Read wanga 1 SAMWELI 20 Bible Online

1 SAMWELI 20 - wanga bible

1 SAMWELI 20

¹Daudi niyelukha okhurula Nayitsi Rama natsia ewa Yonatsani namureeba ari, “Nishiina eshiekholile? Ekholile libi shiina? Ekholeele papawo libii shiina elichila niyenya okhunzira?”

²Yonatsani namukalusia ari, “Papa wanje shiyenyanga okhukhwira tawe! Shiakholangakhwo likhuwa liosi liosi, kata libi noho lilayi nashili okhumboolela tawe. Eshiakhachila yambise lino nishiina? Shiyenyanga okhukhwira tawe!”

³Nebutswa Daudi namuboolela ari, “Papawo amanyile obulayi bwene mbu, iwe waheela muno, ne apaarire mbu aleshe okhukhuboolela aka yerechekhanga okhukhola, shichila wakhabeelela muno. Ekhwitsubila muliira elia OMWAMI Nyasaye ouliho mwoyo mbu, endi hambi muno okhufwa!”

⁴Yonatsani namukalusia ari, “Shiosi eshia wenya mbu ekhukholele, ndalakhola.”

⁵Daudi naboolela Yonatsani ari, “Mukamba ni Lisabo eliokhuchaaka khwa Omwesi Omuyia, nasi ekhoyile okhulia halala nomuruchi eshiokhulia eshiokhubwile. Nebutswa noba nofuchilila, enzie ndibise mumukunda okhuula khubwile inyanga yiloonda mukamba.

⁶Papawo naba namanyilisia mbu, shendiho ta, omuboolele mbu, ekhusabile mbu ufuchilile ndanguyilisie okhukalukha nango Betselehemu kho mbu, ekholele halala nende abeinzu yefwe, omusango okwa buli muyika.

⁷Papawo nalola mbu nobulayi, kho emba ndalaba nomulembe, ne nasinyikha, omanye mbu ashireerekhwo omwoyo okhusaalisia.

⁸Nochama ukholele aka eshisa khandi olinde omuuma kwa khuliile ninawe imbeli ewa OMWAMI Nyasaye. Nebutswa iwe omwene unzire nemba nekholile obumayanu bwosi! Eshichila umbile khu papawo ndiirwe nishiina?”

⁹Yonatsani nakalusia Daudi ari, “Shiolapaarakhwo likhuwa shinga elo tawe! Nemba nemanyile toto mbu papa wanje areerekhwo omwoyo okhukhwiira, shindakhakhubooleele?”

¹⁰Daudi nareeba Yonatsani ari, “Niwiina oulamboolela papawo naba nakhukalusia neliruma?”

¹¹Yonatsani namuboolela ari, “Chenda khutsie mumukunda.” Ne nibatsia boosi.

¹²Yonatsani naboolela Daudi ari, “OMWAMI Nyasaye wa Isiraeli abe omuloli wefwe! Mukamba nende inyanga yilondakhwo, ebise shinga bino, ndalareeba papa wanje. Naba nali namapaaro komulembe khwiwe, emba ndalakhuboolela.

¹³Ekhusuubisia mbu, ndalakhuboolela khandi ndalakhukhoonya okhwihonokosia, naba nashikhaabilisinjia okhukhwiira. OMWAMI Nyasaye akhoya yambelesia eshinyasio eshilulu nindalalinda eshitsubo shianje shino tawe. Ekhusabila mbu, OMWAMI Nyasaye akhulinde shinga olwa yalindanga papa wanje Saulo!

¹⁴Chama olinde omuuma okwoliile ombeli ewa OMWAMI Nyasaye nemba neshiliho mwoyo,

¹⁵nebutswa nefwa chama ololosie eshisa khubeinzu yanje inziayo. Olwa OMWAMI Nyasaye alaba nasasiye abasukubo boosi,

¹⁶obusuubisie bwa khusuubisaniye bukhoya bwatong'aho inziayo. OMWAMI Nyasaye aba alakhuhelesia eshinyasio nibwakharulaho.”

¹⁷Yonatsani khandi nakhola Daudi okhusuubisia mbu alamuheela, shichila Yonatsani yali niyamuheela muno shinga olwa yali niyeheela omwene.

¹⁸Yonatsani naboolela Daudi ari, “Mukamba olwa lili Lisabo elia Omwesi Omuyia, abandu balamanyilisia mbu, obulaho khubise ebiokhulia.

¹⁹Inyanga yilonda mukamba balatsiililila okhumanya mbu oshibulaho. Kho otsie wibise habundu aha webisa inyanga yilia mana wibise inyuma weshibunjikho shiamachina shia Ezeli.

²⁰Nasi ndalalasa khushio obuyingo okhuula khataru shinga owiteechile okhulasa.

