Read wanga 1 SAMWELI 2 Bible Online

1 SAMWELI 2 - wanga bible

1 SAMWELI 2

¹Mana Hana nasaaya OMWAMI Nyasaye naboola ari, “OMWAMI Nyasaye akholile omwoyo kwanje okhuba nobusaangaafu obunji. Yameetile amaani! Enzeshelela abasuku banje. Esaangaala muno, shichila Nyasaye yambabiine.

²“Abulaho ouli omutakatifu shinga OMWAMI Nyasaye, abulaho ouli shinga ye. Abulaho omulindi shinga Nyasaye wefwe.

³Muleshe okhwiyitsiala obutinyu. Muleshe okhuboola amakhuwa kenywe akokhwichinjimisia. Okhuba OMWAMI Nyasaye niye Nyasaye oumanyile koosi, khandi akhalakanga kabandu bakhola koosi.

⁴Afunakanga obuyingo bwabelihe bamaani, nebutswa akholanga abateshele okhuba abamaani.

⁵Abandu abali nibaliisibwa nibekura, bulano behaanile okhukholela abandi emilimo khulwa okhurungwa eshiokhulia, nebutswa ebeinzala yalumanga, bulano shibali neinzala tawe. Omukhasi omukumba yeebuule abaana musaafu. Nebutswa omukhasi owali niyebula abaana abanji yatoonyile eshikhaya.

⁶OMWAMI Nyasaye yeeranga khandi alamusinjia, asukunanga abandu emakombe, mana khandi abayiniayo.

⁷Akholanga abandu bandi okhuba abayinda, nabo abandi abakhola okhuba abamanani. Akholanga abandi okhuba abatiiti, nabo abandi abakhongoyia.

⁸Achinguulanga abamanani okhurula mubumanani bwabwe, khandi arusinjia abatakha mumatinyu kabwe. Akholanga abatakha okhwikhala nabaruchi, khandi abekhasinjia khubifumbi bioluyali. Niye mwene emise chieshialo, yombakha khuchio eshialo.

⁹“Atereranga obulamu bwabandube abesiikwa, nebutswa abonooni bafwilanga mushiilima. Omundu yesi yesi shiahulanga khulwa amaanike tawe.

¹⁰Abasuku ba OMWAMI Nyasaye balahulwa, alabaatulushilakhwo shinga ifula yelikulu nali mwikulu. OMWAMI Nyasaye alayaasia eshialo shiosi, alahelesia abaruchibe obunyali, alakhola abaruchi abahule okhuba abahuli.”

¹¹Mana Elikana[2] nakalukha Rama, nebutswa Samweli yatong'a Shilo okhukhalabanila OMWAMI Nyasaye nali hasi womwisaaliisi Eli.

¹²Abasiani ba Eli bali abakholi bobwonooni, shibahelesiakhwo OMWAMI Nyasaye oluyali,

¹³kata okhumanyilisia amalako kalondana nende omukabo kwabandu bakhoyile okhukaba abesaaliisi tawe. Eshiima shiomwisaaliisi yalinji ninashio nende abandu shialinji mbu, buli lwosi lwomundu yesi yesi aba nakhola omusangokwe, omukhalabani womwisaaliisi yetsanga inyama niyishiyitsanga naye nachinjile amakhango kameeno kataru mumakhonoke.

¹⁴Omukhalabani oyo yatsomanga amakhango ako munyungu eyo, ne eshitonye shiosi eshia katsomangakhwo shiba eshiomwisaaliisi. Buli Omuisiraeli owetsanga Shilo okhukhola omusango yakholungwa ario.

¹⁵Kata olwa amasinya kaba nikashili okhutetwakhwo nikasambilwa OMWAMI Nyasaye, omukhalabani womwisaaliisi yetsanga ne aboolela omundu oukholanga omusango okwo ari, “Mbelesia inyama eyomwisaaliisi esambe, shialafuchilila okhubukula inyama yoteeshile eyo ta, habula imbisi.”

¹⁶Omundu oyo naba namuboolela ari, “Lekha khukhole akakhoyeele, khusambe amasinya mbeli, mana obukule yosi yosi eya wenya.” Omukhalabani oyo yamukalusinjia ari, “Tawe! Mbelesia busa bulano buno. Noba nolambelesia ta, ndalabukula namaani!”

¹⁷Obwonooni bwabasiani ba Eli bakholanga obwo bwali obubi muno khu OMWAMI Nyasaye, shichila shibahelesinjia emisango chiabandu bakholelanga OMWAMI Nyasaye oluyali tawe.

¹⁸Ebise ebio omwana Samweli yatsiililila okhukhalabanila OMWAMI Nyasaye niyeboyile ifodi.

¹⁹Buli muyika Elikana nende Hana nibetsanga okhukhola omusango kwabwe Shilo, Hana yareereranga Samweli ikanzu indiiti eya yamunabila.

