Read wanga 1 SAMWELI 21 Bible Online

1 SAMWELI 21 - wanga bible

1 SAMWELI 21

¹Daudi natsia khumwisaaliisi Ahimeleki owomwitookho lia Nobu. Ahimeleki yarula munzu natechelanga okhwakaanila Daudi. Ahimeleki namureeba ari, “Mbushiina niwitsa hano wenyene?”

²Daudi namukalusia ari, “Omuruchi niye ourumile hano. Yalachile mbu ndalaboolelakhwo omundu yesi yesi aka yarumile okhukhola tawe. Embooleele abelihe banje mbu banindile habundu undi.

³Bulano nishiokhulia shiina eshiolikhwo ninashio? Umbelesie emikaate chirano noho eshiokhulia shiosi shiosi eshiolikhwo ninashio.”

⁴Nebutswa omwisaaliisi oyo naboola ari, “Shiendikhwo nende omukaate kundi kwosi ta, endi butswa nende omukaate omutakatifu kwonyene. Onyala okhukubukula, nikaba mbu, abelihebo shibakonilekhwo nabakhasi hambi hano tawe.”

⁵Daudi namukalusia ari, “Shibakonilekhwo nabakhasi hambi hano tawe. Buli lwosi abelihe banje belindanga nibaba abasiiyikhu kata olwa khuba nikhutsia okhukhola omulimo kwosi. Ne bulano bakhaakaana nabakhasi barie olwa khuli khumulimo omwahule kuno!”

⁶Omwisaaliisi oyo nahelesia Daudi omukaate omutakatifu, shichila emikaate chia yali natoonyile ninachio chiali emitakatifu, echiali nichirusiibwe khumeesa indakatifu, nibareerekhwo emiyia.

⁷Omukholi omukhongo womuruchi Saulo oulangwa mbu, Doegi owa Edomu yanyoolekhayo inyanga eyo, shichila yali niyetsile okhwinamila OMWAMI Nyasaye okhuusia lilako lieidiini.

⁸Daudi nareeba omwisaaliisi Ahimeleki ari, “Olikhwo nelifumo kata olukanga lwonyala okhumbelesia? Shiembukuulekhwo olukanga kata eshimanulwa shiosi shiosi ta, shichila omuruchi yandachilisiye okhurula bwangu matetekhana.”

⁹Ahimeleki namukalusia ari, “Endi nolukanga lwa Goliatsi omufilisiti wa weerera mwibanda lia Ela. Lukanyiilwe mungubo inyuma wa ifodi. Onyala okhulubukula noba nolwenya. Nishio eshimanulwa shili hano shionyene.” Daudi namuboolela ari, “Lumbelesie! Lubulaho olundi habundu undi olushila olwo tawe!”

¹⁰Daudi narulaho, niyelukhanga okhurula khumuruchi Saulo, natsia khumuruchi Akishi owelitookho lia Gatsi.

¹¹Abakhongo bomuruchi Akishi nibareeba omuruchi oyo bari, “Uno shiali Daudi, omuruchi weshialo shino ta? Uno niye omundu wabakhasi bembanga nibashina nibarumbula bari, ‘Saulo yeriire abandu ebikhumila, nebutswa Daudi yeerire abandu ebikhumila amakhumi.’ ”

¹²Daudi nayililisia amakhuwa akabakhongo abo bali nibaboolanga, ne nikamukhola okhuria omuruchi Akishi muno.

¹³Daudi yekatinjia mbu neshiyingwa nali mubo, ne nali hasi wobunyali yekholanga shinga omulalu, nang'olang'ola khumuliango kweshiliibwa shielitookho khandi nakhola amareke okhunyululukha khushinwanwashie.

¹⁴Omuruchi Akishi naboolela abakhongobe ari, “Lole! Omundu uno nomulalu! Eshichilile nimumureera khwisie nishiina?

¹⁵Mupaara mbu isie abalalu baheela noho? Mbushiina mureere munzu wanje muno omulalu undi okhusinyisia nebikholebie ebimayanu?”