Read wanga 1 SAMWELI 23 Bible Online

1 SAMWELI 23 - wanga bible

1 SAMWELI 23

¹Inyanga yindi abandu bandi baboolela Daudi bari, “Abafilisiti batsiilililanga nibaseera litookho lia Keyila nibayaaya imele okhurula habundu ha baseselanga.”

²Daudi nareeba OMWAMI Nyasaye ari, “Enzie eseere Abafilisiti bano noho?” OMWAMI Nyasaye namukalusia ari, “Tsia obaseere mana ohonokosie litookho lia Keyila.”

³Abelihe ba Daudi nibamuboolela bari, “Khwaria Yuda hano muno, ne kalaba karie nikhutsia okhuseera Abafilisiti mwitookho lia Keyila?”

⁴Kho Daudi nareeba OMWAMI Nyasaye khandi, naye OMWAMI Nyasaye namuboolela ari, “Tsia oseere Keyila, shichila ndalamunyalila okhubahula.”

⁵Mana Daudi nabandube nibatsia Keyila nibaseera Abafilisiti. Nibeera Abafilisiti abo abanji nende okhuyaaya emiruko chiabwe. Nolwa Daudi yahonokosia litookho elo.

⁶Olwa Abiatsari omusiani wa Ahimeleki yelukha niyetsa khu Daudi Keyila, yetsa nende ifodi.

⁷Mana Saulo naboolelwa mbu, Daudi amalile okhutsia Keyila, naye naboola ari, “Nyasaye amuhaanile mumakhono kanje. Daudi yehaambile omwene khulwa okhwinjila mwitookho liasirwa nende lisiisi khandi eliekalwa nemiliango.”

⁸Kho Saulo nalanga abelihebe khulwa lihe, nibachaaka okhutsia okhuseera Keyila mbu batiile Daudi nabasikaaribe.

⁹Olwa Daudi yahulila mbu, Saulo yerechekhanga okhumuseera, yaboolela omwisaaliisi Abiatsari ari, “Reera hano ifodi eyo.”

¹⁰Mana Daudi naboola ari, “OMWAMI Nyasaye wa Isiraeli, embuliile mbu, Saulo yerechekhanga okhuseera Keyila nende okhulisasia shichila isie omukhalabaniwo.

¹¹Abandu belitookho lia Keyila banyala okhuhaana isie khu Saulo noho? Saulo aletsa shinga olwa embuliile noho? OMWAMI Nyasaye wa Isiraeli, ekhusaba mbu, umboolele!” OMWAMI Nyasaye namukalusia ari, “Saulo aletsa.”

¹²Daudi nareeba ari, “Abandu ba Keyila banyala okhuuhaana isie nende abandu banje khu Saulo noho?” OMWAMI Nyasaye namukalusia ari, “Balamuhaana inywe.”

¹³Kho Daudi nabandube boosi ebikhumi bisasaba (600) nibarula bwangu Keyila nibatsiililila okhutsia. Olwa Saulo yahulila mbu Daudi yeluushe okhurula Keyila, shiyamala atsieyo tawe.

¹⁴Daudi namenya niyebisa mushialo shieshikulu mushitsiimi shia Zifu. Saulo yateemanga okhumurunilisia, nebutswa Nyasaye shiyahaana Daudi khuye tawe.

¹⁵Daudi yamanya mbu, Saulo ayimanga okhumwira. Inyanga yindi Daudi yali nali Heroshi mushitsiimi shia Zifu hambi nende litookho lia Zifu. Yali omuri muno, shichila Saulo yali niyetsileyo mbu amwire.

¹⁶Yonatsani natsia ewa Daudi yali namutinyilisia nende okhumusuubisia mbu, Nyasaye alamulinda.

¹⁷Namuboolela ari, “Shiolaria ta. Papa wanje Saulo shialakhusaalisiakhwo tawe. Amanyile obulayi bwene mbu, niwe oulaba omuruchi wa Isiraeli, khandi mbu, nisie oulinjila mushilenjeshio olunyuma.”

¹⁸Mana boosi nibakhola indakano imbeli ewa OMWAMI Nyasaye mbu, balaba abetsa. Mana Yonatsani niyenyokha naye Daudi namenya Horeshi.

¹⁹Abandu bandi bomwitookho lia Zifu nibatsia Gibea nibaboolela Saulo bari, “Daudi yebisanga mushialo shiefwe Horeshi, khushikulu shia Hakila emulambo weshitsiimi shia Yuda.

²⁰Omwami, khumanyile shinga olwomukhaabanga okhumutiila. Kho yitsa mushialo shiefwe, nefu khulakhukhoonya okhumutiila.”

²¹Saulo nababoolela ari, “Mukholeele aketsimbabasi amakhongo, nasi esaba mbu, OMWAMI Nyasaye amuhelesie inywe tsikhabi!

²²Chame mutsie muukholelekhwo kano. Khaabe mumanyilisie obulayi bwene aha Daudi ali, ewa amalanga atsiakhwo, nende omundu oumulutsikhwo naba naliho. Bambooleele mbu, nomundu omuchesichesi.

²³Khaabilisie mumanye obulayi bwene aha yebisanga, mana mwitse bwangu mumboolele. Nasi ndalatsia ninenywe, ne naba nashili mushialo eshio, ndalamurunilisia nemutiila, kata nikaba mbu, emukhabilisie mushialo shia Yuda shiosi.”

²⁴Kho nibarulaho nibaranjilila Saulo okhutsia mwitookho lia Zifu. Daudi nende abandube bali mushitsiimi shia Maoni, mwibanda elili emulambo weshitsiimi shia Yuda.

²⁵Saulo nabelihebe nibachaaka okhutsia okhukhaaba Daudi, nebutswa Daudi namanya, natsia khushikulu shiolwanda eshili mushitsiimi shia Maoni ne namenyayo. Olwa Saulo yamanya ario, yatsia mushitsiimi shia Maoni okhumulondachila.

²⁶Saulo yali nabotokhaane eshikulu eshio elubeka undi, naye Daudi nabandube elubeka undi nibenyanga okhwilukha. Saulo nabasikaaribe bali hambi okhutiila Daudi nabandube,

²⁷ne omurume yetsa naboolela Saulo ari, “Yitsa bwangu! Abafilisiti baseeranga Abaisiraeli nibayaaya buli shindu.”

²⁸Kho Saulo nalekha okhulondachila Daudi nakalukha okhulwana Abafilisiti. Nakachila habundu yaho nihalangwa mbu, “Olwanda lwobwihonokosi.”

²⁹Daudi narulaho natsia mushialo shia Engedi, ewa yamenya niyebisile.