²⁰Buli lwosi Eli yasabilanga Elikana nende Hana tsikhabi naboola ari, “Esaba mbu, OMWAMI Nyasaye amuhelesie tsikhabi mwibule abaana abanji bakalushe mushilenje shia Samweli.” Eli niyakhamala okhubasabila ikhabi, Elikana nende Hana benyokhanga nibakalukha nango wabwe.

²¹OMWAMI Nyasaye yahelesia Hana ikhabi, ne niyebula abasiani bandi bataru nende abakhaana babili. Samweli yakhula nali Shilo nakhalabanilanga OMWAMI Nyasaye.

²²Ebise ebio Eli yali nakofuule muno. Yatsiililila okhuhulila amakhuwa koosi akabasianibe bakholelanga Abaisiraeli, khandi mbu bayilananga nende abakhasi abakhalabananga hamuliango weliheema litakatifu.

²³Eli nabareeba ari, “Mbushiina nimukholanga amakhuwa kano? Buli mundu yanziyiniakanilanga obwonooni bwa mukholanga.

²⁴Baana banje, leshe okhukhola murio! Ako namakhuwa amabi kabandu aba OMWAMI Nyasaye baboolangakhwo!

²⁵Omundu niyonoonela owashie, anyala okhusabilwa khu OMWAMI Nyasaye, naye OMWAMI Nyasaye omuleshele, nebutswa omundu niyonoonela OMWAMI Nyasaye, niwiina ounyala okhumuterera, namusabila obulesheli?” Nabo abasiani abo shibahulila amakhuwa kasamwana yababoolela ta, shichila OMWAMI Nyasaye yali niyerecheeshe okhubamulula.

²⁶Samweli natsiililila okhukhula nakoosibwa nende OMWAMI Nyasaye khandi nende abandu boosi.

²⁷Inyanga yindi OMWAMI Nyasaye yaruma omulakusi khu Eli naboola ari, “Olwa abakuuka benywe Haroni nende abeinzuye bali abasumba bomuruchi wa Misiri, omwene ndefwimbula khu Haroni.

²⁸Ndaahula abeinzuye okhurula mutsimbia tsiosi tsia Abaisiraeli okhuba abesaaliisi banje, khulwa okhukhalabana khushimalilo shiemisango, okhusamba obubane nende okhwifwala ifodi eyo okhumanyilisia aka ndenya. Ndabahelesia obunyali bwokhubukulakhwo emisango echiasambilungwa khushimalilo shiemisango.

²⁹Eshichilanga bulano noba neshikhalikhali khumusango nende ebihanwa ebiabandu bakhoyile okhundeerera nishiina? Nishiina eshichila iwe Eli nohelesia abasianibo oluyali okhushila isie, khulwa okhubafuchilila okhwikhomesia abeene, khulwa okhulia inyama indayi eya emisango chiabandu bakholelanga?

³⁰Isie OMWAMI Nyasaye wa Isiraeli ndasuubisia khale mbu, inzuyo nende abeshiliibwashio baliba abesaaliisi nibaakhalabanila isie buli lwosi. Bulano ekhuboolela mbu, shikalabakhwo kario tawe! Ndalahelesia abambelesinjia isie oluyali nabo abalambelesinjia oluyali ta, ndalabasila.

³¹Ebise biulanga olwa ndaleera ababuukha bomunzuyo nende abomushiliibwashio kho mbu, abuleho omubuukha yesi yesi oulakhula akofule tawe.

³²Olanyoola amatinyu amanji nokhalishila omukongo tsikhabi tsiosi etsia ndalahelesia Abaisiraeli bandi. Abulaho owomunzuyo oulamenya okhuula mubukofu tawe.

³³Kata kario, ndalalekha mulala khubolwibulolwo abeho mwoyo niyakhalabanila shinga omwisaaliisi. Nebutswa olabofula, nende okhukosia obunaayi ne khandi abolwibulolwo boosi bakhafwe okhufwa okhululu.

³⁴Olwa abasianibo babili Hofini nende Finehasi bafwa khunyanga ndala, nolwa olamanya mbu buli shindu eshia endachile shilekholekha.

³⁵Ndalaahula omwisaaliisi omwisiikwa oulakhola buli elia ndenya. Ndilimunyalila okhwibula abaana, abaliba abesaaliisi nibakhalabana imbeli womuruchi wanje omwahule.

³⁶Omundu yesi yesi womulwibulo olwo oulitong'aho mwoyo alitsia khumwisaaliisi oyo namusaaya mbu, amuhelesiekhwo amapesa nende eshiokhulia, khandi mbu amufuchilile okhukhoonyakhwo omwisaaliisi oyo kho mbu, anyoolekhwo eshia anyala okhulia.”