nibakoneshelayo mwibanda liamaatsi kakhamamwo.

⁶Mana nachetsiyia Abakeni, abandu babakuuka babwe bakholela Abaisiraeli amalayi olwa Abaisiraeli bali nibarulanga mushialo shia Misiri. Yababoolela ari, “Mwilushe, murule mubandu ba Meleki, kho mbu, endeshe okhumwira halala ninabo.” Kho Abakeni abo nibelukha okhurula mu Abameleki.

⁷Kho Saulo nahula Abameleki, nabalwana okhurula Hawila okhuula Shuri, litookho lili ebukwe wa Misiri.

⁸Yatiila omuruchi Agagi wa Abameleki nashili mwoyo, ne niyeera abandu boosi.

⁹Nebutswa Saulo nabandube balekha okhwira omuruchi Agagi, nende amakondi netsing'ombe tsindayi, nende ebimoosi nende ebimeeme biamakondi ebilayi nende eshindu shindi shiosi shiosi eshiali eshilayi. Basasia butswa ebindu ebilali ebilayi ta, khandi ebibula inganga.

¹⁰OMWAMI Nyasaye naboolela Samweli ari,

¹¹“Endi neshibeela khulwa okhwahula Saulo okhuba omuruchi. Yandeshile ne naloba okhulonda amalako kanje.” Samweli naba neliruma, nasaaya nalilila OMWAMI Nyasaye eshilo shiosi.

¹²Inyanga yalondakhwo mumabwibwi, Samweli yatsia okhuboola nende Saulo. Nebutswa omundu undi yamuboolela mbu, Saulo atsiile mwitookho lia Karimeli, ewa yali niyeyumbashiile eshitsulilo kho mbu, buli omundu yetsulile okhuhulakhwe. Kandi mbu, arulileyo atsiile Giligali.

¹³Samweli natsia nanyoola Saulo. Saulo namushiesia naboola ari, “Samweli, OMWAMI Nyasaye akhuhelesie ikhabi! Enondile lilako elia OMWAMI Nyasaye.”

¹⁴Nebutswa Samweli nareeba ari, “Mbushiina embulilanga okhwana khwetsing'ombe nende okhwamakondi?”

¹⁵Saulo namukalusia ari, “Abaisiraeli banje nibo abayaayile Abameleki. Baloboole amakondi amalayi nende tsing'ombe tsindayi nibabiikha khulwa okhukholela OMWAMI Nyasayewo omusango, nebutswa khusasiye ebindu bindi biosi.”

¹⁶Samweli namukaya obutinyu naboola ari, “Holeela! Lekha ekhuboolele aka OMWAMI Nyasaye yambooleele eshilo shieinyanga yino.” Saulo nakalusia ari, “Nobulayi, mboolela.”

¹⁷Samweli natsiililila naboola ari, “Onyala okhupaara mbu, shioli omundu woluyali ta, nebutswa OMWAMI Nyasaye yakhwahula mbu, obe omuruchi mana nakhukhola okhuba omulindi wetsimbia tsia Abaisiraeli.

¹⁸Olwa OMWAMI Nyasaye yakhuruma okhuseera Abameleki, yakhulaka okhubamulula boosi pe.

¹⁹Eshichilile nolalonda aka OMWAMI Nyasaye yakhulaka nishiina? Mbushiina nobiikha emiruko echio, nochila OMWAMI Nyasaye nasinyikha?”

²⁰Saulo nakalusia ari, “Ekholile aka OMWAMI Nyasaye yalaka. Yaruma isie okhuseera mana nenzia. Ndatiila omuruchi Agagi, ne nemulula Abameleki boosi pe.

²¹Nabo abelihe banje shibeera amakondi amalayi nende tsing'ombe tsindayi tsia bayaaya inyanga eyo tawe. Bareera ebiayo ebio Giligali hano khulwa okhukholela OMWAMI Nyasayewo omusango.”

²²Samweli naboola ari, “Nishiina eshia OMWAMI Nyasaye achamanga? Okhumuhulila noho okhumuhaanila ebihaanwa nende emisango emisambe? Nobulayi muno okhumuhulila okhushila okhumuhaanila emisango echiamasinya kamamiiku.

²³Okhuba obukhayi, nobwonooni shinga obufumu, nakhwo okhuuma likosi khuli butswa shinga obwonooni nende obwinamili bwebifwanani. Okhuba iwe walobile okhuloonda amalakoke, OMWAMI Nyasaye akhulobile okhuba omuruchi.”

²⁴Naye Saulo niyenama namuboolela ari, “Ndonoonile, shienondile amalako ka OMWAMI Nyasaye nende amebaaloko tawe. Ndabeele neriire abandu banje, mana nekhola akabeenyile.

²⁵Bulano ekhusaba mbu nochama umbeele tsimbabasi khulwa obwonooni bwanje, mana otsie ninasi kho mbu, enyale okhwinamila OMWAMI Nyasaye.”

²⁶Nebutswa Samweli yamukalusia naboola ari, “Shindalatsia ninawe tawe. Okhayile okhulonda amalako ka OMWAMI Nyasaye, naye akhulobile iwe okhuba omuruchi wa Isiraeli!”

²⁷Ne olwa Samweli yali nashiukhananga mbu atsie, Saulo yatiila khundulo weikanzu ya Samweli, nayo niyirandukhamwo.

²⁸Samweli namuboolela ari, “OMWAMI Nyasaye aranduule oburuchi bwelihanga lia Isiraeli okhurula khwiwe inyanga yino. Ne alahelesia omundu undi oburuchi, ouli omuhulili okhushila iwe.

²⁹Nyasaye woluyali wa Isiraeli shiakaatinjia kata okhukalukhasia amapaaroke tawe. Nyasaye shiali omundu ta, khandi shiakalukhasinjia amapaaroke tawe.”

³⁰Saulo naboola ari, “Ndonoonile, nebutswa chama umbelesie oluyali imbeli wabemilisi babasikaari belihe nende abandu ba Isiraeli. Okalusheyo ninasi, kho enyale okhwinamila OMWAMI Nyasayewo.”

³¹Samweli namala nakalukhayo ninaye ne Saulo niyenamila OMWAMI Nyasaye.

³²Mana Samweli nalanga obutinyu ari, “Ndeerire hano omuruchi Agagi wa Abameleki!” Agagi niyetsa nasaangaalile napaaranga mbu, obululu bwokhufwa bumurulilekhwo.

³³Samweli namuboolela ari, “Shinga lwolukangalwo lwirire abaana boosi ababakhasi abanji, nolwa abaana ba mamawo boosi baleerwa bario.” Samweli nakhalaka omuruchi Agagi ebitonye ebitonye imbeli weshimalilo shiemisango Giligali.

³⁴Samweli natsia Rama naye Saulo nakalukha nangowe Gibea.

³⁵Samweli shiyatsiakhwo khandi okhukoonya Saulo ta, okhuula olwa Saulo yafwa. Samweli namwikhuula. OMWAMI Nyasaye nabeelela muno mbu, yakhola Saulo okhuba omuruchi wa Isiraeli.