Read wanga 1 SAMWELI 22 Bible Online

1 SAMWELI 22 - wanga bible

1 SAMWELI 22

¹Daudi yelukha narula mwitookho lia Gatsi natsia mumbinga eyali hambi nelitookho lia Adulamu. Olwa abasiani babwe nende abeinzu yabwe boosi bahulila mbu ali yaho, betsa nibaba ninaye.

²Abandu abali nibasandibungwa, abali namakofi nende abali nibalachamisibungwa noburuchi obwo ta, bamwitsila. Bali abandu hambi ebikhumi bine (400), mana naba omwimilisi wabwe.

³Daudi narulaho natsia mwitookho lia Mizipa mu Moabu, naboolela omuruchi wa Moabu ari, “Chama papa wanje nende mama wanje betse bamenyekhwo ninawe hano, okhuula olwa emanyilisia aka Nyasaye alaakholela.”

⁴Daudi nareera abebusibe khumuruchi wa Moabu, nibamenya ninaye olwa Daudi yali nashiibisile mumbinga.

⁵Inyanga yindi omulakusi Gadi yetsa naboolela Daudi ari, “Shiolamenya hano tawe. Kalukha mushialo shia Yuda.” Daudi narula natsia niyenjila mumutsuru kwa Heretsi.

⁶Inyanga yindi Saulo yali nali Gibea niyekhaale hasi mushinikha shiomusaala kwomutamarisi khushikulu, natiilile lifumolie mumukhono, nabo abakhongobe boosi bali nibasinjiileho. Yaboolelwa mbu, Daudi nende abandube banyooleeshe.

⁷Mana omuruchi Saulo naboolela abakhongobe ari, “Recheresie, inywe aboluyia lwa Benjamini! Mupaara mbu Daudi alamukaba inywe mwesi emikunda kata emikunda chiemitsabibu nende okhumukhola mbu mube abakhongo babasikaaribe?

⁸Niko akachilanga inywe nimunzinjilila okhuusanjilila noho? Abulaho omundu yesi yesi khwinywe owamboolela mbu, omusiani wanje mwene yalia omuuma nende Daudi tawe. Abulaho ouhendelanga kata okhumboolela mbu, Daudi ouli mulala khubandu banje beene, khubise bino akhaabanga okhunzira, ne khandi omusiani wanje mwene niye oumutsuubanga!”

⁹Naye Omuedomu yali nasinjiileho halala nabakhongo ba Saulo naboola ari, “Ndalutsi Daudi olwa yatsiile khumwisaaliisi Ahimeleki omusiani wa Ahitibu mu Nobu.

¹⁰Ahimeleki nareeba OMWAMI Nyasaye eshia Daudi akhoyile okhukhola, mana Ahimeleki nahelesia Daudi ebiokhulia nende olukanga lwali lwa Omufilisiti Goliatsi.”

¹¹Omuruchi Saulo nakhupa omulome mbu omwisaaliisi Ahimeleki yetse halala nende abekhobe boosi, abali khandi boosi abesaaliisi mu Nobu, mana nibetsa.

¹²Saulo naboolela Ahimeleki ari, “Recheresia, Ahimeleki!” Ahimeleki nakalusia ari, “Omwami, embulilanga.”

¹³Omuruchi Saulo namureeba ari, “Eshichilanga iwe nende Daudi nimunzayilisia okhunzira nishiina? Eshiachilile nomuhelesia ebiokhulia nende olukanga khandi nomureebela khu Nyasaye nishiina? Bulano yangalukhaanekhwo, khandi akhabanga okhunzira!”

¹⁴Omwisaaliisi Ahimeleki nakalusia Saulo ari, “Daudi nomusikaari omwisiikwa muno mubasikaari aboli ninabo! Ye yateeshia omukhaanawo, nomwimilisi wabalindibo khandi owa buli mundu muluyia lwenywe lwoburuchi ahelesinjia oluyali olukhongo muno.

¹⁵Toto ndareebile Nyasaye amakhuwake, ne olwo shinolwambeli tawe. Ne khumakhuwa kokhukhabilisia mbu wirwe shiolanzinjilila isie itookho kata abeinzu yanje tawe. Shiemanyilekho likhuwa liosi liosi khuko tawe!”

¹⁶Omuruchi Saulo naboola ari, “Iwe Ahimeleki nende abekhobo boosi okhuula mufwe.”

¹⁷Mana Saulo naboolela abalindibe abali nibasinjiileho ari, “Mwire abesaaliisi aba OMWAMI Nyasaye bano! Shichila basanjilananga nende Daudi, bamanyile mbu yeluushe natsia ne shibamboolelakhwo tawe.” Abakhongo abo nibaloba okhwira abesaaliisi aba OMWAMI Nyasaye abo.

¹⁸Saulo naboolela Doegi ari, “Iwe wiire abesaaliisi bano.” Naye Doegi nabeera boosi. Inyanga eyo yeera abesaaliisi amakhumi munane nende barano (85) abali nibafuchililwa okhufwala ifodi.

¹⁹Saulo nalaka khandi mbu, abetsimbia abamenyanga mu Nobu, litookho liabesaaliisi beerwe, abasaatsa, abakhasi, abaana, tsindaana, tsing'ombe, tsisishili nende amakondi, biosi bierwa.

²⁰Nebutswa Abiatsari, mulala khubaana bomwisaaliisi Ahimeleki, yehonokokha ne natsia naba halala nende Daudi.

²¹Abiatsari naboolela Daudi shinga olwa Saulo yali niyeerire abesaaliisi aba OMWAMI Nyasaye.

²²Daudi namuboolela ari, “Inyanga eyo olwa ndalolaho Doegi, ndamanya mbu, alaboolela Saulo. Kho nisie ouchila abekho benywe boosi nibeerwa.

²³Menya hano ninasi, ne shiolaria tawe. Saulo akhabanga okhwira iwe nende isie, nebutswa shioleerwa noli ninasi tawe.”