Read wanga 1 SAMWELI 19 Bible Online

1 SAMWELI 19 - wanga bible

1 SAMWELI 19

¹Inyanga yindi Saulo yaboolela omusianiwe Yonatsani nende abakhongobe boosi mbu, beere Daudi. Naye Yonatsani yali niyachama Daudi muno,

²kho namuboolela ari, “Papa wanje yenyanga okhukhwira. Obe meeso, mukamba mumabwibwi, otsie wibise habundu mana otoonyeho.

³Ndaletsa nende papa habundu aholaba niwibisile mana emboole ninaye amakhuwa khwiwe. Nemba nenyoolakhwo likhuwa liosi okhurula khuye, emba ndalakhuboolela.”

⁴Inyanga yalondakhwo Yonatsani niyetsulisia Saulo amakhuwa amalayi amanji aka Daudi yali niyakholela Saulo. Yonatsani nareeba Saulo ari, “Mbushiina niwenya okhwira Daudi? Ashili okhukhukholelakhwo libi liosi tawe. Yabelenje omusikaari nakhukhalabanila, ne buli lwosi yakhukholeelenje iwe amalayi konyene.

⁵Omwene yeyila mulumbe, olwa yatsia okhwira Goliatsi. OMWAMI Nyasaye yakhoonya Abaisiraeli okhuhula lihe likhongo inyanga eyo, ne olwa walolakhwo wasaangaala muno. Bulano mbushiina niwenya okhukholela Daudi amabi, omundu oulali neshikha, niwenya okhumwira?”

⁶Saulo yamala ahulile amakhuwa ka Yonatsani ne niyetsuba muliira lia OMWAMI Nyasaye mbu, shialeera Daudi tawe.

⁷Yonatsani nalanga Daudi ne namuboolela koosi aka Saulo yali naboolile. Mana Yonatsani nayila Daudi khu Saulo, ne Daudi nakholwa okhuba omusikaari, natsiililila okhukhalabanila Saulo shinga olwambeli.

⁸Olundi Abaisiraeli nibalwana nende Abafilisiti, ne Daudi nalwana neitswoni, niyeera abandu abanji, nakhola Abafilisiti okhwilukha.

⁹Inyanga yindi mushilo, OMWAMI Nyasaye yareera roho weshifwabwi khu Saulo. Yali niyekhaale munzuwe natiilile lifumo mumukhonokwe, naye Daudi nakhupanga litungu.

¹⁰Saulo nateema okhufumira Daudi khwisiisi, nebutswa Daudi niyebera, nalio lifumo nilihanda mwisiisi. Daudi niyelukha niyehonokokha.

¹¹Inyanga eyo mushilo, omuruchi Saulo yaruma abandube nanzu wa Daudi mbu, bakoneshele Daudi mana bamwiire inyanga ilondakhwo mumabwibwi. Omukhasi wa Daudi mbu Mikali namuchetsiyia namuboolela ari, “Nolehonokosia welukha eshilo shino ta, okhuula mutsuli olaba niwirirwe.”

¹²Mikali namwishia hasi okhubirira mwitirisha ne niyelukha niyehonokokha.

¹³Mikali nabukula eshifwanani eshiomuterafi eshiali munzu eyo, nashialisia khushitali, nashiyichikha omuto kwobwoya bweimbusi namurwe washio ne nafimbakhwo ingubo.

¹⁴Olwa abarume ba Saulo betsa okhutiila Daudi, Mikali yababoolela mbu Daudi nomulwale.

¹⁵Omuruchi Saulo naruma khandi abarume abo mbu bakalusheyo balole Daudi netsimoni tsiabwe abeene. Saulo nabalachilisia ari, “Mumuchinje mumureere hano nakonile khushitali, nasi ndalamwiira.”

¹⁶Benjila munzu ne nibanyoola eshifwanani eshio nishialisiibwe khushitali, nishiyichikhwe omuto kweliseelo liembusi namurwe kwashio.

¹⁷Saulo nareeba Mikali ari, “Mbushiina niungatia orio, nolekhuula omusuku wanje niyehonokokha?” Mikali namukalusia ari, “Yambooleele mbu, nindalamulekhuula okhwihonokokha ta, alanzira.”

¹⁸Daudi niyehonokokha, ne natsia Rama, ewa Samweli yali, namuboolela koosi aka Saulo yali namukholeele. Daudi halala nende Samweli nibatsia okhumenya Nayitsi.

¹⁹Omuruchi Saulo naboolelwa mbu Daudi amenyanga Nayitsi, elili mu Rama.

²⁰Kho naruma abasaatsa bandi okhutiila Daudi. Nebutswa olwa balola omukanda kwabalakusi nibalakulanga obutinyu nibashina, nibemiliilwe nende Samweli, Roho wa Nyasaye niyenjila mubasaatsa ba Saulo abo, ne boosi nibachaaka okhulakula obutinyu nibashina.

²¹Olwa omuruchi Saulo yahulila amakhuwa ako, yaruma khandi abasaatsa bandi, khandi boosi nibachaaka okhulakula obutinyu nibashina. Saulo naruma abasaatsa bandi olwakhataru, khandi bosi nibachaaka okhwimba obutinyu nibashina.

²²Bulano omwene narula natsia Rama. Olwa yoola khusebele ikhongo yili mu Seku, yareeba abandu mbu, bamumanyie ewa Samweli nende Daudi bali. Ne naboolelwa mbu, bali Nayitsi.

²³Olwa yali natsitsangayo, Roho wa Nyasaye yamwinjilamwo nachaaka okhulakula obutinyu nashina khunjila okhuula Nayitsi.

²⁴Omuruchi Saulo nafwalula ebifwalobie, nashina nalakula obutinyu imbeli wa Samweli khandi naba eshiechenye eshiteere shiosi, nende eshilo shiosi. Neshichila nibareeba bari, “Omuruchi Saulo yesi yekholile omulakusi noho?”