²¹Ndalaruma omukholi wanje mbu atsie abukhaabe. Nindakhamuboolela endi, ‘Lola, eshisele shili elubeka ewoli, shibukule,’ kaba kemanyisia mbu oli nomulembe ne onyala okhurulaho niwitsa. Nditsuba muliira elia OMWAMI Nyasaye ouliho mwoyo mbu, shiolanyoolakhwo amatinyu koosi koosi tawe.

²²Nebutswa omulembe nikulaliho ta, emba ndalaboolela omukholi oyo endi, ‘Obuyingo buroonyile ehale!’ Kano kalamanyisia mbu, OMWAMI Nyasaye yenyanga mbu oruleho, ne okhuula otsie.

²³OMWAMI Nyasaye alabetsanga ninefwe buli lwosi okhulola mbu, khulindile obusuubisie obwa khusuubisaniye.”

²⁴Kho Daudi niyebisa mumukunda khushise shielisabo elia Omwesi Omuyia, omuruchi Saulo niyetsa okhulia ne

²⁵niyekhala aha yekhalanga buli lwosi hesiisi. Abuneri niyekhala nalondokhaane ninaye naye Yonatsani niyekhala nibahengaane. Obwikhalo bwa Daudi bwali obukhaya.

²⁶Nebutswa Saulo shiyaboolakhwo likhuwa liosi liosi inyanga eyo ta, shichila yapaara ari, “Daudi akholile likhuwa libi kho shinomusiiyikhu ounyala okhulia lisabo lino tawe.”

²⁷Inyanga yaloonda inyanga yelisabo eyo, obwikhalo bwa Daudi bwali nibushili obukhaya, mana Saulo nareeba Yonatsani ari, “Eshichilile Daudi naletsa okhulia ingoloobe kata inyanga yino nishiina?”

²⁸Yonatsani namukalusia ari, “Yasabile mbu emulekhuule atsie Betselehemu,

²⁹naboola ari, ‘Chama undekhuule enzie shichila abeinzu yefwe bakholanga lisabo mwitookho, ne omusiani wefwe alachile mbu okhuula embeyo. Noba niwaheela chama ofuchilile enzie embe nabekho banje!’ Eshio nishio eshifune shichila nalali mubwikhalobwe tawe.”

³⁰Saulo nasinyishila Yonatsani muno, naboola ari, “Iwe oli omwana womukhasi omubi khandi oweinduli! Bulano emanyile mbu, oli khulubeka lwa Daudi ne ofimbwe omurwe iwe omwene nende mamawo wakhwibula.

³¹Shiomanyilekhwo mbu, khulwa oluhoono lwa Daudi ashiliho mwoyo shiolibakhwo omuruchi weshialo shino tawe. Bulano tsia omureere hano. Okhuula yerwe!”

³²Yonatsani nakalusia Saulo ari, “Mbushiina niwenya mbu okhuula afwe? Akholile shiina eshibi?”

³³Saulo nateema okhwira Yonatsani khulwa okhupaya lifumolie. Kho Yonatsani namanya toto mwene mbu, papawe yenyanga okhwira Daudi.

³⁴Yonatsani nabuukha okhurula khumeesa nasinyiishe muno, nahonga inzala inyanga eyo yosi. Yabelela mumwoyo muno khulwa Daudi, shichila Saulo yali nanyechile Daudi.

³⁵Nibushiele mumabwibwi inyanga yalondakhwo, Yonatsani yatsia mumukunda okhulola Daudi shinga olwa bali nibafuchilisaniye. Yonatsani natsiayo nomwana omusiani omutuutu,

³⁶naboolela omwana oyo ari, “Tsia tsimbilo oreele obuyingo obwendasa.” Omwana oyo natsia tsimbilo imbeli, naye Yonatsani nalasa obuyingo imbeliwe okhumubira.

³⁷Olwa omwana oyo yoola habundu ewa eshisele shiali nishiroonyile, Yonatsani yamulanga nomwoyo omukhongo ari, “Eshisele shili ehale muno!

³⁸Shiolasinjila butswa yaho tawe! Yuuka! Tsia bwangu, shioleema ta!” Omwana oyo nabukula eshisele eshio nakalusilia Yonatsani.

³⁹Omwana oyo nalamanyilisiye eshisina shiamakhuwa ako ta, habula abamanya bali Yonatsani nende Daudi.

⁴⁰Yonatsani yahelesia omwana oyo ebimanulwabie mana omwana oyo nabikalusia mwitookho.

⁴¹Omwana oyo niyakharulaho, Daudi yabuukha narula inyuma weshibunjikho shiamachina eshio, niyenamia obwenibwe okhuula hasi okhuula khataru khulwa okhwinamila Yonatsani. Daudi nende Yonatsani balila nibafumbeelelana boosi babili. Nebutswa Daudi yali neshibeela eshinji okhushila Yonatsani.

⁴²Naye Yonatsani namuboolela ari, “Nyasaye akhulinde. OMWAMI Nyasaye alakhukhola isie ninawe nende abolwibulolwo, nende olwanje okhulinda obusuubisie bwa khusubisaniye.” Daudi narulaho natsia, naye Yonatsani nakalukha mwitookho.