Read wanga 1 SAMWELI 18 Bible Online

1 SAMWELI 18 - wanga bible

1 SAMWELI 18

¹Olwa Saulo nende Daudi bali nibamalile okhusungana bario, bwangu bwene Daudi naheelana muno nende Yonatsana omusiani wa Saulo. Yonatsani yaheela Daudi muno shinga olwa yali niyeheela omwene.

²Okhurula ebise ebio Saulo yakhayila khu Daudi mbu amenye ninaye, nalamulekhuulakhwo okhukalukha Betselehemu tawe.

³Yonatsani nende Daudi nibalia omuuma kwokhuheelana, shichila Yonatsani yali niyamuheela muno shinga omwene olwa yali niyeheela.

⁴Yonatsani nafwalula ikanzuye, nahelesia Daudi, namuhelesia khandi ebifwalobie bielihe, namuhelesia olukangalwe, obuyingobwe nende omushiipikwe.

⁵Daudi yanyalilungwa okhukhola omulimo kwosi okwa Saulo yamurumanga okhukhola, mana nakhola Daudi okhuba omukhongo wabasikaari belihe. Likhuwa nilisaangaasia abakhongo boosi nende abelihe boosi.

⁶Olwa Daudi yali namalile okhwira Goliatsi mwihe, yachelela nango nende abelihebe. Abakhasi nabo nibarula mubuli litaala lia Isiraeli nibetsa okhwakaanila omuruchi Saulo. Abakhasi abo bali nibeembanga tsinyimbo nibakhupa tsingalakala nibashina, nende tsisukuti nende obukhana.

⁷Bembanga amakhuwa nibongulilana bari, “Saulo yeerire ebikhumila, nebutswa Daudi yeerire ebikhumila amakhumi.”

⁸Saulo nalachamisibwa namakhuwa kolwimbo olwo ta, ne nasinyikha. Naboola ari, “Baboolanga mbu, Daudi yeerire abasuku ebikhumila amakhumi, mbu nasi ndirire ebikhumila bionyene. Eshilalondakhwo balamukhola okhuba omuruchi!”

⁹Omuruchi Saulo nakhalikha omukongo nachaaka okhwayilisia Daudi khumoni okhurula inyanga eyo.

¹⁰Inyanga yalondakhwo, OMWAMI Nyasaye naruma roho oweshifwabwi khu Saulo nachaaka okhwilakalakania shinga omulalu munzu. Daudi niyetsa ewa yali okhumukhupila litungu shinga olwa yakholanga buli lwosi, nebutswa eshise eshio omuruchi Saulo yali natiilile lifumo mumukhonokwe.

¹¹Saulo naboola mumwoyokwe ari, “Ndalamufumira emuhandie khwisiisi.” Saulo napaya lifumo okhuula khabili, Daudi naye niyebera nililamufumira tawe.

¹²Omuruchi Saulo naria Daudi muno, shichila OMWAMI Nyasaye yali nakhoonyanga Daudi, ne yali naleshile okhukhoonya Saulo.

¹³Saulo namuruma ehale namukhola okhuba omusesia owabasikaari eshikhumila. Buli lwosi Daudi niyatsitsanga nabasikaaribe mwihe,

¹⁴yahulanga, shichila OMWAMI Nyasaye yamukhoonyanga.

¹⁵Okhuhula okhwo nikhumeeta okhukhola omuruchi Saulo okhuria Daudi muno.

¹⁶Abandu boosi mu lsiraeli nende mu Yuda nibaheela khandi nibahelesia Daudi oluyali, shichila yalinji omwimilisi wobunyali.

¹⁷Inyanga yindi Saulo yaboolela Daudi ari, “Noba omulasani weitswoni, niunwanila amahe aka OMWAMI Nyasaye, emba ndalakhubashila omukhaana wanje omukhulundu Merabu.” Nebutswa Saulo yali napaaranga mumwoyokwe ari, “Shinzenya omwene okhwiira Daudi ta, habula Abafilisiti bamwiire khulwa isie.”

¹⁸Daudi namukalusia ari, “Isie endi shiina, kata aboluyia lwanje nishiina, ne kata abeinzu ya papa nishiina mu Isiraeli yosi mbu, isie embe nyakhufialanyene omuruchi?”

¹⁹Olwa ebise biola ebia Daudi okhuteeshia Merabu, omuruchi Saulo yaboolela omukhaana oyo okhutsia okhuteeshela omusaatsa undi oweliira mbu, Adirieli owelitookho lia Meholatsi.

²⁰Saulo yali nomukhaana undi weliira mbu Mikali, owamala naheelana nende Daudi muno, ne Saulo yachamisibwa muno olwa bamuboolelakhwo amakhuwa ako.

²¹Saulo naboola mumwoyokwe ari, “Ndalahelesia Daudi omukhaana wanje. Ndalekhoonyela omukhaana wanje uno okhumureka mana Abafilisiti bamwiire.” Saulo naboolela Daudi olwakhabili ari, “Olaba nyakhufiala wanje omusiani.”

²²Saulo nalaka abasumbabe okhuboolela Daudi masiliisi ari, “Omuruchi achamisiibwe ninawe khandi abakhongobe bakhuheela iwe, bulano nobulayi obukule Mikali abe omukhasiwo.”

²³Baboolela Daudi amakhuwa ako, naye nababoolela ari, “Noluyali olukhongo khumundu shinga isie okhuba nyakhufialanyene omuruchi. Noluyali olukhongo muno khumundu ouli omumanani khandi omututu shinga isie.”

²⁴Abakhongo abo nibaboolela Saulo aka Daudi yali naboolile,

²⁵naye Saulo nabaruma khandi okhukalukha okhumuboolela bari, “Ikhwe yomuruchi yenya mbu omurunje, nokhumureerera amafunga eshikhumi (100), aka Abafilisiti bafwile, kalaba okokhumala eshikwoli khubasukube.” Saulo yareka ario kho mbu, Abafilisiti beere Daudi.

²⁶Abakhongo ba Saulo nibatsia baboolela Daudi aka Saulo yali naboolile. Mana Daudi nachama muno okhuba nyakhufialanyene omwami.

²⁷Daudi nende abelihebe nibatsia nibeera Abafilisiti ebikhumi bibili (200), inyanga eya eshiselelo niyishili okhuula. Daudi nateta amafunga kabwe nayilila omuruchi, mana nabasia koosi imbeliwe kho mbu, Daudi abe nyakhufialanyene omusiani. Saulo nahaana omukhaanawe Mikali okhuteeshela Daudi.

²⁸Olwa Saulo yamanyilisia mbu, OMWAMI Nyasaye akhoonyanga Daudi khandi mbu, omukhaanawe Mikali yaheela Daudi muno,

²⁹yameeta okhuria Daudi muno khandi naba omusukuwe inziayo.

³⁰Abelihe ba Abafilisiti betsanga okhuseera Abaisiraeli, ne mubuli lihe Daudi yahulanga muno okhushilakhwo abasesia bandi ba Saulo yali niyaahula. Ako kachila Daudi namanyikha muno.