Read wanga 1 SAMWELI 16 Bible Online

1 SAMWELI 16 - wanga bible

1 SAMWELI 16

¹Inyanga yindi OMWAMI Nyasaye yaboolela Samweli ari, “Olatsiililila okhubeelelela Saulo okhuula liina? Emalile okhumuloba, shialaba omuruchi wa Isiraeli tawe. Habula itsusia amafura keshing'ari kemitseituni mulwikalwo, mana otsie Betselehemu womundu mbu Yese, shichila ndaahuule mulala khubasianibe okhuba omuruchi.”

²Samweli nareeba ari, “Ndakhatsiayo endie? Saulo niyakhetsukhana yamanya, alanzira.” OMWAMI Nyasaye nakalusia ari, “Bukula eshimoosi otsie ninashio mana oboole mbu, ‘Ndiitsile okhukholela OMWAMI Nyasaye omusango.’

³Olaanje Yese yetse hamusango okwo mana ndalakhuboolela eliolakhola. Olatsushilila amafura ako khumusiani wa ndalakhuboolela mbu, niye omuruchi.”

⁴Samweli nakhola shinga olwa OMWAMI Nyasaye yali namulachilisiye, ne natsia Betselehemu. Abemilisi belitookho nibetsa okhumwakaanila nibatechelanga noburi, nibamureeba bari, “Witsile okhukhucheniha nomulembe noho?”

⁵Naye Samweli nafuchilila ari, “Embacheniihe nomulembe. Ndiitsile okhukholela OMWAMI Nyasaye omusango. Mwisiiye abeene mana mwitse ninasi habundu homusango.” Yaboolela khandi Yese yesi nende abasianibe mbu besiiye abeene ne nabalanga mbu betse basanjilane khumusango okwo.

⁶Olwa Yese, nende abasianibe boola, Samweli yalola Eliabu, omusiani omukhulundu wa Yese ne napaara mumwoyokwe omwene ari, “Omusiani usinjiile imbeli wa OMWAMI Nyasaye, niye owa OMWAMI Nyasaye yaahuule.”

⁷Nebutswa OMWAMI Nyasaye yakaania Samweli ari, “Samweli, shiolahenga khwikondolie noho khuburambibwe tawe. Shiniye owa ndaahuule tawe. Shiehenganga khwikondo liomundu shinga olwa abandu bahenganga tawe. Isie ehenganga mumwoyo.”

⁸Yese nalanga omusianiwe Abinadabu namureera khu Samweli. Naye Samweli nakaania Yese ari, “OMWAMI Nyasaye shiyaahuule uno tawe.”

⁹Mana Yese nareera Shama. Samweli namukaania ari, “Tawe, OMWAMI Nyasaye shiyaahuulekhwo kata uno tawe.”

¹⁰Yese nareerera Samweli munjila ndala yeneyo abasianibe musaafu, abali nibatoonyile. Naye Samweli namuboolela ari, “Tawe, OMWAMI Nyasaye shiyaahuulekhwo mulala khubano tawe.”

¹¹Samweli nareeba Yese ari, “Oshilikhwo nabasiani bandi?” Yese namukalusia ari, “Aliho omushe outoonyile, ne atsiile okhwaya amakondi.” Samweli naboola ari, “Muboolele yetsekhwo hano. Shikhulakhola omusango ta, okhuula olwa yetsa.”

¹²Yese naruma mbu batsie balanje Daudi. Daudi yali owelikondo lilayi muno, nalolekha omuraaka wamaani, khandi nashiakhanga mumoni. OMWAMI Nyasaye naboolela Samweli ari, “Uno niye owa ndaahuile, mutsushililekhwo amafura!”

¹³Samweli nabukula amafura akali mulwika natsushilila khu Daudi imbeli wabasiani babwe. Bwangu bwene obwo Roho wa OMWAMI Nyasaye niyenjila mu Daudi ne namenya muye okhurula inyanga eyo. Naye Samweli nakalukha Rama.

¹⁴Mana Roho wa OMWAMI Nyasaye narula mu Saulo, naye OMWAMI Nyasaye naruma roho oweshifwabwi okhunyasia Saulo.

¹⁵Mulala khubakholibe namuboolela ari, “Khumanyile mbu, ni roho weshifwabwi, ourumilwe nende OMWAMI Nyasaye oukhunyasinjia.

¹⁶Omwami, khuhelesie obulekhuule ne khulakhaaba omundu wamanya okhukhupa litungu. Olwa roho oyo akhwitsamwo, omundu oyo alakhupanga obukhana, ne oba nomulembe.”

¹⁷Saulo nakalusia ari, “Nobulayi. Muukhaabile omundu wamanya okhukhupa obukhana obulayi mana mumureere hano.”

¹⁸Mulala khubakholibe abo naboola ari, “Omusaatsa undi oweliira mbu, Yese oumenyanga Betselehemu ali nomwana omusiani owamanya okhukhupa obukhana obulayi, noweitswoni, nomulasani wamaani, mana khandi omubooli omulayi. Nomuraaka owelikondo lilayi khandi OMWAMI Nyasaye ali ninaye.”

¹⁹Khulweshio Saulo naruma abarume khu Yese naboola ari, “Boolela omusianiwo Daudi, owayanga amakondi yetse hano.”

²⁰Yese nabukula omukaate nende idivai niyitsuule mushisiiko shieliseelo lieimbusi, nabiboha khusishili okhuchinga. Yese nahelesia Daudi isishili nende eshimeeme shieimbusi okhutsia ninabio ewa Saulo.

²¹Daudi yatsia ewa Saulo ne nachaaka okhumukhalabanila. Saulo nachama Daudi muno okhuula nakhola Daudi okhumuchinjilanga ebimanulwabie bielihe.

²²Nibashili okhumenya oluhoono olurambi, Saulo yarumila Yese oburume naboola ari, “Ndamuheela Daudi muno. Chama amenye ninasi.”

²³Okhurula inyanga eyo, eshise shiosi eshia roho weshifwabwi, owa Nyasaye yarumanga, niyetsanga khu Saulo, Daudi yakhupanga litungu mana roho oweshifwabwi oyo arula mu Saulo, mana Saulo aba obulayi, khandi aba omulamu.